قصتي بقايا العيد بقلمي احمد الصياح العصيمي

بقايا العيد
بايام الطفوله كنا ننطر العيد على نار وكنا انخش هدومنا الجديده عشان نلبسها الصبح والضحكه ما تفارقنا ونشوف حبايبنا
ولكن
كبرنا واشوي اشوي صارت الفرحه تقل وتقل وتقل
(يا ناس العيد ماله طعم وماله لون وماله فرح
واذا قلتوا وش الاسباب؟ قلت الله يعافينا )
قالتها الاسطوره اصاله نصري
عيدكم مبارك
وانا بهالمناسبه جايب لكم (7) عيادي وهم عباره عن 7 قصص تتكلم عن مشاعر مدفونه باغلبنا ولكننا ما نصرح فيها
يمكن انت مريت بوحده من هالقصص
ويمكم واحد من ربعك او اهلك مر بوحده من هالقصص
وانا اتمنى انه ولا واحد فيكم ايحس هالاحساس
والسؤال اللي يطرح نفسه
حنا كبرنا على العيد والا العيد كبر علينا ؟
اقروا هالقصص اللي انا كتبتها وانا في العيد وكنت بمنتهى التعاسه والوناسه!


الله اكبر الله اكبر
وبنفس الوقت هدى بالسياره اموديها اخوها مستشفى الولاده
وتون من الام الطلق وما بين اذان العيد (الله اكبر الله اكبر) وبين اهات الطلق هدى تعاني من الام حاده وتمر في بالها صور واااااااجد
صورتها ببدلة العرس مع سعد وصورتها معاه بتركيا وتتداخل الصور بشكل رهيب وصوت الطراق اللي عطاها اياه سعد للحين يرن باذنها
اهات الطلق وصوت اذان صلاة العيد وتتداخل الصور في خيالها كلها اجتمعت في وقت واحد
وودوها غرفة العمليات
وفي الممر المؤدي لغرفة العمليات
وهدى على الكرسي
صوت سعد يرن باذنها : حياتي انا ما ابي من هالدنيا غير بنوته تشبهج ويتداخل بشكل رهيب صوته لما قاللها:انا زهقت منج ومن حياتي معاج
تداخل صوت سعد في اذن هدى واصدق تعبير لها
دموع انزلت من عينها واحرقت خدها
والام الطلق تزيد اكثر واكثر وبدوامة صور سعد وصوت المؤذن وصوت سعد غمضت هدى عينها بقوه وفتحتها ولقت نفسها بغرفه غريبه
انا ويني سالت نفسها
وتذكرت انها اولدت ودشت عليها امها واحضنتها
هدى :يما انا اشجبت
ام هدى:ولد مثل القمر
هدى بجت من الفرح وحست باحساسها وهي طفله لما جابت بامتحان الاجتماعيات الدرجه النهائيه
بعدها
جو خوات هدى وباركوا لها بالعيد وباركوا لها على ولادتها
وعقبها جو بنات عمها وبنات خالاتها ورفيجاتها
ولكن مع كل هذا هدى فيها لمحة حزن
:وين سعد؟ ليش ما تحمدلي بالسلامه وليش ما قاللي عيدج مبارك ؟
واشوي اشوي راحوا رفيجاتها وبعدين راحوا بنات عمها وبنات خالاتها وبقت هدى مع خواتها وامها وابوها واخوانها بالمستشفى
ام هدى : هدى حبيبتي اشفيج مو على بعضج
هدى: يما سعد للحين ما تحمدلي بالسلامه ولا حتى قاللي عيدج مبارك؟
ام هدى:انتي قلتيله
هدى: طبعا دزيتله مسج ودقيت عليه واجد ولكن عمك اصمخ
اسيل(وحده من خوات هدى):هذا انسان مستهتر
ولا يستاهل منج لحظه وحده تفكرين فيه
هدى: اووووف يا ربي ليش حظي جذيه
ابو هدى: تبيني ادق عليه
هدى:لا لا يبا خلوه على راحته
وبعدها راحوا وبقت هدى الحالها
هدى:انا بشنو اخطيت؟ شابتله اصابعي شموع وابديه على نفسي وقبل لا يامر انفذ شسوي اكثر ؟
وليش الكل باركلي وعايدني الا سعد؟ لازم ادزله مسج
وكتبت هالمسج(خد بالك عليا دي مش معامله تعاملني بيها وابقى افتكر ليا ايام تعبت عشانك فيها يا ريتك بس تفهمني وما تستهونش بوحده تبقى مجروحه وما بتبينش دي الوحده قد ما اتفكر تنسى ما بتستاذنش) وارسلت هالمسج
