خــلـك ريـــلاكـــس ... !!!

بدرالمطيور

عضو مخضرم
الحياة أخذت و هات

خلك ريلاكس

إذا واجهتك صعوبات الحياة لأن معناها هات
و أكيد بعدها راح تأخذ و تجيك الأيام الزينه
 

غير البشر

عضو مخضرم
*اذا واجهت انسان ثقيل ودائما يحدثك عن نفسه
خلك ريلاكس

* أذا اشتدت حولك المشاكل والصعوبات بيجي يوم يفرجها ربك
خلك ريلاكس

*اذا وجدت نفسك فى دوامة وزحمة افكار توقف ووركز فقط
وخلك ريلاكس

 

غير البشر

عضو مخضرم
أذا عندك ولد فضولي ويسألك يمة / يبا أحنا عايشين فى الماضي او في المستقبل ؟؟
خلك ريلاكس :confused:

أذا راح معاك البحر وقال لك يمة/ يبا هذا يشبه البحر !!

خلك ريلاكس






 

فاطمة حسين العلي

عضو بلاتيني
لما يكون عندك مراهق وزاعجك في عدم الدراسةواهماله الواجبات وتلاقيه يعس بين اللابتوب والبي بي والطلعات

خلك ريلاكس

واقعد معاه قعدة مراهقين وحاول تفهمه ان لكل شي وقت وانك ماراح تكون موجود علشان تنفعه بعدين
فلازم ينفع نفسه ... اذا سمع كلامك زين على زين
تعفنق وما سمع الحجي ورد لطبايعه .. روح لسوق رامز واشتري كلينكس بخمس دنانير وعطهم له ووقفه على خط الصبيه او الجليعه وخله يبعيهم او تقدر تشكل بين الرقي والطماط واليوسف أفندي وهالأيام الكستنه هم خوش مشروع ... !

مصيبه اذا عجبه المشروع وقالك ابي استمر فيه وأهد المدرسة ..!!!!

. هني لازم تبلغ عليه البلدية علشان يعرف القانون ....!!

على كتر /


امزهلق : ‏اي مرتب ومنمق يعني اذا كان عندك شى قديم ونظفته وصار جنه يديد



 

غير البشر

عضو مخضرم
خلك ريلاكس
والهموم اللى في صدرك هاتها


خلك ريلاكس
وهات عذرك... وغدرك ...وجرحك


خلك ريلاكس
اذا جفن عينك خاصم رمشها


خلك ريلاكس

بعد هذا كله وأبكي ....
 

فاطمة حسين العلي

عضو بلاتيني
اذا انت من النوع الطيب وترافج على النية وتعطي من كل قلبك وتجي من أقصاك ولقيت الغدر من صويحب اعتمدت عليه

خلك ريلاكس ...

المشكلة فيك يا صاحبي ماهي في الناس .. الزمن تغير وما عاد ت الطيبه فعل ممدوح بالعكس أصبحت الطيبه مثال على السذاجة .. لا تتغير لكن حاذر يا وخيتك ولا تعطي سرك لأحد أبد ...

**
*


اذا انت انسان تحب اناقة المرأة وتحب المرأة تتزين وتكون كلاس والمرة الي عندك اقصى لبسها دراعة كودري
وتعاندك في طلبات اقصاها مكياج ولبس عدل

خلك ريلاكس

لا تزهق منها واخذها مشروع تحدي وسو لها make over اي تحويل من هولة لعسوله
طاعتك زين على زين وعجبها الحال
ما عجبها الحال وفسقت وطلعت بطرانه ... مثنى وثلاث ورباع ...
بترجع واهي خوش آدمية


**
*

اذا انت من أسرة التعليم وشايف ان الطلبة عندك ما تستجيب لوجودك ولا لجهدك ومطفرينك
خلك ريلاكس
اترك عنك عصا ملا صالح واسلوب التهديد وجنك تحاجي رفيجك بالسكة ... ببساطة
احترم الطالب يحترمك خصوصا اذا كانوا مراهقين ...
المراهق متى ما اشعلت فتيل الرجولة عنده صدقني بيبدع بشكل انت ما تتوقعه ...عن تجربة

**
*

اذا عندج خالة في البيت اقصد ام الزوج مرة كبيره وتلاقينها حرصيه على أغراضها وتعصب وماترضى على أشياء كثيرة منها الطباخ واللبس والمعاملة ويمكن تتدخل بعلاقتج ويا زوجج او حتى طريقة تربيتج لعيالج ...

