حوارات جدتي منيرة ... والرئيس الإصلاحي !

fahad alajmi

عضو فعال
حوارات جدتي منيرة ... والرئيس الإصلاحي ! (1)

جدتى منيره صبيه من صبايا العجمان (عمرها بس 75 سنه ) التى يتمتعن بعناد وقوة مراس رهيبة جدا ولديها فراسه لا تخيب ابدا ... المهم أمي منيرة
كل ماشافتني ماسك الكمبيوتر قالت لي .. ياوليدي شنو تسوى ؟ قلت أكتب قالت ليش أنت مو مخلص دراسه من زمان ؟ قلت بلى قالت خلاص خل الدراسه لعيالك وسولف معاى يا وليدي ؟

قلت حاضر بس أخلص هالموضوع اللي ودى أنشره بالمنتدى وبعدين أنا بخدمتك طال عمرج ...
قالت شنو يعنى المنتدى قلت لها يعنى مكان يلتقون فيه الناس من كل الاجناس ويسولفون بأى شىء يبونه ...قالت يعنى ديوانية رجاجيل قلت لا
هو مكان مختلط للرجال والنساء .. قالت عندنا بالكويت قلت ايه قالت وين المطاوعه عنكم ؟ قلت لها يمه منيره معانا مطاوعه موجودين ..قالت ما صدق... قلت لازم تصدقين الزمن تغير طال عمرج ! قالت والله يا أمك كل شىء يصير بهذا الزمان الأغبر !

قالت طيب هالحريم اللي معكم متحشمات والا مثل حقات التلفزيون قلت لا متحشمات ولابسات بوشية بعد ! قالت زين الله يبشرك بالخير !

قالت طيب وشنو السالفه اللي تبي تقولها لهم اليوم يا وليدي .. قلت لها اشرايك تشاركين معنا يمه ! قالت سود الله وجهك تبينى اتكشف قدام الاغراب علشان اسولف ... الله عساني البكم ولا يجي ذاك اليوم ... أفا ياوليدي وين غاريتك على أمك منيره !

قلت يا يمه احسن ما في هالمنتدى ان ما فيه احد يشوف احد ولا احد يعرف اسم أحد .. يعنى خرمس والساري أعمى ... ضحكت لين بانت بقايا سنونها
وقالت أشوى ... لا صار جذيه أبشر بسوالف أمك منيره أنت وربعك قلت بس بشرط تكونين سياسيه قالت ليش أنا طايحه من عينك ... أنا لو رئيسه للحكومه بدال (..........) كان سويت اللي ما يتسوا

قلت خلاص ترى راح أقول لربعي قالت توكل على الله من باجر بتشوفون اللي يسركم ... وهالحين يا أمك أسمح لي با أروح أقدع وأخذ لي فنجال قهوة ... وأنا عند وعدي ... عاد أنتم بالمنتدى تحملوا شيخة الصبايا أمى منيره وزهبوا لها الاسئله ... وللحديث بقيه
 
التعديل الأخير بواسطة المشرف:

السلطاني

عضو مخضرم
في إنتظار سوالف وحكايات أمنا ( منيرة ).....

أتصور أنها سوف تكون أفضل من حكي بعض الرياجيل......


مترقبين....
 

bye

عضو فعال
عسى الله يخليها لكم ان شاءالله
وخاصة ان سوالف الكبار تكون عفويه بطبيعتهم
بس اتمنى منك يا خوي لو تشيل وصفها لرئيس الوزراء
هذي امنيه عليك ماهي طلب ولا امر
وبانظار امي منيره
 

fahad alajmi

عضو فعال
عسى الله يخليها لكم ان شاءالله
وخاصة ان سوالف الكبار تكون عفويه بطبيعتهم
بس اتمنى منك يا خوي لو تشيل وصفها لرئيس الوزراء
هذي امنيه عليك ماهي طلب ولا امر
وبانظار امي منيره

حياك الله bye

طلباتك أوامر ... تفاعلوا معاك المشرفين على طول ... يبدو أن عروقك بالماي بالمنتدى ..

وحتى الرئيس سره باتع بعد !

المهم لا تروح عيد خلك متابعنا
 

fahad alajmi

عضو فعال
حوارات جدتي منيرة ... والرئيس الإصلاحي ! (2)

حوارات جدتي منيرة ... والرئيس الإصلاحي ! (2)
صبحكم الله بالخير عيالي وبناتي

يمكن بعضكم يقول شنو تبي أمنا منيرة بالسياسه .. وليش على أولها تنطحت لرئيس الحكومه مره وحده ... مو متعودين على امهاتنا يتكلمون بهذى الأمور..