وانطرته يرد والليل لملم نفسه وراح واشرق الصبح ولا حس ولا خبر...وهدى تقطعت من البجي وغرقت المخده واتحس بقلبها براكين من القهر والحسره انه حظها تعباااااااااااااان معقوله اليوم اول ايام العيد وبنفس اليوم ولدت وسعد لاحس ولا خبر ؟
ثاني ايام العيد
تكرر سيناريو امس
جت ام هدى وخواتها ورفيجاتها وبنات خالتها وعمها والخ وجا الليل وبقت الحالها اتفكر في سعد ولا جاها منه خبر وارسلتله هالمسج
(كان في حاجات ناقصاك وانا كملتها وحاجات كتييير مش حلوه فيك وانا جملتها انا فرصه لو ضيعتها هتزعل عليها ) ولا رد عليها
ثالث ايام العيد
وصل هدى مسج من سعد(حبيت ابلغج انج طالق وماني ندمان الا اني ضيعت من عمري على وحده مثلج وخلي الولد عندج مابيه)
وتاثرت هدى بهالمسج بشكل يفوق قدرتي على الوصف انا اشسويت؟ حست هدى انه الزمن وقف فيها حست نفس احساسها بايام الغزو الله لا يعيده
نفس التعبير بالظبط ...حست انها مو مصدقه شي حست احساس غريب تمنت من كل قلبها انها تموت الحين الحين.
بعدها
ادخلت عليها امها وخواتها
ام هدى: اشفيج تبجين ووجهج اصفر
هدى: رحل واشتاق لجراحه رحل رحل واشتاق لجراحي رحل
ام هدى: حسبي الله عليه ربي ما يربحه يلاقيها جدامه
اسيل:امسحي دموعج هذا انسان معقد الشك ذابحه انسان مريض ياما وياما قلتلج هذا مو صاحي ولكن ما طعتيني حسبي الله عليه حسبي الله عليه
هدى: تكفوووووون خلوه لا تعدون غلطاته انا ادري انه تلف حالي وضيعني
وبعدها
دقت منى على هدى
منى توها راده من السفر وما تدري عن ولادة هدى ولا عن طلاقها
منى: هلااا هدى انا توني راده الكويت وقلت انتي اول وحده ادق عليها
هدى: تسلمين هذا العشم
منى:مع انها متاخره بس امون عيدج مبارك وتقبل الله طاعتج وكل عام وانتي اعز الناس
هدى: سكتت ...........كان ودها تقوللها عن العذاب النفسي اللي عاشته بهال 3 ايام العيد وعن صدمة عمرها اللي جتها ب 3 ايام العيد وعن مرارة الانتظار وعن قسوة سعد وعن وعن وعن ولكن اخنقتها العبره وبجت
منى: هدى اشفيج
هدى : ساكته
منى: هدى هدى اشفيج خوفتيني عليج
هدى:يا ناس العيد ماله طعم وماله لون وماله فرح واذا قلتوا وش الاسباب قلت الله يعافينا.
.........................................................


العيديه الثانيه
شوفوا شيقول صالح عن العيد
عيدك مبارك...هالكلمه ما عمري سمعتها او بمعنى ادق ولا عمري حسيت فيها !
من اول ثانيه بحياتي واجهت مصيري المجهول
وكل الظروف سوت حلف ضدي
وين اعيد؟ وانا ممنوع علي حتى انه يكون عندي ليسن! واشلون اعيد وانا حبيبة عمري بعد كم يوم عرسها..تسالوني ليش ما تزوجتها ؟ لني ممنوع من الزواج طول عمري ! كل الناس يفرحون صبح العيد بالعيادي من ابوهم والا امهم وانا هالشي ما صار بحياتي كلها...كل ربعي ينطرون العيد عشان يقضونه بدبي وانا محروم علي اني اطلع شبر من كويتنا الحبيبه..تدرون ليش..انا بدون
ويا ناس العيد ماله طعم وماله لون وماله فرح
واذا قلتوا (وش الاسباب) قلت الله يعافينا
...........................................................

