مفردات بدوية ومعانيها

[Bent Mutair]

صباح الخير :وردة:​

حبيت اطرح هالموضوع المخصص لأبناء
وبنات القبائل فقط!.. بغرض المحافظة على لهجتنا البدوية ولزيادة مخزوني
من الفوكابلري القبلي....يلا نبتدي.​

الوكاد=الأكيد​

عانه=شوفه​

مير= لكن , بس.​

مثال: ودي اروح للطبيب مير اخاف من الأبرة​

كود=يمكن , ربما.​

الشنق=صوبك , مكانك​

مثال: اكل من شنقك​

وغد, ورع , بزر , جاهل= طفل:باكي:​

مرجوج= خبل او مجنون​

مطفوق= متهور ​

مطنوخ= تقال لشخص يعجبك من جميع النواحي يعني كريم وونيس وراعي فزعة​

اونس المرض= اشعر بالألم​

ياعلك العوق= عسى المرض يصيبك​

ياعلك النفاد=عساك تموت!!​

طس=انقلع​

ورا = ليش​

مثال : ورا ما تسكت​

مروح= وتقال لوصف شخص معفن ​

مخنز= وتقال لشخص خسيس ومروح​

مجونس= ابو وجهين , المنافق , المتقلب يوم معاك ويوم عليك​

مهايطي= اللي بس يمدح نفسه عالفاضي وانا سويت وانا فعلت وهو جذوب​

اقشر= الموذي اللي ماوراه الا المشاكل.​

يهرج= يسولف​

هراج= نقال حجي ونمام!!​

الماخوذ= اللي اخذه القوم..وتستخدم لشي ضاع او لا تريد ذكر اسمه​

لفعه= لطمه,صفعه​

الهقوة= الظن​

الدبكه= الركض وفعلها يدبك

مثال : عان فلان جاك يدبك​

يعدي=من العدو ..يركض​

ازهلها=ابشر, خلها علي ولا يهمك..افا عليك بس​

لخه على فمه= صفعه هههههه احبها هالكلمة​

يتبع...:وردة:​

 

[كويتي قديم جداّ]

هاردلك ...نرجو اعادة المحاولة :وردة:

كثير من هذه المفردات مستعملة عند الحضر ..

ولا يختص بها ناس دون غيرهم

​

 

[Bent Mutair]

يرضخ=يضرب,يطق

مثال رضخت الرجال الين كسرت ضلوعه..

يغدي=تجي بمعنيين الأول يضيع من كلمة غدا اي ضاع
والثاني يصبح او يصير..

مثال: غدت فليساتي <<<ضاعت فلوسي
مثال:ادرس اظن تغدي مهندز <<<تصير مهندس.

مبطي=تجي بمعنى من زمان

مثال من مبطي وانا امارس الرياضة<<من زمان وانا امارس الرياضة
المعنى الثاني يكون مبطي عن الربع يعني صار
لي مدة طويلة ماشفتهم..

زقم= اعتقد حنج وفي ناس يقولون يقصد بها
طول الخشم مع كبر البراطم<<<عوذا

مثال: يا لعنبوا هالزقم المروح..

ازريت= تعبت..او عجزت عن عمل شيء

الهناة=وتستخدم لشي ماتعرف اسمه او نسيته

تولم=تجهز, استعد

مثال: منيرة تولمي ترى الأسبوع الجاي عندنا عرس

ليا= الى

صيدي= قصدي

عسالك ماتصيد=عساك ماتربح وتفلح

عيا =رفض

بليه=ذكي وجيد وداهيه.

يورالي=يبدو لي

باللي هي به= مهما كانت النتائج

ماتت نارك = يعني خبل وحظك طايح

يبربر=يهذر

مثال: فلان كله يبربر.

ياكل الخياش= مايدري وين الله حاطه هههههههههههه

يدربي راسه=يمشي بدون هدي ولا هدف

مغر= ماعنده الا شي واحد يسويه بس

مثال: فلان مغر يطابق مع الوراعين هههه

يطابق=بمعنى يركض مثل الخبل بدون هدف..

واتسيلتي اتسيلتاه=مفردة للنساء فقط! وتقال للشكوى والتذمر

واطر جيبي طراه ههههه= يامصيبتاه.<<ياكثر ما اسمعها بدون داعي

رفله= البنت الخبله

دقاقه=بمعنى جسمها نحيل.

الروسا= العنيده

يتبع..

 

[Bent Mutair]

هاردلك ...نرجو اعادة المحاولة :وردة:​

كثير من هذه المفردات مستعملة عند الحضر ..​

ولا يختص بها ناس دون غيرهم​

​

زين شنو اللي مزعلك؟
بعدين ماعمري سمعت حضر عالأقل من الجيل
الحالي يستخدم هالكلمات..
وكما قلت في بداية الموضوع اني ابي الأعضاء البدو
يشاركون عشان اتعلم كلمات جديدة من كافة القبائل
لأني بدوية واحب لهجة البدو ومابي غيرهم يشارك
لأن اللهجات الأخرى ماتهمني

 

[كويتي قديم جداّ]

أبداً .. ماني زعلان !

