أبقولكم سالفة توريكم مدى التخبط في هالديرة ،،
أنا أعمل في إدارة ،، نفس هالإدارة تقريبا موجودة في كل الوزارات والجهات ولها نفس طبيعة العمل وماقدر أشرح أكثر المهم ،، أحمل شهاد جامعية ،، وأعرف شخص يعمل في جهة ثانية غير وزارتي ويعمل في إدارة نفس الإدارة الي أعمل فيها وطبعا نفس طبيعة العمل الي أعمله حتى الكتب بعد بنفس الطريقة يعني شغلنا "سيم سيم" لا وبعد دوامه أخف وأقصر المهم الفرق بيني وبينه أني أحمل مؤهل جامعي واهو مايحمل مؤهل جامعي ،، وين الغريب؟ الغريب ينصرف له معاش أكثر مني لأن المكان الي اهو فيه له كادر !!!!!!! شرايكم ؟!
هل يعني الحكومة تتعمد تطفشنا من الوزارة وتبدلنا بوافدين علبو أرخص ؟ والا اهو تخبط وتوهان ؟؟والا يبون يحدونا نقط وجيهنا على الناس ندور "واسطات نقل" ويكدسونا بأماكن معينة ونهد الوزارات للوافدين ؟،، والا يبون يقللون عدد الكويتيين حملة الشهادات الجامعية وهذا شيء حتما راح يحصل اذا استمر هالتخبط لأن الطالب لما يخلص الثانوي ويفكر وين يكمل دراسته يشوف انه فقط تخصصات جامعية معدودوة على أصابع اليد فقط اهي اللي لها مستقبل وظيفي اما باقي التخصصات الجامعية فحملة الدبلومات والدورات والمتوسط اما الفرق بينه وبينهم بسيط أو يساوونه أو أعلى منه !!! هل تتوقعون الطلبة لما يشوفون جذي بيدشون جامعة وبيلقون حافز قوي للدراسة والتعب ؟والا يختصرون الوقت والتعب والجهد ويروحون للمعاهد أو حتى مايكملون دراستهم ويقزرونها دورات ؟! ؟
بالذمة مو عيب جامعيين معاشاتهم على ستمية دينار وخردة ؟! ماتحسون انه في خلل لما يصير حملة دبلوم ودورات في بعض الجهات أعلى من الجامعيين ؟
أتمنى أن يتم إنصاف "الفئة المنسية" الجامعيين الإداريين ،، وأن يتم مراعاة طبيعة العمل والشهادة في كل زيادة ،،
أنا بعرض شهادتي الجامعية للبدل ،، أصحاب الدبلومات والدورات منو يبدل ؟! والله ياخسارة التعب والسهر !!!