حال المتقاعد وحال رئيس الوزراء

فهيدااان

عضو ذهبي
الصبح الساعه 6
اقعد واتعوذ من الشيطان واتوضا واصلي .
في بيتي المتشرم من برا ومن داخل .
طبعا لايروح بالكم ودي مثل هالشباب اللي كل شوي يتسبح . ياخذ شاور بلهجة الشباب .
واتريق .. تحطلي الخدامه ...ها مو العجوز ..... الخدامه طبعا في كويتيه هالحين تخدم رجلها !!!
المهم تحطلي جبنة مالك مثلثه وكوب حليب سفتي من التموين وخبزتين ! وحده أكل فيها الجبن وحده اغمس فيها ..
والرجال اللي خبركم الله واعلم فيه . وفي صلاته .
بالقصر اللي بجنيف .
ما ادري متى يقعد
المهم البوفيه قدامه مفتوح
والقهوه الفرنسيه
والخدم اللي يفتحون النفس
والاتصلات والعزايم من اكبرها واسمنها
وامور الديره يسمع عنها و لا له شغل فيها !!
ويروق باله ويستمتع بالصبح وبالجو اللي على كيفك .
وياكل من الكاكاو
وانا الصبح اودي بنتي للجامعه كورس صيفي وارجع للديوانيه .
اقعد اعمر زقاير واتقهوا واطالع قناة العربيه وشخبارها .
والرجال اللي خبركم يكركر بالتلفون للظهر
ويتغدى من البوفيه ما لذا وطاب ويتقهوا
وانا ارجع اتغدا اليا جبت البنت
اكل من دجاج الهلال واقيل
واللي خبري خبركم
يتغدا ويتمشى للعصر بهالبراد والجو اللطيف والنسناس
طبعا مشي . هالجو يرد الروح والهبوب اللي على كيف كيفك
ويسير على مرزوق الغانم يشوف شنهي علومه واش عنده وياكل من الكاكاو !
وانا العصر اذا اذن صليت وتقهويت من قهوة النسره ! هجيت على الكامري .
اول ما اطلع من البيت تاكلني اللواهيب والسموم
رحت ادور هل الحلال والا اهل السكاريب .
واليا اذن المغرب جتني رساله طلبات الجمعيه كلها اكل لا يغني و لا يسمن من جوع
شبس وبريد وككاو ويقولون البيت فاظي منه وجوعانين .
والرجال اللي خبري خبركم
المغرب دق البوغاتي سلف بعد مالحس توايرها الغسال
وراح يتمشى على الكورنيش وياخذ جوله يشوف المناظر اللي تفتح النفس
شلال على يمينه ونهر على يساره وياكل من الكاكاو !
وانا مسكت الدائري السابع
من صباح الناصر للصباحيه
لا جبل على يميني و لا ظلع يساري .
بس شاحنات وعربانات
والرجال اللي خبري خبركم
اليا جت الساعه تسع معزوم عند عمدة المدينه بهالحفله يضحك ويسولف مع رجال الاعمال وياكل من الكاكاو !
وانا قعدت في ديوانية ميموني صفر العيوني كلها اعزمه وارشده ودياحين وبني هاجر ربع دلهي
وعجمان جعلني افديك
واعنزتك اللي تسمي البصل تفاح
نلعب بلوت وخذها ذقها
وبالليل الي خبري خبركم
ينام على سريرن على كيفك كله ريش نعام !
وانا اذا تأخرت حطولي دوشق بالديوانيه !!
 
هههههههههههههههههههههههههههههه
والله انك جبتها ولكن بنكة بدوية
لا هنت يا كحيلان وعليك باللوت
(لا ترمي الاكة تري عشرتي تك)
 

ابو بدير

عضو فعال
الله يعوّضنـــا ... بــــ الدّايمة


صباح الخير فهيدان

وشرح الله صدرك مثل ماامتعتنا بهالسالفة
بس
تعتقد اللي خبري خبرك
يعرف ... الدوشق;)
 

العديم

عضو فعال
وقبل لاتمغط بالدوشق تفر على الغرف والصالات تطفي الليت

يسعد لي صباحك

اللهم لا عيش الا عيش الاخره
 

فهد الرشيدي

عضو مخضرم
اتريق .. تحطلي الخدامه ...ها مو العجوز ..... الخدامه طبعا في كويتيه هالحين تخدم رجلها !!!
المهم تحطلي جبنة مالك مثلثه وكوب حليب سفتي من التموين وخبزتين ! وحده أكل فيها الجبن وحده اغمس فيها

هههههههههه يا زين سوالفك فهيدان عفويه حدها :)

شكرا للموضوع يالغالي

 
أعلى