استفسار للمحامي خالد الزامل والأخوان ..

السلام عليكم


عندي استشارة قانونية من فضلكم.. أرجو إفادتي فيها ..

أنا شريت سيارة موديل 2014 ..من وكالتها في الكويت. خذيتها أقساط.
السيارة من اول ماخذيتها وهي فيها ريحة كريهه.. اعتقدت في البداية إن الريحه ماهي الا ريحة الوكالة..وراجعتهم بعد اسبوعين من اخذي للسيارة وقلتلهم عن الريحه قالوا اصبري شوي وبتروح يمكن لأنها جديده !
نطرت شهر ورحتلهم ع اساس ان الريحه ماراحت الى الان, وهذي حالتي على مدى سنة كاملة .. جربت كل الطرق في سبيل إزالة الريحة اعتقادًا مني إن الريحه عشان السيارة جديده !! شهريًا أدفع 34 دينار على غسيل السيارة وتبديل الفلتر !!
الآن مرت سنه من خذيت السيارة والريحه ماراحت وكل مالها تزيد.. طفح الكيل ..
رحت لهم قبل كم يوم ودخلت على المدير وحولني على مدير الكراج .. لما رحتله قالي فعلًا هذي مشكلة بالسيارة والآن تأكدت منج إنها مشكلة .. لأن المصنع مسوي كشنات السيارة بخيوط وقماش مايصلح للشرق الأوسط عشان الجو حار عندنا !
قلتله أنا شنو ذنبي آخذ سيارة جذي ! قالي ذنبج إن الكويت حارة !!!

قلتله ابي حل قالي انتظري اسبوعين براسل المصنع وأشوف الحلول ..

الآن يا سيدي أنا متضرره ماديًا ونفسيًا ..
كل شخص يركب سيارتي يعلق على الريحه !
كل ما أركب سيارتي الريحه تلصق بملابسي !
كل شي أحطه بالسيارة تصير ريحته من ريحتها !
سنه كاملة مشيت فيها 10.000 كيلو فقط من شدة الريحة الكريهة صرت ما أتقبل أركبها !!

شنو الاجراءات القانونية اللي مفروض أتبعها في مثل هذه الحاله ؟ وهل يحق لي التعويض المادي والمعنوي ؟
هل فيها مغامرة إني أرفع قضية على وكالة ؟ وهل يستغرق الأمر شهور في المحاكم ؟
هل في نسبه معينه إني أخسر القضيه ؟

وشكرًا للجميع..
 
وعليكم السلام ورحمة الله وبركاته

الله يعوضج خير ان شاء الله

أنصحك بالاتصال بحماية المستهلك كخطوة أولي

علي الرقم 135

والاستفسار منهم عن اللي لك واللي عليك


اما بخصوص الإجراءات القانونية ان شاء الله يفيدونا فيها الأخوة المختصين بهذا المجال
 

alkingz

عضو
اختي تبين حل سريع بدون لف ودوران وقضايا روحي بيعي السياره وعوضج على رب العالمين
 
اختي تبين حل سريع بدون لف ودوران وقضايا روحي بيعي السياره وعوضج على رب العالمين
شلون يعني ياخوي أسكت عن حقي سنه كاملة أقولهم في ريحه ويقولون مافي وتوهم يعترفون فيها !
اللي راح يشتريها ماراح تخفى عليه الريحه, وراح يضطر يشتكي علي أنا !
 
اعترافهم بالمشكلة راح يسهل لك المطالبة بحقك

وما دامك متضررة منهم فأكيد لك حق تطالبينهم بتعويض والموضوع هذا يفيدك فيه محامي يبين لك اللي لك واللي عليك


لكن فالبداية اتصلي علي حماية المستهلك وانا متأكد راح يفيدونك

اعرف واحد سيارته في مشكله ودخلها كراج الوكالة
وقعدوا يماطلون معاه يدخلها أسبوع ويستلمها أسبوع والعطل لا زال موجود ..
اتصل علي حماية المستهلك وخلص موضوع سيارته خلال ٣ ايام صلحوها له


بالتوفيق
 
بو عبدالرحمن شكرا على الافادة..
أنا كارهة السيارة طوال السنة مشيت فيها 10.000 كيلو بس والباقي كله مع السايق او تكاسي !! أغلب الوقت مخليتها صافطة ماتتحرك من زود الريحه ماقدر أركب أحد فيها
كرمك الله ريحة سمك منسي .
كل شخص يركبها يصدع من الريحة او يرجع كرمك الله وعيونهم تعورهم !!

