بابا كل نفرات محطة بنغلا... وأنا هندو ! .

بابا كل نفرات محطة بنغلا... وأنا هندو
----------------------------------
إذا ماتستحي سوي اللي تبي قالها الشايب ثم اضاف قائلا: ارحب بكم من جديد بديوانكم وفر القهوة يابابو خل الجميع يشرب علشان يصحصحون حتى يسمعون هرجتي للاخير , قال الرجل : حنا من متى مانسمع لك كلام? انت كلامك مدرسة ياعود ولنا الفخر ان نكون تلاميذاً فيها, صوت من الجميع اي... اي والله كلامك لايشق له غبار . قال الشايب : اتركوا عنكم التطبيل والكلام اللي ماخوذ خيره , قال الخبير : اعوذ بالله ياحج انت علم من اعلام هذي الديوانية ومش بس كدا , دنا واعوذ بالله من كلمة انا سامع ان الحته بيشكروا فيك , قال الشايب وش حتته الله يهديك كل هالشيب وهالكبر صار حتة , قال الخبير : ابسلتلي سوري ياحج كان قصدي الفريج بتاعكم , ان كان جذا انت مسموح يالله المايك معاي اسمعوا هالحادثة اللي حصلتلي بمحطة البنزين اليوم مثل مانتم عارفين ان بعضها حصل له تطوير وانبااااااع كاستثمار, قال المعاق خطوة جيدة من الحكومة لتطوير هالمرفق الحيوي بإدخال فكر جديد.
واش فكره إلا صار العكس الخدمة انتكست الى الاسوأ يادافع البلاء كل ماجيت للمحطة لقيتها زحمة على كم شيشة. قال الشاب : رح للفاضية , الفاضية مسكرة ببرميل وحجتهم انها عطلانة وياسبحان الله كل ماجيها عطلانة.
صوت بالديوانية مؤيدا لكلام الشايب تبين انه يخص للقهوجي بابو كلام بابا وازد مزبوط , شكرا لك لمداخلتك بتأيدي ولهذا صب لروحك استكانة شاي ثانية وياليت الامر وقف على تسكير بعض الشيش إلا , قال المعوق وش إلاته هو في شي غيرها , فيه... وفيه... وفيه بعد ما حط الهوز بخزان البانزين حقتي قصدي حق السيارة لاني اعرف نوايا البعض من غير اهل الديوانية .. صوت اتق الله ياعود بهالكلام.
اضحك ماتبوني اضحك المهم العامل حط بوزه ببوزي وقال كل نفرات داكل مهطة بنغلادش انا من هند , قلت له الله كريم المهم خلاص من التعبية وبعد الحساب تبقى 100 فلس ماردها وقال انا يبي ياكل خليتها ومشيت , قال الرجل : هذا مثل اللي صارلي , وشوي واللا كل اهل الديوانية صايرلهم الموضوع نفسه اللي عشرين واللي خمسين واللى ربع, عندها قال الخبير والله دي خوش شغلانة هو الواحد ليه بيتعب نفسه وعامل نفسه خبير واخر الشهر على مافيش دا الشغل واللا بلاش ماتخلونا نسيب الديوانية ونشتغل بالبانزينة دي مكاسبها مية مية ولا حتى الفراخ بالجمعية اشربوها دي من اول تخصيصة ولسا الباقي اعظم واكبر وادي دقني إذا ماطق فيكم عرق من القهر... ياناس ياهوووه عملية التخصيص لازم يكون معاها خدمة افضل من الاول بس الظاهر ان الناس دي عارفة لحضراتكم لانكم ناس ماعندكمش إلا قولة الله لايغير علينا اشربوها بقى واقفل الستار على جلسة النهار دي ياشيخ زغلول ربنا يخليك... وياسبحان الله جن الشيخ زغلول يسمعه لانه رفع على مسامعنا اذان صلاة الظهر .
 
أعلى