خليـــــج ريــــلاكس

الحالة الي عندها ما جت صدفة ولا اهو طبعها بس هذا نقص بثلاث هرمونات تتعرض لها المرأة في الشيخوخة وتبدأ مرحلة العصبية واستنكار الحاضر واستحضار الماضي ويكون التعنيف هو اسلوبها المفضل ..يعني بالكويتي يـــا (جنـّــه اسمج خالــه ) يعني بتعيشين نفس مرحلتها بيوم من الأيام
والمرة الكبيره في البيت بركة ما بعدها بركة ...

**
*

على كتر/
ادنات الدون : ‏بمعني ‏أقل القليل فيقال عن الطفل كثير البكاء حمووودي يبجي على ادنات الدون اي على اقل ‏سبب




 

فاطمة حسين العلي

عضو بلاتيني
اذا قابلت شخص (رجل - امرأة ) ترك عنه الحياء واستعان ببذاءة اللسان واستخدم اشنع العبارات على الملأ وكنت معه في مواجهة

خلك ريلاكس

ابتعد فورا عن مكان تواجده مجرد تواجدك يسئ لأخلاقك الرفيعه .. لأن من ينتهج هذا النهج
سهل جدا أن يستعين بكل لفظ تتعفف منه مسامع الصالحين حتى يطال منك ..
لذا البعد عن هذه النوعية من منتهجي الانحطاط أكبر غنيمة وهي حفظ الذات


**
*


اذا صادفك شهر طلعت عليك اقساط ومخالفات وتجديد جوازات الخدم واقامات واقساط مدارس
واقساط جامعه بالاضافة لقسط البيت ولقيت نفسك بين فكي كماشه

خلك ريلاكس

لا تحاول تسدد الأقساط دفعة واحد يعني قسط 200 دينار سدد منه 150 فيتبقى لك 50 دينار
وهكذا في هذا الشهر العصيب وفي الشهر الثاني حاول قدر الامكان ان تضع استقطاع شهري قسري لك
قدره 20 دينار فقط لاغير وانساهم ...
في يوم ستحتاج هذه 20 التي قد تصبح 2000 او اكثر ...

**
*


اذا واجهت موقف استنفذ اعصابك وانت من النوع الحمقي والي ما تمر على خشمك الذبانة .. على قولتنا

خلك ريلاكس

المثل الي قول لا ينطلك عرج ..ترى صحيح ..

وهنا يقصد فيها ارتفاع الضغط الدموي يعني ما تسوى يرتفع الضغط او السكر او تكون ضحية هالمرضين وانت بعد صغير وشباب ... وحاول تتنفس بهدوء
او اطلع من المكان الي انت فيه يعني لا تسوي نفسك ابو العناتر وتبي تواجه وآخرتك انت الي بتنطق ..
اطلع اوقف على البحر اقعد عشر دقايق شهيق وزفير قوي اليود يدش جسمك وبترتاح ...

**
*


على كتر/

غميضة : كلمة نسائية كويتية تعني وا أسفي ... حسافه غميضة ...

 

keek

عضو بلاتيني


....

إيذا بخاطرك انسان ودك تعرف عليه وهو مايبي إلا فراقك .؟
......
خلك ريلاكس ,


(عادي ناس واجد وكم من الحب طلابه ):)
 

فاطمة حسين العلي

عضو بلاتيني
اذا طحتي على زوجج يكلم أو حتى في انثى ثانية بحياته وفلوسه رايحه عليها كروت ومكالمات والذي منه ...... لا تروحين بيت اهلج وبكشتج سابقتج !!!