بغض النظر عن تبديل الكشنات لأن يقولون الريحة من خيوطها ماتصلح لأجواء الكويت ! أبي أردها لهم وأسترجع فلوسي وفوق هذا أبي تعويض معنوي على هالسنة هذي وأبي كل اللي دفعته في التنظيف !!
يحق لي المطالبة بهذا ؟
وبالنسبة لحماية المستهلك ماظن راح يفيدوني الا بنقطة الضغط على الشركة لحل المشكله, وأنا مابي تنحل بتبديل كشنات بس .. أبي التعويض وانهم ياخذون سيارتهم ويعطوني فلوسي .. كرهت اسم السيارة بكبره.

أحد المحامين وعدني بتعويض 50 ألف دينار وفوقه مبلغ السيارة أو سيارة جديدة . لكن ماحبيت كلامه كان قاط الميانه شوي !! لذلك كتبت هني بعرف اللي لي واللي علي ومن بعدها اتوكل على الله وأرفع القضيه.
 
اتمني يرد علي هالموضوع احد الأخوة المحامين ويوضح لك تساؤلاتك ..

لكن في نفس الوقت أرد واقولك ..اولا -. يجب عليك الاستفسار من حماية المستهلك مجرد استفسار
ثانيا -
في بعض المحامين حاطين ارقامهم للرد علي الاستفسارات بشكل مجاني

تلقين ارقامهم عند البدالات التجارية مثل ١٨٠٨٠٨٠ او ١٨٠٧٠٠٠

وبالتوفيق لك يا أختي ام فيصل
 
بعد محاولات فاشلة في التفاهم مع 5 مدراء من الوكالة قررت أرفع القضيه ..
المدراء يماطلون حيل وكل واحد يحولني على الثاني .. لذلك قررت هالشي..
راح أوافيكم بكل جديد بهالخصوص عشان يستفيدون الاخوان .. وادعوا لي أكسب القضية.
 

غيث

عضو مخضرم
ام فيصل اذا أعترفوا بالخطأ وعوضوج بالسيارة تمام
وإذا لا روحي للمحكمة واطلبي ندب خبير بلغي المحكمة انج جيتيهم اكثر من مره واطلبي ندب خبير
بعد تقرير الخبير اطلبي تعويض عن السيارة وتعويض نفسي
 
ام فيصل اذا أعترفوا بالخطأ وعوضوج بالسيارة تمام
وإذا لا روحي للمحكمة واطلبي ندب خبير بلغي المحكمة انج جيتيهم اكثر من مره واطلبي ندب خبير
بعد تقرير الخبير اطلبي تعويض عن السيارة وتعويض نفسي

كلهم اعترفوا بالخطأ شفهيا
عرضهم علي كان فقط تبديل الكشنات ! طيب والسنة الكاملة شلون عليها ؟ والفلوس اللي خسرتها على التنظيف والتكاسي وتأجير السيارات !!
غير الامور النفسيه والادبية اللي تعرضت لها بسبب الريحة ..

هذا اللي بيصير بطلب من المحكمة ندب خبير, لكن انا الان انطر تقرير الفحص الفني بخصوص الريحة وعلى اساسه اتقدم بالقضيه
 

تويتر الكويت

عضو مخضرم
الله يعوضج خير ويارب تكسبين القضية
واتمنى تغريم الوكالة مبلغ كبير من المال
علشان تكون الوكالة عبرة لمن يعتبر
واذا طلع الحكم بشرينا بالموقع علشان نبارك لج
و علشان نشهر فيهم في جميع وسائل التواصل الاجتماعي
علشان تتاثر مبيعاتهم ويتركون المماطلة واكل اموال الناس بالباطل
 
الله يعوض ويوفق الجميع

* تم رفع القضية وبانتظار جلسة المحكمة الشهر الجاي لندب الخبير عشان يفحص السيارة. والله يكتب اللي فيه الخير راح أوافيكم بكل جديد ..
 

تويتر الكويت

عضو مخضرم
ترى المحامي مو شرط ياخذ اتعاب و مبالغ كبيرة من المال
ممكن تشرطين عليه ياخذ نسبة من التعويض اذا كسب القضية
وما يبي منج الا الرسوم الادارية ومصاريف التصوير واتعاب بسيطة
 
اختي حطيتي محامي ولا ماشية بالقضية بدون محامي
اذا ما عندج محامي صاحب خبرة بهذي القضايا ممكن تخسرين القضية


امبلا حاطه أكييييييييييييييد

ترى المحامي مو شرط ياخذ اتعاب و مبالغ كبيرة من المال
ممكن تشرطين عليه ياخذ نسبة من التعويض اذا كسب القضية
وما يبي منج الا الرسوم الادارية ومصاريف التصوير واتعاب بسيطة

المحامي خذا مبلغ بالبداية وماطلب نسبة من التعويض
 
أعلى