معانات مواطن كويتي الى متى ؟؟!!

بسم الله الرحمن الرحيم


السلام عليكم ورحمة الله وبركاته





نعم قصة انا شخصيا عايشها ويعلم الله اني ما ازيد فيها شي غير اللي حصل معاي وبس واخليكم

مع هذه القصه :



كنت موظف في وزارة الدفاع بعد ما تخرجت سنة 2000 من دوره عسكريه وبعدها بسنه قررت اتزوج

على شان افرح الوالد والوالده وفعلا هذا اللي حصل لكن كانت زوجتي من فئة البدون ومثل ما

تعرفون الزواج قسمه ونصيب وهذا شي خارج عن ارادة اي انسان وهذا نصيبي ولله الحمد على كل

وبصراحه تزوجت من غير اذن زواج من وزارة الدفاع واللي صار لما رحت للوحده وشرحت الموضوع

لآمر الوحده رد علي وقال هذي فيها عقوبات منها( وقف الراتب او وقف العلاوه الزوجيه ويمكن توصل

للتسريح من شرف الخدمه العسكريه ) كل هذا على شان تزوجة من غير كويتيه ( بدون ) المهم

بعد هذا قال راجع القضاء العسكري وحاول انك تخلص موضوعك من هناك وفعلا رحت للقضاء

العسكري واذكر اني سألت وكيل ضابط عن موضوعي قال احتمال انهم يوقفون علاوة الزوجه

لمدة سنتين بس تحتاج واسطه زينه وانا والله اني لا املك واسطه ولا لي احد بالعسكريه

يساعدني بالموضوع هذا وكنت اسعى بكل طريقه ادور واسطه مافيه باب عضو ما قطيته

وكل واحد يقول خل اوراقك عند المندوب ويتصل فيك واغلب اللي عطيتهم اوراقي ما اتصلوا الا جم

واحد مو مشتهي يساعد يواعدك ويخلف بوعده وانا ما الومهم بصراحه لانه ما وراي مصلحه وانا

عسكري ما اصوت شنو الفايده من مساعدتي ولجأت لله بالدعاء ورحت للدوام طبعا هذا بعد غياب

شهرين تقريبا عن الدوام بعد ماقالي آمر الوحده لا تداوم الا تضبط موضوعك ونان اعتبرتها انها اجازه

منه وماراح يسجل علي غياب ولكن كل هذا طلع محسوب علي غياب توجهت للضابط وقلت

انت قلت لي لا تداوم الا تضبط موضوعك وانا الحين محسوب علي غياب قال انا ما قلت اني عطيتك

اجازه وقال قلت روح حل الموضوع بس المهم الي فهمته منه تبرى من كلامه ورحت للمحاكمه اليوم

الثاني عند آمر اللواء وتحاكمت بسجن بالتوقيف العسكري لمدة اسبوع وبعد ما طلعت تم علي

عقوبة بالمعسكر يوم بعد يوم لمدة شهر يعني انحجز بالمعسكر يوم واطلع للبيت يوم وايقاف الراتب

ولكن سبحان الله الظروف ضدي دايما كانت عندي سياره اقساط تعطلت السياره وبعدها ما قدرت

اداوم لاني بعد ايقاف الراتب وتعطل سيارتي صارت الامور اصعب خصوصا اني ما كنت احتك كثير

بالشباب اللي بالدوام وما كان عندي رقم اي شخص من هالشباب بالعربي مانت امون على احد

الا اللهم شخصين كانو يداومون بالرياضه مو صوب دوامي ويعلم الله اني كنت ملتزم بدوامي لدرجة

داومة سنه من غير اي اجازه لا اداريه ولا سنويه ولكن اللي حصل لي اجبرني على الغياب مره ثانيه

وظروفي كل مالها وتصعب وطال غيابي عن الدوام فتره طويله لا تقل عن ست شهور وانا بدون راتب

والله رزقني بولد وهو من ولادته كان فيه عيب خلقي بالامعاء وقعد ثلاث شهور بالمستشفى ابن

سينااللي زرته فيها بس 5 مرات لاني ما كان عندي سياره والله يعلم بحالتي اني كنت مرات اوقف

على الشارعوأشر لاي سياره بس على شان اروح أ شوف الولد وبعض المرات بتكسي اروح له واقول