خليـــــــج ريــلاكـــس

ابتعدي عن غباء النساء وعنجهيتهم والغرور والغيرة العبيطة الي تهدم بيوت ... لأن الي تطيرينه من ايدج في 12 غيرج يتلـّونه وفق اخر دراسه لابراهيم الفقي لذلك عزيزتي اخذي نفس واهدي وعالجي الموضوع بحكمة ...
ترى الريال الطلاق عنده ببيزة يعني مو فارقه معاه في غيرج وايد والجو الي وياه اولى بلحظات السعاده والحياة الأسرية الي انتي بتهدين كل شي فيها وبتخلين تعبج تستولي عليه وحده يديده بارده مبرده
زوجج عاجل وما يحب الفضايح وانسان محترم اعتبريها نزوة وقعدي تفاهمي وياه عن سبب فراقه لج ودخول انثى ثانية وبالهدوء تقدرين تكسبين احترامه وتسحبين الأولي والتالي يعني شلي قاصره شلي مو عاجبه فيج شلي يبيه في المرأة اهو له مكانة مقدسه عندج والي اهو وكوماري واحد .. وتسجلين لج 10/0 لأنج هني الجمتيـــه بكرم أخلاقج وأدبج وتفهمج الي ماراح يحصله عند اي انثى أخرى ....

زوجج بايعها ومو فارقه وياه فمن له حيلة فليحتال وهني نستخدم الطرق الملتوية والي مو عارفه الخطة تراسلني ع الخاص افهمها شتسوي علشان يرجع ابو عيالها لها ...
وبكلا الحالتين اهي الكسبانة ان طيرها ما يطير ولا يولف على غيرها ....

على كتر/
تفنتق / يعني يأتي بشيء جديد كليا كالاكتشاف فنقول فلان يتفنق او عنده فنتق يديد ...
 

مــيار

عضو بلاتيني
في انثى ثانية بحياته



سؤال من زاوية أخرى ...

شنو ذنبه اذا كانت زوجته ما كانت اختياره ؟ اختيار الاهل ؟ اللي استعجلوا وخافوا على ولدهم

الشاب من الضياع ؟

شنو ذنبه اذا كانت "خفيفة" عقل ؟

شنو ذنبه اذا كانت ماعندها ذوق ...بالمظهر ...بالالفاظ ...بالاختيار ؟

شنو ذنبه ...اذا كان مايحبها ...ب بساطه !!

شنو ذنبه اذا ...كان صبر عليها وحاول يحسن منها ويغير منها ...لكن ماكو أمل ...وفجأه

لقى نفسة مر على زواجه فوق العشر السنوات ولقى نفسه مربوط فيها ...بسبب الأطفال؟

يطلقها ؟ شنو ذنب عياله ؟

كان مفروض يطلقها من الاول ...كان غبي ومدمغ وظن ان فيها " أمل" تكون أنثى !

.
.
ليش تحطين الحق عليه ؟

ليش مايكون الحق عليها ...ولازم تكون أنثى ...قبل لا تغار من الانثيات الاخريات !

وهي اصلا ...مثل ماقلتي انتي ...
اهو له مكانة مقدسه عندج والي اهو وكوماري واحد
....؟

اذا كان قلبه لا يعنيها ...فلم تسأل من سكنه !

.
.