بل من داوعي سروري..ان أقرأ هذا الموضوع

استمري يا بنت مطير ​

 

[كلمة في فم الوطن]

الله يعطيج العافيه

كلمات بعضها مبطين عنها

الف شكر :وردة:

 

[الرحال]

على طاري لهجات القبائل ---اذكر قصة طريفة

كنت مرة أفسر لأهل المسجد سورة الغاشية وفيها قول الله تعالى ( وإذا العشارعطلت )

والعشار معروفة في اللغة العربية الفصحى وهي النوق الحوامل

ونسيت في الدرس أن أراعي اللهجات الاخرى

وبعد الدرس مسكني واحد من شيبان المسجد وهو ينتمي إلى نفس الشركة --أقصد القبيلة وهي مكوشة على أكثر اهل المسجدومستانسين علي أدرسهم ومن ربعهم

المهم إنه عاتبني وزين ما كفرني ---وقال لي : يا ولدي لو انك مو من العرب ما لمتك لكنك من العرب ---وراك تقول نوق حوامل وبيده عصى أنا قلت الله يستر لا يهفني فيها على راسي

( طبعا هو يقصد ليش ما قلت لقحات )

قلت له يا عمي أنا راعيت إنه في ناس ما تعرف منى اللقحة لازم أوضحلها

قال لا --كان لازم تقول لقحات --وشو حوامل !!

عاد شايب وحبيب ومن اهل المسجد الله يرحمه ما حبيت أعانده قلت له أبشر يا عم ما اعودها

واخذت درس كبير من هالسالفة وصرت أعطي الشيبان على كيفهم واسوي ترجمة للغات الاخرى

 

[الرحال]

قصة أخرى :

مرة في الدوام سمعت واحد من قبيلة أخرى يتطنز على مفردة تقولها قبيلتي مطير
من باب الغشمرة إن شاء الله
وانا ما كنت قاعد معهم بس صوته كان واضح وعالي في الممر

قلت ارد عليه هذا قدام الناس وأعطيه كلمات من كلام قبيلته وهي أحدى القبائل التي أحبهم واحترمهم واضحك عليها مثل ما ضحك على كلام قبيلتي

وبعدين قلت يا ولد اقصر الشر واخزي الشيطان خاصة إن وضعي واحترامي بحمد الله في العمل لا يسمح لي بأن أدخل مهاترات وشد وجذب

مرات يقول لي بعض الناس ليش قبيلة العجمان مثلا تقول وينش --كيفش

فكنت أقول له يا أخي قال تعالى :

( وجعلناكم شعوبا وقبائل لتعارفوا إن اكرمكم عند الله اتقاكم ----)

ومثل ما تبي الناس تحترم لهجتك لازم انت أيضا تحترم لهجات القبائل الأخرى

خاصة إذا علمنا أن لهجة قبيلة العجمان الكرام من أقرب اللهجات للفصحى

إذن لنحترم لهجات بعض

ولنحاول أن نكون مخزون لغوي من لهجات القبائل
انا مطيري أحاول اعرف بعض كلام قبيلة عنزة الكريمة
هذا عنزي يحاول يعرف مفردات مميزة لمطير
على سبيل المثال

 

[Bent Mutair]

تسلم..واذا عندك مفردات مميزة اتمنى
تشاركنا خصوصاً اذا كنت شمالي لأني اعشق لهجات
اهل الشمال خصوصاً شمر ياعليهم لهجة تجيب العافية
العجوز ولا الشايب الشمامرة لا تكلموا ماودك يسكتون من
حلاة اللهجة..

نواصل...

يخمع=يطق ضحيته طق مبرح وخصوصاً بعصا على الرأس

من توالي= بجانب

مثال=شفتي البنت اللي من توالي نورة تراها مدرسة اجتماعيات

ارواح=يلا سرينا

الشنقيط=بمعنى البنطلون هههههههههه
كنت اسمع العجز يقولون يقطع فلانه هي وشنقيطها

اغر جاي=تعال الي

مع الغبشه=بداية الصباح
كنت دايماً اسمع ابوي يقول لأخوي لما يسافر روح مع الغبشه.
وعلقت هالكلمة براسي بدون لا اعرف معناها..من اسبوع بس سألت ابوي
عنها<<<تو الناس

هماج=الماي المالح

عساك في دعثورن مايثور=وتستخدم للدعاء بالشر والهلاك

عساني ما اذوق حرك=يعني عساني ما ابجي عليك(بسبب وفاتك)

الله يطعني عنك=فديتك.,عساها فيني ولا فيك.