عن صحته لزوجتي لاني ما كنت بمرمط بنت الحلال بوقفةالشوارع وزوجتي متحمله الوضع وياي

وتخيلوا اول مولود الله يرزقك فيه بمثل هذي الظروف شنو تسوي صارت الازمه بين امريكا والعراق

سنة 2003 حاولت الالتحاق بوحدتي ولكن كانت الوحده في مكان بعيد مع عدم ذكر المكان وانا ما

عندي سياره فصعبه علي اني التحق وطالت مدة غيابي عن الدوام وبعد انتهاء الازمه تم تسريح عدد

3000 عسكريتقريبا بسبب الغياب او امور اخرى يعني العدد كبير وانا من ضمنهم وبدأت معاناتي بعد

هذا القرار حاولت ارجع وكان الرد بأنه من لم يلتحق بفترة الحرب بوحدته لا يرجع ويكون تسريحه

نهائي بلا رجعه قدمة طلب استرحامطريق خدمة المواطن في وزارة الدفاع موجه للوزير ولم القى

الرد وكان في موظف كلامه حبطني بخصوص الرجعه للدوام الله يسامحه المهم بعدها قطعت الامل

بالرجوع لوظيفتي ورحت على شان اخذ تسريحي وبعد مراجعات تمت لمدة سنه او اكثر طلع

تسريحي وكان علي مبلغ تقريبا 700 دينار لازم ادفعه ولا ما اقدر اخذ التسريح وبعدها انخفض

المبلغ الى 230 دينار تقريبا بعد خصم رصيد اجازاتي اللي ما كنت اخذها والله رزقني بمولود ثاني

ونفس الطريقه ظروف صعبه وحرب نفسيه وصراع داخلي بين الانفاق على الاسره او دفع المبلغ

وكنت كل ما ادبر مبلغ يكون مو كافي فكنت اصرف منه على احتياجات اسرتي وينقص مره ثانيه

و لاني كنت ملزم بالانفاق على اسرتي كنت دايما ابديهم وهذا واضح من حديث الرسول صلى الله

عليه وسلم ( ان خيركم خيركم لاهله ) وبعد فتره كانت فيه منحه اميريه من سمو الامير الراحل الله

يرحمه ويسكنه فسيح جناته دفعت المبلغ المطلوب منها واخذت التسريح بعد معانات طويله جدا

وبعد فتره حاولت اني ارجع للعسكريه عن طريق اعادة ملف خدمتي ولكن كان الجواب اللي تسرح

اثناء العمليات لا يرجع ابدا تكررت مراجعاتي ولكن نفس الكلام اللي ينقال تكرر رحت وقدمت

لديوان الخدمه المدنيه في 2007 شهر ثلاثه والى الان ما نزل اسمي من ضمن المتوظفين

وكنت بالفتره هذي اسعى للتوضيف بأي مكان قطاع خاص او عام وما حصلت على وظيفه

تعينت بمكتب بسوق الكويت وكان راتبي 90 دينار وانا بدون سياره كان كل المبلغ يروح للمواصلات

داومت ثلاث شهور وطلعت لاني ما تحملت الوضع وتوضفت بشركه براتب 300 دينار وكانت الشركه

شغاله من غير ترخيص لحد ما يطلع الترخيص على شان اسجل بدعم العماله قعدت فيها ثلاث

شهور كنت استلف من بقاله لحد ما وصل المبلغ اللي يطالبني فيه راعي البقاله 200 استلمت

راتب شهر بعد شهرين من توظيفي الشهر الاول تحملت المصاريف مني وآخر شهر تحملت

المصاريف مني تركت الوظيفه آخر الشهر الثالث بعد ما طالبت صاحب الشركه بباقي اجري وبعد

سبع شهور عطاني باقي الراتب وبالفتره هذي كان عندي عيالي اربعه راجعت الشئون بعد ما طلعت

من الوظيفه وقدمت ثلاث مرات كتب وكانت دايما ترفض بحجة اني شاب كويتي قادر على العمل

وآخر مره قدمت للشئون كان رد مديرة الرعايه الاسريه منيره الفضلي حتى لو وافقوا اللجنه على انها

تساعدك انا ارفض بس انا راح اعطيك ورقه لبيت الزكاة يساعدونك طلعت من المكتب وحسيت

اني لو اموت اريح لي من الذل هذا وانا الحين عندي خمس اطفال اثنين ثلاثه يدرسون منهم