العيديه الثالثه
سالم انا اعتبره واحد من مجازر الحب
سالم دش بعلاقة حب من طرف واحد وحاول انه يعبرلها عن حبه بكل الطرق اللي تخطر فبالكم
وفعلا وصل مشاعره لها
وتفننت بتعذيبه بكل انواع التعذيب النفسي واغترت عليه وصارت مثل الطاووس وسالم كان يحس انه اسعد انسان بهالحياه لو بس لمحها وهي داشه بيتهم
واستمر سالم في الحب للمنتهى واستمرت هي في الغرور للمنتهى ولكنها اوصلت بالغرور لدرجة انه سالم كان من كثر ما يحبها ومن كثر ما هو مدمن افلام مصري ابيض واسود كتب لها رساله بخط ايده يعبر لها عن شوقه وعشقه لها وقعد المسكين يعصر مخه عفوا قلبه عشان يعبر بكلام ايصك فيه على نزار قباني مع انه سالم لا هو شاعر ولا شي ولكن كان يكتب بكل جنون العشاق وما ادراك ما جنون العشاق وفعلا وصل لها هالرساله واول ما خذتها قامت وقطتها بالزباله جدام عينه..حس وقتها انه يحتضر وحس بالمهانه والذل بشكل صعب وصفه
ودق سيارته سلف وسمع اغنيه عبدالكريم عبدالقادر
(محال...محال...محال
عمر المحال ما ايصير
محال...محال...محال
اعيش انا حب خالي من التقدير
فكرت انا فكرت...قررت انا قررت
انسى انا حبك وهذا بعد تفكير
محال محال محااااااااااااااااال )
وراح صوب الحبر
وطول اخر حد لما قال عبدالكريم
اه يا انا يا انا اه يا انا
اه يا انا يا انا اه يا انا
نبهني صمتي للحنين
اه يا انا يا انا اه يا انا
ويني انا كل هالسنين
آن الاوان اني احدد موقفي
آن الاوان اوضح الجرح الخفي
ومن العذاب ومن الجراح انا اكتفي انا اكتفي )
وكلما اتخلص هالاغنيه ايعيدها وحس انه عبدالكريم عبدالقادر شلع قلبه من مكانه وعبر عن كل غضبه وجرحه وهوانه سالم حس انه قعد سنيين يبني قصر من رمل وبثانيه وحده جا واحد وداس عليه
بالظبط هالاحساس ايحسه سالم
بعدها صار سالم مدمن نت
وكان يبي ايطلع كل شحنات الغضب اللي فيه ويبي ينسى...وفعلا تعرف على وحده اسمها خلود
وكان ايدردش معاها عشان ينسى وفتح لها قلبه وياما وياما شكالها من حبيبته المغروره وكان ايسميها (الحب اللي كان)
وخلود بنت الحلال كانت تسمع بانصات
وكان ايحس لما ايكلمها بالماسن انه ملك الدنيا بللي فيها ويوم عن يوم صاروا اقرب واقرب من قبل لغاية ما صارح سالم نفسه انه ايحبها وايموت عليييييها وسالم كانت علاقته فيها ما تتعدى الماسن فقط وكل سوالفه معاها بريئه وبمنتهى البرائه لنه حس انها هي فتاة احلامه او توام روحه
نفس الهوايات ونفس المباديء وايحس سالم انها مخلوقه عشان تلتقي فيه ودايما يقول لنفسه هالانسانه لي انا الحالي وخصوصا انه خلود كانت ملاك بكل معاني هالكلمه
وتحديدا برمضان
علاقتهم صارت اقوى واقوى واقوى من قبل وسالم صارحها من قبل بحبه وجنونه فيها ولكن خلود كانت ما اتصرح بحبها له مع انه هالشي واضح وحتى العمي يشوفه ولكن مره من المرات لمحتله وقالتله انت غير بالنسبه لي
قاللها سالم يعني اتحبيني
قالتله لا ولكني اعزك حيل حيل حيل
ولكن لانه خلود ملاك كانت تنظر للامور كلها بدقه وبشفافيه وتهاوشت مع سالم
وسالم حس وقتها نفس احساس اهل الكويت بيوم الغزو حس بالضياع والتشرد حس انه فقد وطنه
حس انه صار غريب مشرد ضايع في هالحياه
وافترقوا شهور طويله وعدى عليه شهر رمضان بدون خلود وخنقته العبره وبجى بمراره وحزن خصوصا انه شهر رمضان يذكره فيها وكان يسولف معاها من عقب العشى لغاية ما بعد الفجر
واعلنوا بتلفزيون الكويت انه بكره اول ايام عيد الفطر وحسس بضيييييييقه وكان يتمنى شي واحد بس انه يقوللها عيدج مبارك يا ملاك
ولكن ما يقدر لنها ايميلها القديم ما صارت اتدش منه وسوت ايميل جديد وسالم يجهله
سالم فتح ايميله وطالع ايميلها وقال لنفسه الله يرحم ايام اول وعدل توبكه القديم اللي كان
(تعبت اناظر القمره عسى شوفك يجي بشوفي تعب من هالصدى صوتي وتعبني عليك خوفي ) وغيره وسوا توبك جديد
(يا ناس العيد ماله لون وماله طعم ولا له فرح
واذا قلتوا وش الاسباب قلت الله يعافينا) عيدج مبارك
.............................................................

