حرام إللي قاعد يصير بديرتنا

neio

عضو فعال

حسافة عليج يا كويت

قريبا وندخل في سنة 2009 .. يعني صار لنا 19 سنة من الغزو .. يعني اللي انولد ذيج الأيام ، تخرج من الثانوية و يبي يدش الجامعة و يبي يتزوج .. يعني فيه جيل يديد طلع .. يعني السنين مرت .. يعني بدينا نكبر و نشيب ..

خلال هذي الفترة ، جم شغلة تغيرت بالكويت ، نقولها للأمانة:
• فتحنا سوق شرق و المارينا .. و تونا شفنا الأفنيوز.
• الجمعيات صارت شوية كشخة.
• المدينة الترفيهية صار فيها قطار ينقلب!
و يمكن جم إشارة سووها دوار .. و حطوا نفق بالدائري الخامس .

للأسف ، راحت الأيام اللي الناس كانت تحسدنا لأنا كويتيين ، يوم كنا النموذج ، الناجح و الكل يشوفنا و يقلدنا ، و وده إصير مثلنا ..
مجلس الأمة والحكومة من مشكلة إلى مشكلة
صرنا آخر عمرنا المساكين اللي نكسر الخاطر ، الناس كلها طايرة ، و احنا بالغصب نلحقهم على "عربانة و حصان" ..

شوفوا الخليج اشلون قام و صار مشاريع و استثمارات و تخطيط و رؤية و تنمية و ناطحات سحاب ، و احنا لما الحين مستانسين على برج التحرير ، لا و ما يخلونا نصعده بعد !!
في دبي ، بنوا أربع جزر صناعية تنشاف من القمر ، و بالكويت مو عارفين شيسون في فيلجا !

في السعودية ، بنوا مدن طبية و مستشفيات تخصصية ، و بالكويت لما الحين قاعدين يصبغون مستشفى الصباح و يرقعون الرازي و الجهرا ومبارك !
في قطر ، قاعدين يسون مدينة كاملة للطاقة ، و بالكويت ، و بعز الحر ، كل يوم يدقون علينا ، يبونا نسكر المكيفات عشان ما تنطفي علينا الكهربا !

حتى المنتخب فشلنا و رفع ضغطنا وإتحادنا وقفوه..
مسرحياتنا صارت مليقة ، مسلسلاتنا صارت سخيفة ,,
و الكويتية إن طارت ورجعت بدون مشاكل نحمد الله على السلامة .
جسر الصبية .. أعتقد القدس راح تتحرر و احنا ليلحين نحيل المشروع من لجان إلى لجان حاله حال مدينة الحرير .

الأسعار شبت نار ، و المعاشات ما توكل خبز ، و العيشة كلها أقساط .. بيوتنا أقساط .. سياييرنا أقساط .. حتى حريمنا قمنا ناخذهم بالأقساط !
و عسى ما صارت عطلة أو إجازة ، إن شاء الله 3 أيام ، شفت الناس كلها هجت و سافرت و الديرة خلت .. و الله ما ينلامون الأوادم ، و ين نبيهم يروحون الجزيرة الخضرا ؟؟ و لا النافورة الراقصة ؟؟
حرام و الله الكويت تصير جذي ، بس تدرون .. المشكلة مو في ديرتنا الحبيبة .. المشكلة فينا !
 

waleed

عضو بلاتيني
للأسف ، راحت الأيام اللي الناس كانت تحسدنا لأنا كويتيين ، يوم كنا النموذج ، الناجح و الكل يشوفنا و يقلدنا ، و وده إصير مثلنا ..
مجلس الأمة والحكومة من مشكلة إلى مشكلة



الجوا ب وببساطه ..

نعم راحت الناس اللي تحسدنا .. ونشغلنا نحن بحسد بعضنا البعض .

هذا هو السبب
 
أعلى