ويشهد الله اني ما اقدر على مصاريفه وما املك من حطام الدني الا بدل ايجار 150 دينار فقط

وبالمنحه الاخيره لسمو الامير حفظه الله ورعاه اشتريت سياره وسددت دين كان علي

وما بقي من المنحه غير رحمة الله وانا ما كتبت هذا كله لاني محتاج مساعده ولكن لاوضح امر

عانيت منه الى الان و الحل اني احتاج وظيفه فقط لا غير لاني مقدم للديوان من 4 سنين وثلاث

شهور وانا ناطر دوري والله المستعان سبحانه وتعالى


اولادي اعمارهم

9 سنوات

8 سنوات تقريبا

6 سنوات

4 سنوات

1 ونص

مع العلم اسكن في بيت اهلي ومخصصه لي غرفه انا وزوجتي واولادي​
 

كويتنا حلوة

عضو جديد
الله يعينك ..

والله يفتح لك ابواب رزقه وين ما توجهت ..

والله يا الغالي ما عندي لك الا الدعاء لو اعرف احد ما قصرت معاك ..
 

وين نروح

عضو بلاتيني
يا ابن الحلال ما ودي أضيق خلقك أعذارك مو مقبولة كلها ولا فيه أي مبرر للغياب , أنت لا صديق عندك ولا اخو ومنضبط بالدوام وغايب وموضوعك تناقضات كله , وكل من غاب عن أزمة 2003 مايرجع للجيش لو يموت لان الكويت بحاجة كل رجالها ذاك اليوم ومن تغيب عنه فماله أي عذر لو رايح دوامك مشي يمديك وصلت , وبعدين ماشاء الله ماشاء الله ماشاء الله أشوفك بالخلفة مستمر ولا عندك أي أشكال دام ظروفك تعبانة وضبط أمورك بالاول بعدين فكر بالاولاد , أجيب أولاد وما أعرف أصرف عليهم ؟؟؟

موضوعك غريب جدا لكن الله يعينك
 
آنه خابرة إن الديوان يعطي الأولوية في التعيين للمتزوج

و انت لك 4 سنين و شوي مقدم بالديوان و للحين ما توظفت !!

الله المستعان

أسأل الله أن يفرج كربتك و يزيل همك و يفتح عليك أبواب الرزق و الفلاح عاجلا غير آجل

و الله ياجرك على صبرك و يبلغك بعيالك و يجعلهم قرة عين لك و لأمهم و الله يرزقكم برهم

اللهم آمين
 
اذا ضاقت بك الدنيا الجأ لرب الكون هو الوحيد القادر على تفريج كربتك


وعن تجررربه الزم الاستغفار فكل وووووقت تراه كفيل بفتح ابواب الرزق وتفريج الهم


وعليك بالدعااااء لاتيآس من رحمة الله سبحانه

الله يغنيك ويرزقك ويوفقك
 

Chartist

عضو مميز
عزيزي مع احترامي لشخصك الكريم

انت (( بليد)) او كنت بليد وشفاك الله
وسمحلي ان موضوعك فيه من التناقضات


شكرا
 
اشكرك اخوي وين نروح على مشاركتك في معاناتي لكن تقول تناقض وين التناقض في قصه

حقيقيه انا عشتها وبعدين بالنسبه لوضعي واني ليش مستمر بالخلفه في فلسطين

اوضاعهم صعبه ومع هذا تلقاهم اللي عنده عشره واكثر الله يزيدهم ويبارك لهم ومصر كذالك

وغيرهم من الدول كثير ولا تنسى اني انا بالكويت ولله الحمد الاكل متوفر اهل الخير والمحسنين

كثيرين ومو مقصرين وياي بس الحياة مو اكل وبس ابي احس اني كويتي وظيفه وبيت ومعاش

ومصروف للاولاد واحتياجات اسريه وامور كثيره تنقصني انا واسرتي يا خوك اللي ايده بالماي غير اللي ايده بالنار

انا بسألك انت جربت تنام شهر سته وسبعه وثمانيه من غير تكييف وبغرفه انت وست انفاس وياك ؟

هل وقفت على الشارع بعز الصيف تاشر لسياره توصلك مكان معين ؟

واذا كنت متزوج هل جربت انه ولدك او بنتك تتألم جدامك ومو قادر تسوي شي ؟

مرت عليك ايام مافيه حليب عند بنتك او ولدك ؟

مرت عليك مناسبات اعياد او غيرها وانت تتحسر انه عيالك ما عاشو طفولتهم مع باقي اولاد الناس

لو يجي ولدك ويقولك باب ابي ربع بشتري من البقاله وانت ما عندك ولا فلس شنو موقفك ؟!

