سؤال وجواب بيوت من خشب وبيوت من كونكريت ..

[Mariner]

لاحظت في الدول الغريبه انهم دائما يبنون بيوتهم من خشب وماعندهم سالفه صب وبناء الاسود ووو الهيكل الاساسي كله من خشب حتى في المناطق الممطرة وسيول وفيضانات وزلزال ..
طبعا باستثناء القصور الكبيرة ..

شلون بيوتهم ما تتأثر .. يعني و لاحظت انها تتم 50 و 60 سنة ما يصير فيها شي ... بينما بيتنا فحدث ولا حرج !! سنتين الا السقف يخر والصبغ متقشع ..

فشلون هالشي ... وليش ما نبني بيوتنا على هالطريقه لانها جدا ارخص .. يعني قصدي بيوت بو 400 متر وتكون دور ولا دور ونص ليش ما تنبني بنفس طريقتهم؟

وما اعتقد انه الخشب راح يتأثر لا بالحر ولا بالغبار ... والرطوبة عدنا مو جايدة الحمد لله ..

هل في اسباب هندسية تمنع هالشي ؟

 

[محايد]

على ماأذكر بسنة 1987 قامت إحدى الشركات (نسيت إسمها) بعرض عدة نماذج مختلفه لبيوت خشبيه بغاية الروعه والجمال والبساطه عرضتها بالجرائد اليوميه على أساس الطلب ، يتم تركيبها بالقسيمه خلال 20 - 25 يوم . بمبلغ بين 25 ألف الى 35 ألف دينار . الذي عرفناه فيما بعد أن البلديه والمطافىء لم يوافقوا على هذه النماذج . وانتهى الموضوع بوقته . ليش ؟؟ لاأدري .

 

[GrandMa]

Mariner

اشلون بيوتهم ما تتاثر؟! ماتشوف بالتلفزيون البيت يطير

بعدين الخشب اتوقع ايمع زهيوية!!

بس لو الايجابيات اكثر من السلبيات ياريت يسمحون للمواطنين يبنون بيوت خشبية لهم تكلفتها رخيصة وبيتك بسرعة يطلع فوق

 

[محبة القرآن]

بسم الله الرحمن الرحيم

الغربيين بيبنوا بيوتهم من الخشب اولا لان عندهم امطار وثلوج بشكل شبه مستمر وغالبا على مدار السنه والخشب بيكون دافئ جدا غير البيوت المبنيه بالاسمنت والحديد وغيرها
وبيكونوا حريصين جدا على ترميم بيوتهم بين الفينه والثانيه ومتى ماظهر لهم فجوه بين الاخشاب سارعوا في تصليحه .​

 

[بومحمد33]

قبل فتره كنت اسولف مع الربع عن نفس الموضوع

الكل كان جوابه ان بيئتنا جدا غير ملائمة لبيوت الخشب.

بس انا اعتقد ان العلم تطور وفي امواد او اصباغ خاصه تحافظ عليه.

المشكله منو يرد رد علمي متوازن على الموضوع او عن تجربه، ماكو.

بيوتنا الحين من كثر الخرسانه والطابوق تقول خايف من 3 اعاصير متحدين مع بعض واحنا حدنا هوى شمال واذا بضيق خلقك يتلفك غبار.

يليت احد يفيدنا

ومشكورين

 

[هيو]

في نظام وسط نوعا ما ... و هو بيوت التركيب ... يعني حديد بيم بدل الخرسانة و اعتقد ان شركة الخالد تبني بهالنظام .. طبعا اسرع و ارخص .. بس مشكلته ان ما تقدر تسوي توسعة مني و الطريج الا عند نفس الشركة او شركات مختصة ....