العيديه الرابعه
زيد
شاب طموح شد حيله برابعه ثانوي ولكن ما جاب النسبه اللي اتدخله جامعة الكويت لنه نسبة القبول كل سنه ترتفع اكثرواكثر لغاية ما يجي اليوم اللي المصاروه يدرسون بجامعتنا وحنا نشتغل بالكفتريا!
ما علنيا..زيد نسبته ما تسمحله انه يدش كلية الحقوق
وكان حلم حياته انه يكون محامي ولكن من طلب العلا سهر الليالي ..وفعلا زيد نوى انه (يتغرب) عشان يدش كلية الحقوق
مع انه هالتخصص موجود بديرته ولكن!
سافر زيد الشارجه عشان يحقق حلمه
بالكويت مكان الكليه يبعد عن بيتهم نص ساعه!
ولكن نسب القبول و هذا بلى ابوك يا عقاب
وعدت اول سنه على زيد في الشارجه وشد حيله عشان يرفع راس ديرته ويبيض وجه اهله وعدت السنه كلها دراسه بدراسه
ولكن ليلة العيد
زيد طاف الاشاره الحمرا وسوا حادث واحجزوه على ذمة التحقيق
الصبح اول ايام العيد
كان هالعيد هو اول عيد لزيد بره الكويت وبعيد عن اهله.....
حس انه ميت شووووووووق لهم ووده يعيد على امه واهله ولكن الظروف اقوى منه وجد جد جد مشتاق للكويت حيييل
ويتذكر العيد اللي طاف لما كان بعدما يعيد على اهله يطلع ويا عيال عمه شارع الخليج ويروحون المارينا وقال لنفسه: يا زينج يا الكويت
تمنى زيد بهاللحظه انه يشوف اهله ويبوس تراب الكويت وعقبها يموت
حس زيد انه مخنووووق واول مره من جا الشارجه يواجه نفسه انه بغربه وحس بغلاة الكويت وحس انه بدون الكويت ما يسوى بيزه تذكر لما كان صغير لما كان يقوم امبجر ويعيد على ابوه اول واحد عشان ياخذ عيديه اكثر من اخوانه ولكن وين ابوي؟ قال لنفسه لو وزيرة التربيه منزله نسب القبول بالكليه جان ما تغربت وتبهذلت ولكن عين عذاري تسقي البعيد وتخلي القريب وحسبي الله ونعم الوكيل
حط راسه بين ايدينه وبجى وبجى وبجى مثل الجهال وقال لنفسه
يا ناس العيد ماله لون ولاله طعم ولاله فرح
واذا قلتوا وش الاسباب قلت الله يعافينا
...........................................................