وبعدين لنفرض اني طلعت من الدوام لاني كثير الغياب هل معناته اموت وبلعنه انا وزوجتي وعيالي

كم شخص غلط بالهلبلد ولا انا بس اللي يغلط ترى مافيه انسان معصوم عن الغلط مع اني ما غلطت

وعيالي شنو ذنبهم : قال تعالى ( المال والبنون زينت الحياة الدنيا ) وما ادري انه الخلفه للغني حلال

والفقير حرام عليه كنت معتقد اني راح اتوظف والامور سهالات لكن مثل ما انت شايف احوال البلد

والتوظيف صار صعب على المواطن قبل المقيم واحسن يجون العيال بهالوقت هذي دنيا ما تدري متى تموت

ولله الحمد اللي مهون علي عيالي الله يخليهم والله لا يحدك على وضعي ومشكورين كل الاخوان اللي يدعون لي

والله يبارك فيكم ويوفقكم الى ما يحب ويرضى
 

محبة القرآن

عضو بلاتيني
بسم الله الرحمن الرحيم ،،

الاخ الكريم اسال الله تعالى ان يفرج همك وينفس كربتك ويفك ضائقتك ويرزقك من حيث لاتحتسب حلالا طيبا مباركا ويبارك لك في زوجتك ويصلح ذريتك ويجعلهم ربي من الهداة المهتدين ،،

اتمنى اخي الكريم ان لاتعتبر زواجك او انجابكم للاولاد من خلال الردود انهم غلطه بالعكس انت عفيت نفسك بالزواج والله يبارك لكم يارب والله سبحانه وتعالى ماخلق احد ونساه حاشا
وهذا كله ابتلاء من الله ،،والله يرزقك الصبر عليه ويعطيك القوه على التحمل ،، وابشر لان الله وعدنا في كتابه العزيز ان بعد العسر يسرا ،،وباذن الله بيفرجها ربك وتتيسر امورك وتطوف هالضيقه على خير وتعوض كل اللي فات ،، واوصيك اخي الكريم بالدعاء بجوف الليل والتضرع بين يدي الله واللجوء والبكاء له ،، والاستغفار ،،واذا عندك بجيبك فلس لاتتردد بالتصدق به وابشر بان الله سيضاعفه لك .
 

بنت القبايل

عضو مميز
الأخوان اللي يعلقون تعليقات باااايخه أقولهم


لا تضحك على غيرك فيعافيه الله ويبتليك


وتذكروا الحديث ( من فرج عن مسلم كربة فرج الله عنه كربه من كرب يوم القيامه )
 

العفار

عضو ذهبي
الله يكون في عونك يا اخوي الحين روح للجيوان لانه الحين يبون عسكر واي اعاده خدمه يقطونهم شرطه عسكريه والعالم ماتبيها وانت روح وكلم لك اي ظابط في الجيوان يمكن يقدر يساعدك ويردك ولاتنسا قيام الليل والدعاء
 

وين نروح

عضو بلاتيني
اشكرك اخوي وين نروح على مشاركتك في معاناتي لكن تقول تناقض وين التناقض في قصه

حقيقيه انا عشتها وبعدين بالنسبه لوضعي واني ليش مستمر بالخلفه في فلسطين

اوضاعهم صعبه ومع هذا تلقاهم اللي عنده عشره واكثر الله يزيدهم ويبارك لهم ومصر كذالك

وغيرهم من الدول كثير ولا تنسى اني انا بالكويت ولله الحمد الاكل متوفر اهل الخير والمحسنين

كثيرين ومو مقصرين وياي بس الحياة مو اكل وبس ابي احس اني كويتي وظيفه وبيت ومعاش

ومصروف للاولاد واحتياجات اسريه وامور كثيره تنقصني انا واسرتي يا خوك اللي ايده بالماي غير اللي ايده بالنار

