سؤال وجواب دعمني و نكر ! ، شنو الاجرائات بالمخفر و التأمين الشامل ؟

al3shg

عضو جديد
السلام عليكم و رحمة الله و بركاته .

اخواني .. انا مالي خبره بسوالف الحوادث و الاجرائات .

بكل بساطه عند الاشاره ، كنت واقفه بالحاره " وسط " و بلف يسار و طاقه الاشاره .
و في واحد بالحاره " اليسار " بيكمل سيده ، ف دش بسيارتي

اللي صار الدعاميه تبطلت و حك بالصبغ و الرنقات .
و هالشي صار بوسط التقاطع . و الحمدلله على كل حال ..

فـ رحنا للمخفر سوو الاوراق و قالوا تعالوا الصبح للمحقق .
رحنا من باجر للمحققه قلت شلون صار الحادث بالضبط و بالتفاصيل
و اللي داعمني " نكر و جذب " كل شي و قال انه اهو واقف بالحاره وسط و انا واقفه يمين و بلف يسار !!

بالنهايه قالت المحققه كلكم غلطانين !! و الاهم انه الشارع اللي فيه ما يصير نلف من الوسط لليسار !
و بحولكم للخبير الفني !

الحين شنو علي بالضبط ؟ ، سيارتي تأمين شامل من الوكاله " شركة الخليج للتأمين "
و شلون على التأمين ؟ ، يصلحونها ؟ و اعطيهم خبر او بعد ما اخذ ورقة المخفر .. ؟

و مابي حقي يروح بكل بساطه ، لانه سيارتي ما كلمت السنه و بمبلغ ..
و الاخ سيارته موديل قديم و زين يوصل سعرها 2000 دينار و مدعومه للراس !

ياليت تفيدوني بكل شي ..
 
اول شي الحمدلله على سلامتك وثاني مره اذا احد لف عليك او مسك بريك بوجهك بدون سبب صفطه يمين وعطه المقسوم الوافدين ماينفع معاهم الا هالاسلوب

ثاني شي في تخطيط حادث ويطلع منو الغلطان وانت عندك تأمين شامل روح الشركه ومعاك ورقه الحادث موقعه وعليها ختم من المحققه ويصلحونها لك بالوكاله
 

al3shg

عضو جديد
اول شي الحمدلله على سلامتك وثاني مره اذا احد لف عليك او مسك بريك بوجهك بدون سبب صفطه يمين وعطه المقسوم الوافدين ماينفع معاهم الا هالاسلوب

ثاني شي في تخطيط حادث ويطلع منو الغلطان وانت عندك تأمين شامل روح الشركه ومعاك ورقه الحادث موقعه وعليها ختم من المحققه ويصلحونها لك بالوكاله

الله يسلمك اخوي ،
انا بنت ، كلش مو صوب هالسوالف و بحالي ..
اهم شي اروح و ارد سالمه ، و مع هذا صار اللي ربي كاتبه
و الحمدلله مو اقوى .


بس يعني بعد التقرير الباجي على المحققه .. شنو تقرر
و تالي ورقة من المخفر و اكمل الاجرائات ما بين التأمين و الوكاله عدل ؟

و بحالة اني لافه من الحاره الوسط و اهو ممنوع .. شلون على التأمين ؟
عادي يصلحونها ولا لانه الغلط مني ما يتحملون تكاليف التصليح ؟
 

meshal

عضو بلاتيني
تأمينك شامل ما هو ضد الغير فلا تحاتين ومن الحادث بسيط ما راح تقطين دينار ولا مهم شنو يكتب المحقق . الأهم تنتهين من ورقة الحادث . وكملي إجراءاتك بالوكالة وإستفسري منهم بخصوص التأمين بعضهم يصلحون بدون ما تراجعين شركة التأمين . يمكن كل شركة تامين تختلف إجراءاتها عن الثانية . تاكدي من الوكالة .
http://www.gulfins.com.kw/ar/goldcar.html

ونصيحة ابتعدي عن التأمين الشامل لأنه محرم شرعاً إلآ بشركة تأمين إسلامية أو بما يسمى ( تأمين تكافلي )​
 

zaz

عضو فعال
حمدالله عالسلامه وخطاكم السو

اختي روحي الخبير الفني ولاتحاتين سواء خلوج غلطانه ولا مو غلطانه انتي تأمينج شامل التأمين يصلحلج في كراج الوكالة طالما الطرف الثاني موجود والحادث مو ضد مجهول

الشخص الي دعمج نكر تفاصيل الحادث عشان يستفيد من تأمينج الشامل وصلح سيارته من تأمينج لو خلوج انتي الغلطانه

اختي اتبعي الخطوات الي اقولج عليها وماعليج شي ان شاء الله

1- دقي على شركة التأمين وسأليهم شنو الأوراق الي تبونها عشان اكمل إجراءات التأمين دقي على رقمهم وقوليلهم حولوني على قسم الحوادث اهو القسم الي بالشركة الي مختص بهالسوالف اكيد يون بطاقتج المدنية وورقة الحادث.


2- بعد ماتسئلينهم على الأوراق تسئلين الشركة عن خدمة الونش المجاني لأنه انتي تأمينج شامل غصبا عليهم يدذولج ونش وشيلون سيارتج أي مكان تبينه.

3- عقب ماتحصلين على ونش تنقلين سيارتج بالونش الى مقر شركة الخليج للتأمين قسم الحوادث في شارع أحمد الجابر يم مجمع دار العوضي عشان يشوفها موظف عندهم الفاحص الفني وتعطينه الأوراق المطلوبة وبعدين يعطيج أوراق وتودينها حق الوكالة.

4- عقب ماتخلصين مع الفاحص الفني اتروحين مع الونش اتودين سيارتج الوكالة وتعطينهم الأوراق الي خذيتيها من شركة التأمين.

5- عقب ماتسلمين السيارة الى الوكالة تنطرين يومين الى 3 أيام المفروض شركة التأمين يدذون موظف من قبلهم لي الوكالة يسوي شي اسمه مقايسة (يحدد اضرار الحادث) بعدين يعطونج موافقة على تصليح السيارة.

6- اخر شي تسئلين الوكالة او التأمين عن السيارة البديلة المفروض يعطونج سيارة بديلة تستخدمينها اقل شي 15 يوم على ماتخلص تصليح سيارتج.

نصيحة لو وديتي سيارتج بالونش شركة التأمين والوكالة سويها بنفس اليوم من الصبح لانها شوي متعبه ويفضل يسويها عنج واحد من اهلج والله يكون بعونج

وماتشوفين شر
 

بو محمد 62

عضو ذهبي
اول شي الحمدلله على سلامتك وثاني مره اذا احد لف عليك او مسك بريك بوجهك بدون سبب صفطه يمين وعطه المقسوم الوافدين ماينفع معاهم الا هالاسلوب

ثاني شي في تخطيط حادث ويطلع منو الغلطان وانت عندك تأمين شامل روح الشركه ومعاك ورقه الحادث موقعه وعليها ختم من المحققه ويصلحونها لك بالوكاله

كم انت عنصري ومتخلف نحن في دولة قانون ودستور وفي القرن الحادي والعشرين زين اذا سافرت وعملت حادث ترضى الاوروبي والا الامريكي والا جنسية يعمل معاك جذي

مثلك وامثالك عار على الكويت
 
أعلى