وفد القبيضه

فهيدااان

عضو ذهبي
حلمت القايله حلم !!
حلمت ان وفد صغير من القبيضه طلب يشكي حاله عند رئيس الوزراء!
وقابلهم الرجال واحسن استقبالهم طبعا ! كريم والكريم الله .
وقلطهم بالمجلس !
واول شي قدم لهم (على بالكم القدوع ) نهي يا عزيزي
قدم لهم (الشوكلاطه) الشوكلاته السويسريه !!
عاد الرئيس ذرب وعلى باله انهم يعرفونها ! ما يدري ان بعضم ما صارله مده يعرفها !
والا قبل ما يعرفون الا كتكات ابو اصبعين !! الله يرحم الحال بس .
والبعض الاخر ما عرفها الا عنده !
بس في واحد من القبيضه (عويد ) خالص شايب ماله اقرن طايحه السنون بس يمصمصها خايف من الرئيس يشوفه ! ويقوم يزرطها زرط !
المهم وعقبها جت القهوه اللي عاد تسكت ! ما نقدر نتكلم فيها !
ومد الفنجال القهوجي اللي عليه شعار حبيبتنا الكويت !
المهم الرجاجيل ما يبون الشوكلاطه و لا يبون القهوه ! جايين يبون السلامه !
تكلم كبير السن الشويب !
يا طويل العمر
تكفى يالعشير تكفى انا قلت تكفى و لا تردني !
والله ما عاد لنا وجه عند الجماعه و لا عند الورعان !
و لا عاد اقدر اخلص حتى مخالفة ولا حتى اقدر اقدم موعد بمستشفى العدان !
تكفى ضبط السالفه ! تكفى لا تخلينا يالعشير !
قال الثاني
يا طويل العمر تكفى لا تخلينا في المهمهيه ضايعين !
انت ما قصرت وياي دايمن توقعلي لامانع وبيض الله وجهك !
وانا وقفت معاك الاستجواب اللي فات !
والله يا ربعي ما يخلوني انهم لاذوني اذية العالمين ! هذيج(س) المره دشو ديوانيتي !
هالمره والله اعلم يبون يحذفوني بالباض (البيض) .
نبيك بس هالمره وقف معنا !
قال الثالث
يا شيخ وايد ناس يتحجون ! وانا صوطي انبح من كثر ما ارد عليهم ! وانا اعتقد ما راح انزل المجلس الياي ! لان ما راح يعطوني اصواط !
نبيك تستر على الموضوع وايد احرجني ! اشكثر ادافع عنك في اصكوب ! بس مره وحد وقف معانا ! ولسان حاله يقول انا لو قاعد بالحسينيه ويايب الشيشه وقاعد مو ابركلي ! جان اخذ الخمس و لا احد يعور راسي وصوطي ما ينبح !
قال الرابع
اني طالبك يا طويل العمر
قدني وقفت معاكم وقد انك بعد ماقصرت معي انا وخي وحطيته مدير بالنفط !!
وتكفى اني طالبك وهات خشمك فديته احبه !
حكومتك ذي ما شفت فيها عيب قد ان كل بيهم يخلصون معاملاتي ! والله ان تدبسنا اني مالي وجه عند ربعي المحلف و لا اقدر اقول حق اي سكرتيره كيف حالش وشلونش !
لا تخلينا فديتك وفديت خشمك !
قالت الخامسه
شو يا شيخ يبعتلك !
الامور لكبيرا ابتزغر عندك ! شو تكرم عينك !
مرئها هالمره ! ملينا من حكي الزعران ! طفشونا يبعتلهم حما ان شاءالله !
مرئها على شاني وعلى شان الختياريه هدول ! و يئئئئئئئئئئئئئئئئئئئئئئئئا
شو يصطفلو الزعران واللي بعتهم !! ويئئئئئئئئئئئئئئئئئئئئئئئئئئئئئئئئئئئئئئا
مرئها تئبرني هالشنبات
قال السادس
يا طويل العمر (الهنا) الفلوس ابك ابتلشنا فيها بلشه
ابك لاتخلينا !! انا اكلو وجهي حتى شعار القلطه ما سلمت منهم ! ابك مغير يذموني !
قبل انا حوت وهاللحين والله اني جني اللي يسمونه ذ زوري !
ابك بس قاعدن فالبيت ما عندي الا الاقط بس اغمسه بالشاهي !
من عقب ما كنت افتر فر في مجمع الوزارات !
تكفى لا تخلينا
عاد الاخ
يقول واللي جيت ابي اكحلها عميتها !!
الحين انا ابتلشت !! بين القبيضه والحيتان !
القبس والوطني ما تنفع معاهم 25 مليون ! هذول يسمونها حتاحيت !!
هذول ما يسكتهم الا مليارات !! بس منين اييب
اقول يا جماعه يصير خير ان شاءالله انا ابي اروح جنيف واييكم وانتفاهم بعدين !!
اي خلص الحلم
قعدت وتعوذت من الشيطان وصيلت
وقلت
السلام ورحمة الله على الجميع ... من حسن نيه ومن صدرن وسيع .
 