انا بسألك انت جربت تنام شهر سته وسبعه وثمانيه من غير تكييف وبغرفه انت وست انفاس وياك ؟

هل وقفت على الشارع بعز الصيف تاشر لسياره توصلك مكان معين ؟

واذا كنت متزوج هل جربت انه ولدك او بنتك تتألم جدامك ومو قادر تسوي شي ؟

مرت عليك ايام مافيه حليب عند بنتك او ولدك ؟

مرت عليك مناسبات اعياد او غيرها وانت تتحسر انه عيالك ما عاشو طفولتهم مع باقي اولاد الناس

لو يجي ولدك ويقولك باب ابي ربع بشتري من البقاله وانت ما عندك ولا فلس شنو موقفك ؟!

وبعدين لنفرض اني طلعت من الدوام لاني كثير الغياب هل معناته اموت وبلعنه انا وزوجتي وعيالي

كم شخص غلط بالهلبلد ولا انا بس اللي يغلط ترى مافيه انسان معصوم عن الغلط مع اني ما غلطت

وعيالي شنو ذنبهم : قال تعالى ( المال والبنون زينت الحياة الدنيا ) وما ادري انه الخلفه للغني حلال

والفقير حرام عليه كنت معتقد اني راح اتوظف والامور سهالات لكن مثل ما انت شايف احوال البلد

والتوظيف صار صعب على المواطن قبل المقيم واحسن يجون العيال بهالوقت هذي دنيا ما تدري متى تموت

ولله الحمد اللي مهون علي عيالي الله يخليهم والله لا يحدك على وضعي ومشكورين كل الاخوان اللي يدعون لي

والله يبارك فيكم ويوفقكم الى ما يحب ويرضى


أتمنى تقرأ كلامي عدل أنا سافرت العام لعلاج ( إبني ) الذي يعاني من شلل تام بسبب تلف ( سحايا المخ ) وأنقطعت عن العمل أقل 4 أسابيع ما مددولي الدولة واضطريت أقعد على حسابي لإكمال علاج الولد فقط أقل من 4 أسابيع أنقطع راتبي من شهر 10 سنه 2010 وإلى كتابة هذا الرد لم أستلم راتبي والبنك يطالبني بقسط شهري 400 دينار !!!!
وفي شهر 11 سنه 2010 أصبت أنا كاتب هذا الرد بمرض نادر ( أنسداد الشرايين ) ونمت في المستشفى شهرين واجريت عملية فاشلة بالعدان ولولا الله ثم رجل شريف بالمستشفى العسكري أسمه العقيد الدكتور / سلطان مبارك السلطان الله يطول عمرة ويخليه لأهله جيته أصدق تقرير مستشفى العدان عشان الدوام , شافني وأنا شاب على ويل جير ( كرسي متحرك ) ولما قرأ التقرير قالي بالحرف الواحد وما أنسى كلامه ( أنت لازم تسافر برى ) المرض هذا خطير وأسمه ( بيرجر ديسيس ) خلال مدة أقصاها سنتين تتآكل القدم وتتفتت بدون لا أشعر فيها , وسافرت بفضلة الله تعالى ثم فضله والله ورب الكعبة ما أعرفه وأول مره أشوفه لأني كنت مؤمن بالله وما تركت لحظه ما دعيت الله أنه يشفيني عشان أهتم بأبني المريض والله يعين أمه ( بدال معاق صاروا معاقان ) وعملت 8 عمليات لتوصيل شريان جديد من البطن إلى القدم !!!

ولا بنك يرحم ولا دوام يرحم وإلى الآن لم أستلم راتب , تقولي كيف تدفع القسط أقولك بدل الأجار دايركت للبنك وإعانه إبني 277 دينار أخذ منها 100 وأخواني ما يقصرون وكذا واحد من الربع عارفين وضعي لكني ما سمحت لنفسي آخذ من أحد فيهم لأن أخواني فيهم الخير والبركة .

ياخوي والله أني ما تطنزت عليك لكن كويتي أنت يعني لو أداحم الوزارات والأعضاء يومياً يارجل لو أضطر أروح مجلس الأمة أراسل الجرايد ما أسكت أن شفت إني مظلوم أو حقي رايح ...
 
أعلى