رفله : تعني الخرقاء من النساء التي لا تحسن تصرفا ولا تدبيرا ... :)

 

keek

عضو بلاتيني
إيذا ودك تزوج ثانية ماعليك إلا ان تحطهم بالامر الواقع قول ( انا ملجت على وحده )​

خلك ريلاكس ..​

لانه مراح تروح بعيد مرده ترجع لبيته :D ( بس دير بالك يمكن تنتقم منك )​



....​


إيذا زوجتك كلا تقولك تخاف من اهلك ..​

خلك ريلاكس ..​


اقول اكيد اخاف منهم لانهم اهلي هم راس المال :إستحسان:​

امي لا شافت زولي تهلي :قلب:​

اما الغضي لا شاف زولي يتحلاه:cool:




..............................................................................​
 

فاطمة حسين العلي

عضو بلاتيني
شنو ذنبه ...اذا كان مايحبها ...ب بساطه !!

شنو ذنبه اذا ...كان صبر عليها وحاول يحسن منها ويغير منها ...لكن ماكو أمل ...وفجأه

لقى نفسة مر على زواجه فوق العشر السنوات ولقى نفسه مربوط فيها ...بسبب الأطفال؟

يطلقها ؟ شنو ذنب عياله ؟


ليش تحطين الحق عليه ؟



[/CENTER]

نعم عزيزتي ميار ما تفوهتي به هو عين الصواب

اختلال المنظومة الزواجية عادة تكن من زوج أناني وزوجة انانية

والأناني يرى متطلباته ولا يرى متطلبات غيره بل يعتبرها ملغية او معدومة
لذا من تحدثت عنه الآن تناولته انا في ريلاكس سابقه ....

وهذا الزوج المظلوم والذي حاول قدر استطاعته هضم هذا الزواج الا انه بالنهاية أدى الى قرح نفسية كبيرة واعتلال كبير بصحته العاطفية ولازم سرير الانتظار كثيرا طمعا في دواء ناجع او حى طبيب يعرف كيف يدواي هذا الداء المستعصي اقل لــه

خلك ريــلاكس ...

بالفــم المليــان لديــك كــل الحـــق بــ مثنــى وثــلاث وربـــاع .... والقلب داعيلك ...
من لا يجد التقدير لدى شريك الحياة فلينهي هذه الحياة وليبدأها من جديد مع من يقدر الوجود

على كتر/
نزرني / اي نهرني عن شيء او وبخني بصوت عال ... مثل زفني حاليا
 

فاطمة حسين العلي

عضو بلاتيني
اذا كنت ماشي بشارع مزدحم وحصلت يمك شارع اقل ازدحام ودخلت فيه ... وفجأة لقيت الشارع الي تركته مشى طبيعي وانت انحكرت بزحمة الشارع اليديد

خليك ريلاكس

وتأكد ان الشارع الي انت ماشي فيه بيمشي بكل الأحوال فماله داعي التبتون بين السيارات لأن يمكن هالدقيقة الي تدورها بين السيايير تسببلك حادث غير متوقع ...


**
*


اذا اعترفت لشخص انك تحبه واهو ما بادلك الاعتراف وحب انه ياخذ وقته علشان يحس باللي قلته
خلك ريلاكس
الطبيعي اهو والغير طبيعي انت ... لأن بيحاول يستوعب الي انقال ويقيسه على عدد المواقف .. انت الي عارض حب والحب ما ينعرض ولا ينطلب يجي فجأة لطرفين على استعداد للاعتراف فيه ...

**
*

اذا شفت جماعة يتكلمون انجليزي ويا عربي وانت ضايع بالطوشه ...
خلك ريلاكس ...
واتعلم ثلاث كلمات شكرا ,,من فضلك ,, انا اسف thanks _plz - sorry

على كتر/

انفتق / هو ما شق من الملابس .. فنقول انفتق ...
 

فاطمة حسين العلي

عضو بلاتيني
اذا شفت نفسك متأخر على الدوام ولازم تطلع وطلعت ومسكتك الزحمة وعلى ما خلصت الزحمة طلعت وفجأة طق عندك بنجر .. وعلى ماصفطت على حارة الأمان بغى يشيلك واحد ياي مستن على حارة الأمان...
ودقيت على الونش فشال السياره لأنها يديده فواحد ولد حلال فيش بالونش وطاحت سيارتك بالشارع وفيش فيها الي وراه .... ارجووووك هدي ...

