سؤال وجواب شلون أدش البورصه ؟!!!! من صجي ترى!

[Mariner]

ادري انه سؤال غريب والكل قاعد ينحاش من البورصة ...
طبعا انا عمري ما فكرت ادش البورصه .. مالي خلق عوار راس وتعب ومحاتاه ..

منت بتشري فيهم ذهب وبعدين غيرت رايي ...

بس فعلا قلت حق روحي ليش ما ادش البورصه؟
الحين الاسهم صايره رخيصه ... اشتري بمبلغ مو كبير وايد وانساهم سنة سنتين ثلاث ليمن يرتفعون ...

المبلغ المرصود الفين دينار .. وممكن زيادتها الى 3 الاف اذا كانت الفكرة زينه وتنصحوني فيها ..

1_ ابي اعرف شنو الاجراءت والاوراق المطلوبه ... حسب علمي لازم افتح حساب تداول في البورصه ..
يا ريت احد يقول لي خطوه خطوه المطلوب ..


2_ شنو الشركات الاسلاميه اللي اسمها نازله وتكون فرصه اني اشتري الحين

يعني مثلا بيت التمويل و دار الاستثمار على جم سهمهم ؟

واقدري اشتري اسهم فيهم بهالمبلغ اللي عندي ؟

ومشكورين ...

 

[وادي المسك]

ياهلا ومرحبا باخوي Mariner المستثمر القادم


طبعا يوم الاحد ماراح تقدر تدش لان فيه اعتصام والحاله حاله !!!


نصيحة أخو أنفذ بجلدك


أما ان كنت مصر فيوجد في البورصه الدور الثامن او السابع لا اتذكر فتح حساب والمطلوب البطاقه المدنيه وتعبئة نموذج به البيانات ورقم الحساب البنكي ..

وبعد ثلاث ايام يفعل وتستطيع البيع والشراء عن طريق المكاتب في البورصه او خارجها او حتي عن طريق الانترنت ..


في الوقت الحاضر لن تستطيع الشراء لان المعروض فوق كمية الطلب والكل ممسك لايبيع الا بعض الهوامير الذين يتحكمون بالسوق ...


واذا تبي استثمر لك فلوسك ترى حاضر

 

[Mariner]

هلا بيك اخوي حامل المسك

(( في الوقت الحاضر لن تستطيع الشراء لان المعروض فوق كمية الطلب والكل ممسك لايبيع الا بعض الهوامير الذين يتحكمون بالسوق ... ))

ليش ؟؟
انا خبري اذا المعروض كبير يعني أحسن ... يعني اقدر اشتري وبسعر رخيص .. مو جذي ؟


وبغيت اعرف جم سهم بيت التمويل ... وجم الحد الادنى من الاسهم اللي اقدر اشتريه ؟؟

وشلون اتداول على النت ؟ ممكن تعطيني الموقع ؟؟

ومشكور و ما تقصر ...

 

[نقطة نظام]

عزيزي مرينر..

خذها نصيحه من اخو صار 8 سنين وهو يتداول بالبورصه..


وماراح ازيد في الكلام حيث ان من المعروف عالميا ً بأن الاسواق الماليه هي من اخطر الاسواق وفوق هذا لا يخفى عليك الوضع الراهن و خطورة البورصه في هذا الوقت بالذات..


يعني ياخوي البورصه يبيلها واحد محترف..


او شخص عنده اخبار "ماتخرش الميه"


وفي سوقنا "الخبر" مقدم على الاحتراف..


ومن اين يأتي هذا الخبر...؟


يأتي غالبا ً من مدراء المحافظ وصناع السوق..


وهؤلاء فيهم اللي "يبرك" ان كنت تعرفه وفيهم من لا يتكلم ويعتبرها من اسرار مهنته..


طيب والعمل كيف يستطيع شخص مبتدئ مثلك ان يدخل البورصه بأقل الخسائر والاستفاده القصوى منها..


الحل الاسهل والاحوط والاربح..