واللي يقول جذيه معاه حق بصراحه ... لكن وأخ من لكن هذي .. الأسباب بصراحه شخصيه تتعلق فينى أنا

وبعد هم فيني حره من سوايا هالحكومه ورئيسها في الكويت وأهلها

أنا أعرف أنه هالرئيس نظيف وطيب ويبي الخير للديره ... بس مو قادر يسوي اللي بباله ! مع أنه شيخ ومتعلم

وكل الناس وقفت معاه واذا مو الكل أغلب الناس على الأقل ...بس هو بصراحه الباين شوفه على قده يبيله نظارة

أو دربيل يمكن والا معقوله مو قادر يشوف شنو تبي هالديره شنو ناقصه فلوس وايد وشعب طيب وأغلبه بسن

الشباب ومتعلمين ومع هذا الديره من نازل في نازل ليش ؟

والمثل شيقول العزائم معها غنائم لكن هالرئيس يمكن ما يعرف شنو معنى هالمثل ... لذلك شغله باهت ونتائجه

دائما عكسيه ... وربعه اللي حاطهم معاه وزراء مابي أقول كلهم يمكن أغلبهم أقل ما يقال عنهم المترديه و

النطيحه ومن جار عليه الزمن ... حاقدين على الناس وحوبة الناس ودعواتها عليهم هى اللي جايبتهم كتاف !

أنتو من صجكم أحد يناشب الفقير في لقمته وممكن ربي يوفق شغله مستحيل أبدا أبدا ...

المهم ما علينا خل أقول لكم شنو أسبابي الشخصيه هالحين والحره نقولها في المرات الجايه ...

هالحين أنا من توفى زوجي أخذ راتبه من التأمينات صج الراتب ما يكفى لكن الحمد لله العوض ولا القطيعه

وهم العيال مو مقصريين وياربي لك الحمد .. قالوا فيه زياده برواتبكم عقب ما شبت الاسعار نار قلنا مشكورين

يا فرحه ما تمت ما نزل لنا شىء من التأمينات ليش ما أدري ؟ نسأل التأمينات وماكو جواب مقنع ؟ ايه مقيوله

اللي ايديه بالماي مو مثل اللي ايديه بالنار؟ لو هالرئيس يأخذ راتبه كل شهر مثلنا من التأمينات كان عرف يحس

فينا ؟ ب ما ألومه هو ما يأكل الا حلاو سويسري علشان جذيه ما يعرف طعم المرار بحلجه ابد !

علشان جذيه أنا زعلانه من الرئيس وحكومته وأقول لهم فارجونا نبي حكومه تحس فينا وبهمومنا ومطالبنا

م حكومه تحس بحاجة اللي وقفوا ضدنا يوم الصجيه يوم الغزو وبعضهم حط اعلانات بجرايدهم بكل وقاحه

( مطلوب خادمة كويتية ) هذى حكومه ما تصلح يا عيالي ولا ترقع ....

المهم هالحين تعبت وصدع رأسي أبي أروح أتقهوى ونسولف بعدين

ربي يحفظكم ويحفظ هالديرة وأميرها قولو أمين
 

fahad alajmi

عضو فعال
حوارات جدتي منيرة ... والرئيس الإصلاحي ! (3)

حوارات جدتي منيرة ... والرئيس الإصلاحي ! (3)

مسلم يستاهل... أحسن من ولدنا !

مساكم الله بالخير عيالي وبناتي

زارتني أمس جارتي أم سعد وكانت متضايقه حيل وتمتم بكلام ما فهمته

قلت لها شفيج يا أم سعد قالت والله محتره من جماعتى واهلي قلت أفا ليش

الله لا يفرقكم شفيكم قالت تصدقين يبون يسقطون كحيلان طير شلوى !

قلت من اللي يبي يسقطه قالت ربعي المطران والسبه أنه بعض الشيوخ

شابين عليهم لازم يحرجونه علشان يدخل معاهم انتخابات فرعيه وهو

رافض هالشىء اهو حر كيفه مولازم يدخل فرعي الناس تبيه من قبيلته

ومن باقي الناس بدو وحضر ومن كل الاجناس ... قلت بس منو كحيلان

هذا ؟ قالت أفا يا منيرة ما تعرفين مسلم البراك قلت بلى وستين نعم فيه و

في أهله ... أعرفه وأعرف أهله... عزالله أنه أحسن من ولدنا بالمجلس

اللي وقف ضد الضعوف من أهل الكويت وقف ضد عيالنا وبناتنا اللي

ذبحتهم البنوك وبنى المجمعات والعمارات وهو يوم دخل المجلس ما

عنده الا الدجه ! يكفى مسلم أنه ما أحد قدر يتكلم عنه أو عن ذمته !

ومطير يا أم سعد مستحيل تضحى بفحل مثل مسلم البراك لا تخافين

وباقي أهل المنطقه كلهم راح يعطونه الصوت من غير منه ربي يوفق
كل واحد فيه خير لديرته وللناس ....

عقب سوالفنا أرتاحت أم سعد و أسفهل خاطرها قالت وين القدوع عطيني

فنجال قلت أطلبي عزج هذا فنجالك وعقبال فنجال مسلم بالمجلس يوم ينجح

قامت تلولش أم سعد ونذرت تذبح قعود وتوزعه لوجه الله تعالي ساعتها

اليوم خليت الرئيس اللي يسمونه اصلاحي علشان خاطر أم سعد اللي

سوالفها أحسن من سوالف بعض وزراء حكومه الرئيس اللي مالهم لزمه لا

في سوق الرجال ولا سوق المال .... دربك خضر يا مسلم

وللسوالف بقيه.....

 
أعلى