خلك ريلاكس ...

المسألة ومافيها انك منحوس وبجداره ... روح أقرى على نفسك
ومصيبة اذا تأمينك مخلص .. انصحك بحبوب مهدئة لمدة اسبوع
 

لوووح!

عضو بلاتيني
إذا شفت مواضيع اُم بدر العجيبه..لا تستغرب خلك ريلاكس:إستحسان:
و إذا شفت موضوعها مغلق برضو خلك ريلاكس:D
و إذا إكتشفت إن أبا الروس العنزي..أخذ المركز الثاني في فئة ال100وضح..خلك ريلاكس:eek:
و إذا إكتشفت إن المهيلب..المركز الأول لا تستغرب خلك ريلاكس:mad:
و إذا إكتشفت إن الطهيمي الحربي أخذ النخبـــــه فلا تستغرب خلك ريلاكس:cool:
و إذا إكتشفت إن إبن قشعان العتيبي أخذ النخبه في فئة ال100شـِـعـِل..لا تستغرب خلك ريلاكس:cool:
و إذا إكتشفت إن إبن حجنه النفيعي أخذ المركز الأول خلك ريلاكس:إستحسان:
و إذا إكتشفت إن ودي أهايط يعنني جاين من اُم رقيبه و جايـبـن معي علم..خلك ريلاكس:D
و إذا تفاجأت بأن فيه شخص(وسيط)طلع بقيمة بيعة 10 من الإبل ب40000دينار و شاص2011لاتستغرب خلك ريلاكس;)
و إذا قلت لكم إني للحين عايش جو اُم رقيبه لاتستغربون..خلوكم ريلاكس:D
و إذا سمعتوا إن البهايم أغلى من الأوادم..لا تستغربون خلوكم ريلاكس:cool:
و إذا تأخر المطر علينا..لا تستغربون خلوكم ريلاكس:cool:
و إذا شفت إسراف و تبذير في اُم رقيبه لا تستغرب خلك ريلاكس:eek:
و إذا سمعت إن الأمير قال لأحد المشاركين(بالهاتف)قبل إسبوعين لا عاد أشوف وجهك في مهرجان اُم رقيبه..
و إنتبـــه عيني تشوف وسم أباعرك(نياقك)مره ثانيه في المهرجان!
لا تستغرب خلك ريلاكس:cool:
و إذا شفتني مركــّز على مهرجان اُم رقيبه لا تستغرب خلك ريلاكس:eek:
بصراحه شفت شي عجيب غير عن السنوات الماضيه لكن..خلك ريلاكس:cool:
و إذا شفت واحد يقول يا قلب لا تحزن..خلك ريلاكس:cool:
و لنا عوده بمشئة الله..
بس خلوكم ريلاكس..​
 

غير البشر

عضو مخضرم
اذا شفت العجب والحال انعكس

عااااادي خلك ريلاكس


اذا شفت مكامن الشر تزيد عند البعض
خلك ريلاكس


وان احسدوك الناس على ضحكتك خلك ريلاكس بلاهم مايدرون

ان شفت من يحلل الحرام ويحرم الحلال اهني عااااد لاتكون ريلاكس ورد عليه





 

فاطمة حسين العلي

عضو بلاتيني
اذا حاول أي أحد ان يمارس عليك وصاية فكرية أو حتى اقصاء فيما تكتب
خلك ريلاكس
وقل له لك فكرك ولي فكري فلا تقل لي أف ولا أقل لك تبا ...
راح يفهم الباجي


**
*


اذا لقيت نفسك تكتب موضوع ودش عليك واحد عرض ويحاول يقلل من شأنك وشأن قلمك
خلك ريلاكس
رد عليه بأدب جم يحرجه ومن ثما راقبه حتما بتلاقي عليه ثغرة بأحد مواضيعه
ساعتها تقدر ترد له الصاع صاعين .... ووريني شطارتك