مخمج=معفن

راح ماراح جدي=يعني انتهى امره

الدلخ=الخبل

الكمخه=الساذج

فلان امهري=جذاب ونصاب

ساطل او سطول =منحرف ومتمرد

داج=ضايع مايدري وين الله حاطه

يدوج= يتمشى

يتخم=يتمشى في المكان بدون هدف

عندا=وتقال للفتاة الجميلة ذات الرقبة الطويلة

طرقا واطرق=شاب او فتاة جميلة المظهر

اطخم او طخما=شاب وسيم وفتاة جميلة

انزح=ارجع ورا

يافري جيبي فريااه=يافضحي

يتبع..

 

[.. عصآمية *]

حبيت اطرح هالموضوع المخصص لأبناء
وبنات القبائل فقط!

مع اني قبلية بس ماحبيت هالجملة ليش العنصرية ؟

والله لو حضري كاتب هالكلمة و كاتب فقط لعيال السور جان شقيتوا شقوقن ماتخيط

،

شرعاً و مواطنةً هالكلام ما يجوز

،

 

[Bent Mutair]

الله يعطيج العافيه

كلمات بعضها مبطين عنها

الف شكر :وردة:

الله يعافيك ويا ليت
لو تشاركنا ببعض المفردات..رح اسأل شايبك وتعال:وردة:

 

[جمـوح الخيل]

الله موضوع علي كيفي
تسلمين بنت مطير:وردة:

بس عندنا شوي اختلاف مثلاً
عانه=شوفه....حنا نقول راعيله...
ورا = ليش حنا نقول ...ليه أو ليش...
يرضخ= عندنا يلعن حظ الشخص المقابل...
ياكل الخياش= مايدري وين الله حاطه هههههههههههه .....حنا عندنا كلمة يقرن الخنافس ..
رفله= البنت الخبله..........لا حنا عندنا رفله اي ماتنفع بسبع المذاهب يعني ماتسنع شغل البيت..
الشايب الخرفان= نقول فلان طب الفيضه...
​

شكراً بنت مطير:وردة:​

​

​

​

 

[Bent Mutair]

اخوي الرحال
الشايب الله يرحمه صااادق انت الغلطان الله يهداك
وفعلاً هدفي من الموضوع اتعلم لهجات القبائل

 

[Bent Mutair]

مع اني قبلية بس ماحبيت هالجملة ليش العنصرية ؟

والله لو حضري كاتب هالكلمة و كاتب فقط لعيال السور جان شقيتوا شقوقن ماتخيط

،

شرعاً و مواطنةً هالكلام ما يجوز

،

اختي عصامية الموضوع لاهو عنصري
ولا هم يحزنون كل مافي الأمر اني مهتمة بتعلم مفردات بدوية
فقط!! ومابي مفردات من لهجات اخرى..

 

[Bent Mutair]

الله موضوع علي كيفي

تسلمين بنت مطير:وردة:​

بس عندنا شوي اختلاف مثلاً
عانه=شوفه....حنا نقول راعيله...
ورا = ليش حنا نقول ...ليه أو ليش...
يرضخ= عندنا يلعن حظ الشخص المقابل...
ياكل الخياش= مايدري وين الله حاطه هههههههههههه .....حنا عندنا كلمة يقرن الخنافس ..
رفله= البنت الخبله..........لا حنا عندنا رفله اي ماتنفع بسبع المذاهب يعني ماتسنع شغل البيت..
الشايب الخرفان= نقول فلان طب الفيضه...​

شكراً بنت مطير:وردة:​

العفو يا بعد حيي وميتي:قلب:
وعندكم كلمة شنوحك=اشفيك

عاد انا اموت بلهجتكم يا شمر..زيديني من كلامكم الحلو:وردة:

 

[إنفصام]

تبا لك = ضف وجهك

من قاموس سيبوية

ويقال ان سيبوية بدوي

هذا والله اعلم ​

 

[جمـوح الخيل]

وش توجس = بما تحس​

دوشق = فراش​

وش نوحك = ماذا دهاك​

تجودوا = تمسكوا ​

هها = أستعجل​

اخيذة ضحى = داهية​

قبيس = ضباب​

كتام = غبار ​

 

[جمـوح الخيل]

العفو يا بعد حيي وميتي:قلب:
وعندكم كلمة شنوحك=اشفيك

عاد انا اموت بلهجتكم يا شمر..زيديني من كلامكم الحلو:وردة:

تسلمين ياحيي:وردة:​

 

[Bent Mutair]

تبا لك = ضف وجهك ​

من قاموس سيبوية ​

ويقال ان سيبوية بدوي ​

هذا والله اعلم ​

والنعم بالنشمي ماخبرنا عليه شيء يعيبه

 

[Bent Mutair]

وش توجس = بما تحس​

دوشق = فراش​

وش نوحك = ماذا دهاك​

تجودوا = تمسكوا ​

هها = أستعجل​

اخيذة ضحى = داهية​

قبيس = ضباب​

كتام = غبار ​

لهجتكم تهبل تهبل تهبل:قلب:
كلكم حلا ياشمر..
عاد حنا نفسكم نقول دوشق وتجودوا وتوجس...