ملك القروض

عضو بلاتيني
اللهم لاتبلانه واللهم لاشماته ...حلم مسرحي مزري مضحك ومبكي بفاصل سياسي بنكهة الإبداع ....شكراً فهيدان ...عمااار ياااوطن
 

بدوي ذرب

عضو بلاتيني
مدام حلم فهيدان حلمه بالقايله مصيرهم مصير حمار القايله
واسمح لي اصك علي النهام لتفسير الاحلام واترجمه
العشير نائب عازمي يدعي مخلد
واخو المدير النائب القدوة شكلا العدوة مضمونا
وابو الخمس القلاب القلاف
والنائبه العما بالبها رولا
والحوت ابو الاقط والصحيح مضير هو سعدون حماد
باقي ابو حرف السين انت ادري به ؟؟؟
 

فهيدااان

عضو ذهبي
مدام حلم فهيدان حلمه بالقايله مصيرهم مصير حمار القايله
واسمح لي اصك علي النهام لتفسير الاحلام واترجمه
العشير نائب عازمي يدعي مخلد
واخو المدير النائب القدوة شكلا العدوة مضمونا
وابو الخمس القلاب القلاف
والنائبه العما بالبها رولا
والحوت ابو الاقط والصحيح مضير هو سعدون حماد
باقي ابو حرف السين انت ادري به ؟؟؟

جبتها يا الذرب :إستحسان:
 

بوصالح 777

عضو ذهبي
هههههههههههه اما سالفة ( الباض) قويه
الله يعطيك الصحه والعافيه مثل ماضحكتنا
ليش مادقيت على النهام يفسر لك الحلم
 

AlBadel

عضو مخضرم
أسقاطات عجيبه سوبتها يافهيدااااان .... هذا سناريو ومخرج للقبيضه
أكيد شايف شي مو شايفينه
عموما لاهنت ويعلهم من الحال وأردي



images

نقـولها للأمـــــــه وللتــــاريخ إلا الرمــــــــز والزعــــــــيم ......
أحــــــــمد الســـــــــعدون
( الشــــــبكة اللبــــــرااالية الكـــــــويتية )
 
حسبي الله عليهم ..جان حتى بالحلم مو خلين خلق الله تهنى بنومها ...



ابكم هذيلا ما ينهدون ... هد الله حيل كل ظالم ومرتشي وكل متلون نصاب بياع لديرته
 
احلامك يافهيدان كفلق الصبح واقعه ماتبى تفسير ؟
الا على فكره حلمك ناقص ليش ماحلمت بالوزير القبيض والا هذا يبيله حلم بروحه حلم خصوصى ؟
 
أعلى