اذهب الى من يصنع الخبر نفسه..


وهم الصناديق الاستثماريه..


وحط افلوسك عندهم..


وهذه الصناديق..في اوقات الرخاء طبعا ً...تحقق عائد اعلى من عائد السوق نفسه ولا اريد ان اسهب في هذا المجال..

وعندك اكبر شركتين تدير هذه الصناديق..


الاستثمارات الوطنيه

جلوبل


ادخل على الروابط اعلاه وشوف لك صندوق محقق له عائد طيب واستثمر فيه..


وتسطيع ايضا ً قرائة التقرير الاقتصادي الشهري لهذه الصناديق وهو موجود في الصفحه الاقتصاديه في اغلب الصحف لمعرفة ادائها وايهم الافضل..


وهناك انواع للصناديق..


والذي استشفته من سؤالك انك تريد سهم اسلامي..اذن حط في صندوق اسلامي... واغلب الصناديق الاسلاميه في الكويت تحتوي محفظتها على اسهم بيت التمويل الكويتي والخليجي..


وتستطيع الاتصال بهم ومعرفة المزيد عن هذه الصناديق..


هذه نصيحتي ان كنت تنشد الاستثمار الطويل والامن..


اما عن سؤالك وان كنت تريد شراء اسهم من السوق..


اول خطوه هي الذهاب الى الشركه الكويتيه للمقاصه و موقعهم عند البورصه... ومعاك صوره من بطاقتك المدنيه وثلاث دنانير...حتى تحصل على رقم التداول..


والذي من خلاله تبيع وتشتري بالاسهم..


والخطوه الثانيه بعد الحصول على رقم التداول هو الذهاب الى الوسطاء الماليين في البورصه لشراء السهم..


وشراء الاسهم في الكويت في السوق الرسمي يتم على نظام الوحدات..ويرجى الاطلاع على الرابط ادناه لمعرفة الطريقه..


الرابط


واذا لم تملك قيمة الوحده فهناك ما يسمى بسوق الكسور وهو السوق المخصص لكسور الوحدات وتستطيع الشراء منه..


اخيرا ُ ياخوي ايضا ً لزيادة المعلومات تستطيع الذهاب الى هذا المنتدى المتخصص في الاسهم والاوراق الماليه وتقرى فيه حتى تزيد الاستفاده..


الرابط

وبالتوفيق ياخوي..


تحياتي لك,,​

 

[الساعة 6]

افضل استثمار في الوقت الحالي هو استثمارك بنفسك ..

لا يصح ابداً .. ان تدخل سوق الاوراق المالية بدون تعلم اساسيات هذا السوق ..



اما بخصوص دخولك في هذا التوقيت الى السوق " لرخص الاسعار " ، فهذا لا قيمة له ابداً ..

فما هو رخيص اليوم ، ما يدريك الا يكون غداً ارخص !؟



النصيحة الذهبية ، في السوق المنحدر ، الاداء التشغيلي لا يساوي بصلة !

 

[Mariner]

وادي المسك
نقطة نظام
الساعة 6

خلاص خلاص قنعتوني ...



انا بصراحة قريت ان الوليد بن طلال بني ثروته بمبلغ صغير وكان يشتري في الشركات الكبيرة لما تخسر اسهمها وينقعها جم سنة ليمن تعلى ...

بس انا شكو فيه .. خلهم تحت الكاشي ولا أفسفسهم ابرك من احرق قلبي بالبورصه ...


ومشكورين ...

 

[GrandMa]

انا ضد المجازفة وخصوصا حق اللي على معاشه..

بس الافضل بنظري الصناديق الاستثماريه التابعة للبنوك.. ماعليك الا تدش الانترنت كل مده "على حسب الصندوق اللي انت مستثمر فيه" وتجيك على سعره واذا حبيت السعر روح بيعه.. بس المشكلة ما تبيعه على السعر اللي شفته.. لا ينباع على سعر التقييم اليديد..