**
*


اذا شفت واحد كل مهمته في الحياة الفتنة بين الناس سواء بالوشاية او بالتدليس
خلك ريلاكس
وتكفى اخذه بكورنر ونام فيه ... ولا تنسى تصوره تدري بعد اثبات حاله

**
*

اذا لقيت عندك بالدوام وحده بالدوام جنها فارة طحين تطامر من مكتب لمكتب ومن اذن لأذن
تقلب الناس على بعض واذا عادت أحد لازم تلف علىنص الوزارة علشان يعادون الي معاديتهم

خلك ريلاكس

عطها / عطيها طاف وتجاهل من قلب واذا لزم الأمر
جيبي وياك سم الفيران او حتى مصيادة الفيران وحطولها جبنة جود تركد ...

**
*


على كتر/
كيري ‏ميري : ‏وهو لفظ يقوله القدماء يعنون به اللف والدوران فيقول البعض ‏مثال انا ما عندي كيري ميري يعني انا ما اعرف اللف وادور ولا اعرف الغشمره اعرف ‏الحق وبس


 

السلطاني

عضو مخضرم
* إذا شعرت بفوضى عارمة تملأ المكان .. ورايت نماذج قرارات مضحكة .. ..

خلّك ريلاكس ..

أطلع لمقهى بو صالح وخذ راس سلوم .. .. ونار تحرق حطبهم ..
 

فاطمة حسين العلي

عضو بلاتيني
اذا لقيت عيالك واحد ورى الثاني يطيحون مراضى وحاشك الدور
خلك ريلاكس ...
العدوى مفيدة جدا للعايلة تقربهم من بعض على الأقل الي ما يشوف امه بطرق الخدامة يقدر يشوفها بالطبيب او لمــّأ تعطيه دواه او تقيس حرارته ... وبعد انت يحوشك من الحب جانب ... مصخن وتبي مداراة ... يبيلك ايقونة;)

**
*

اذا صارلك شيء ايجابي مثل زوجتك حامل فراح تلاحظ ان الحوامل كثروا بالديرة وما يصير جدامك الا هالشي
خلك ريلاكس
هالأشياء تشوفها كل يوم بس انت ما كنت منتبه لها لكن لما عشت الحالة قمت تنتبه لها على الناس ..
وهالشي قيس عليه الأشياء السلبية الطلاق , الفراق, المرض, الموت ...
وهذي رحمة من رب العالمين


**
*


على كتر /
سليمة تصكك : جملة تقال للتقليل من شأن الآخر وعادة تقال بين النسوة وتقال لبعضهن البعض او للأبناء
 

فاطمة حسين العلي

عضو بلاتيني
اذا شفت شيء جديد بالديرة بيصير وفي قناة سكوب لازم فجر السعيد تتكلم ....
خلك ريلاكس
لأن فجر لها كلمات او معلومات لا يعرفها الا فجر .. وبصراحة عجيب غريب
وهم خلك ريلاكس

**
*

اذا شفت الكويتيين طايرين صوب الجزيرة ينشرون غسيل الكويت وسوونا جنه بدارفور عادي
خلك ريلاكس
هذي نتيجة خطب استاذة القانون بالاضافة لشرفاء النواب تشرشح الكويت كما ينبغي بالصوت والصورة !!


**
*

اذا شفت التلفونات والدول الشقيقه تنتف الكويت والكويتيين وتدخل سافر من الخارج بشؤون الدولة

خلك ريلاكس

عيالها سمحوا انهم يعرونها ويشيلون عباية الحيا عنها ... فتقبلوا هذا التدخل بابتسامة


**
*



على كتر/
امصين : ‏هذه ‏الكلمة تطلق مجازا على كل ماهو قذر وكريه وخبيث الرائحة يعني الواحد اللى صار له ‏مده مو متسبح او الملابس اللى صار لها مده ما انغسلت انت يا امصين قوم ‏تسبح


 
أعلى