سؤال وجواب كفالة محل ولا كفالة شركة ؟

[JoKeR 11]

مساكم الله بالخير يا جماعة

أنا ناوي أشتري لي لابتوب قوي و عالي المواصفات

بس المشكلة سالفة الكفالة مضيعتني شوي

أعرف واحد راعي محل كمبيوترات ينصحني أشتري اللابتوب من شركة معروفة مثل اليوريكا أو إكسايت

لأنه يقول كفالتهم أقوى بعكس المحلات العادية اللي تكون كفالتهم على حساب المحل !

طبعا ما أدري شنو يقصد بس جنه يقول لي لا تفكر تآخذ من محلات , بس من شركات !

و اللي بعرفه ألحين شنو الفرق بالضبط بين الكفالة لو كانت تابعة شركات اليوريكا أو إكسايت و بين الكفالة إذا كانت تابعة محل عادي مال كمبيوترات

 

[بحار بحار]

إهيه الكفالة واحده خذيت من الشركات أو المحلات كلهم نفس الشي بس المحلات ممكن ظروف يمر فيها صاحب المحل فيضطر صاحب المحل إن يسكر محله فضيع عليك الكفالة

أما الشركات هذي تعتبر شركات كبيره ومضمونه ولها سنين في السوق فكفالتها مضمونه

 

[OK]

الفرق هو موضوع السمعه

لو تبي جهاز مكلف قوي بمواصفات عاليه ماراح تحصله بالكويت بسعر مناسب وهذا من خبرتي المتواضعه في الموضوع لاني بحثت عن لاب توب بمواصفات عاليه حصلته على الاقل ب280 دينار واعلى وموجود برا الكويت لما سافرت حصلته تقريبا ب180 دينار وكان الفرق هو الكيبورد وحليت المشكلة بوصع ستكرات على الكيبورد وانتهت القضية

ابحث في كل مكان عن الجهاز اللي تبيه وقارن الاسعار وبالنسبه لي امازون اضمن من بعض الشركات لو كان البائع امازون نفسه

 

[شمري كويتي]

لا شك ان كفالة الشركات الكبرى ذات السمعة الجيدة
افضل من كفالة المحلات العادية او المحلات الصغيرة
والامر الثاني الشركات الكبرى تجد فيها الاجهزة الاصلية
اما المحلات العادية الصغيرة ممكن يبيعك جهاز اصلي او تقليد
الشركة الكبيرة تخاف على سمعتها وتحرص على احضار الاجهزة الاصلية
شنو الفايدة تشتري من محل جهاز تقليد ويعطيك كفالة سنة او سنتين
تحمل زيادة عشر دنانير او عشرين دينار واضمن انك تشتري جهاز اصلي وليس تقليد
نصيحة لك ابعد عن جميع الاجهزة ذات الماركات الغير معروفة
واحرص على شراء الاجهزة ذات الاسماء الرنانة والمشهورة عالميا
للعلم هناك وكالات تبيع اجهزة اصلية بحيث تكون الشركة وكيل معتمد للجهاز
اعطيك مثال سيارة تويوتا وكيلها شركة الساير في الكويت
كذلك اجهزة الكمبيوتر اغلب الماركات المشهورة لها وكيل معتمد في الكويت
وهذا الامر ينطبق على اجهزة الهواتف الذكية مثل الايفون و الجالكسي ( سامسونغ )
حيث تنتشر الاجهزة المقلدة والشواحن المقلدة التي تشكل خطر على حياة الناس
في مثل منتشر على ألسنة الناس يقول الغالي سعره فيه
وفي مثل أقدم منه يقول يدلك على الخيل أثمانها
اذا ميزانيتك قوية ابحث عن الغالي بل ابحث عن الاغلى والاغلى والاغلى
فغالبا وليس دائما الغالي هو الاجود والافضل في اغلب الاحوال
الان اجهزة لابتوب الجيل السادس او الاصدار السادس هي الاحدث والاسرع
ميزة شركة يوريكا تجعلك تختار من بين الماركات وانت في قمة الراحة
فتجد امامك اغلب انواع الاجهزة وتختار جهازك وانت في مكان واحد
اما اكسايت الغانم كرهتم لما رحت اشتري منهم ثلاجة او مكيف كرهت هذي الشركة
وحلفت اني ما ادخلها ولا اشتري منهم اي جهاز مدى الحياة
لانهم غيروا سياستهم وتركوا احضار الماركات الاخرى من الشركات الاخرى
قاموا يركزون على بضاعتهم اللي هم وكلاءها ويركزون على ماركاتهم
مع ان في ماركات افضل مليون مرة من ماركاتهم اللي ماخذين وكالتها
لكنها سياسة الاحتكار تسري في دماء التجار ورجعوا الى طبعهم القديم