العيديه الخامسه
خالد (بو وليد) مذيع كويتي يقدم برنامج عن شكاوي الناس وهمومهم
ولكن اليوم هو اول ايام العيد وعنده برنامج ثاني يتلقى فيه تهاني الناس وتبريكاتهم بهالمناسبه هذي

المذيع خالد: ناخذ اتصال ثاني نعم نعم معانا واحد مسمي نفسه اسير الاحزان هلا اخوي
اسير الاحزان: هلا والله بحبيبنا
المذيع خالد: تسلم تسلم وصل معايدتك الكويت كلها تسمعك
اسير الاحزان بصوت حزين:خالد اعيد على منو
المذيع خالد (بووليد): عيد على اهلك وحبايبك
اسير الاحزان: يا بووليد والله العظيم اني احبك فلله واعتبرك اخوي الكبير وهالشي اللي خلاني ادق عليك يا بووليد انا اهلي كلهم ماتوا بحريق الجهرا
وبقيت الحالي يا بووليد واحس انه الكويت ضيجه علي فوق ما تتصور
المذيع بووليد تاثر وبجى
اسير الاحزان: انا ما ابي شي منك يا بووليد انا ابي من اهلي ايه والله اقولها وانا صاج اهلي اهل الكويت انهم يدعون لاهلي بالرحمه والمغفره وانا يا بووليد هذا اول عيد لي بدون اهلي واقول لكل من يسمعني روح حب راس امك وعيد عليها ما تدري العيد الجاي تكون معاك ولا وبجى
والمذيع خالد (بووليد) بجى...يا اسير الاحزان والله اهل الكويت كلهم اهلك وانا اتشرف لو تعدني واحد من اهلك الله يرحم اهلك وقول انا لله وانا اليه راجعون اليوم الامير عسى الله يعزه فزع لكم وشوف المكارم الاميريه عسى الله يحفظ اميرنا لنا امير الانسانيه
اسير الاحزان بصوت مخنوق: طبعا طبعا الله يشهد انه الامير خفف علينا وحنا ما نبي الا سلامته وانت يا بووليد ما ادري شقوللك والله اني لو ما دقيت عليك جان الحال غير الحال انت الصدر الوسيع للكويت كلها
المذيع بووليد: والله احنا اليوم عيد اليوم ولكن انته بجيتنا بس الله يشهد اليوم يا اسير الاحزان انه دعينا لضحايا حريق الجهرا برمضان المصاب كان جلل
اسير الاحزان: وهذا العشم باهل الكويت بو وليد انا اسف يمكن كدرتك وبس والله العظيم انه الحزن اللي بقلبي اليوم لو اوزعه على البشر كلهم راح يزيد وانا ابي منك شي يا بووليد
المذيع بووليد:انته تامر...انتوا يا اهل ضحايا حريق الجهرا كلنا نفزع لكم اهل الكويت دايما ايد وحده امرني يا الغالي اليوم
بووليد: قول امين انت واهل الكويت كلهم
اللهم ان العين لتدمع وان القلب ليحزن وانا على فراق ضحايا حريق الجهراء لمحزونون
اللهم ان كانوا محسنين فزدهم في حسناتهم
وان كانوا مسيئين فتجاوز عنهم يا ذا الجلال والاكرام يا حي يا قيوم يا فرد يا صمد نسالك باسمك الاعظم ان تغفر لنا ولهم ولجميع موتى المسلمين
اللهم انس وحشتهم في القبور اللهم قهم من عذاب الن وبجى
وبجى المذيع خالد
اسير الاحزان: اللهم قهم من عذاب النـــــــ وبجى
وقالها وهو يبجي اللهم قهم من عذاب النار اللهم ادخلهم الجنه..ما اقدر اكمل تكفون ادعوا لهم وبيض الله وجهك يا بووليد والله يشهد انه اهل الكويت اهلي
ويا ناس العيد ماله لون وماله طعم ولا له فرح واذا قلتوا وش السباب؟ قلت الله يعافينا فمان الله
.......................................................

العيديه السادسه
شمه وما ادراك ما قصة شمه؟
شمه كل ذمبها في هالحياه انها باره بامها !
وهالبر هذا فسروه اخوانها انها لاهفه حلالهم او بمعنى ادق ورث المستقبل لنه ام شمه رافضه تعيش عند احد من اعيالها الا شمه لنها الكبيره وتعودت عليها وشمه عانت مع امها فوق ما يتصورون اخوانها ومن مستشفى لي مستشفى اتعابل بهالعجوز ولكن اخوانها سنه ورا سنه صاروا ايباعدون عنها لغاية ما قاطعوها بشكل نهائي بتهمة بر الوالده!
والله يشهد انها ما خذت من امها شي ولا استفادت
اللهم لما العجوز ترفع ايدها للسما وتقول يا ربي يا حبيبي تفتحلها كل بيبان الخير وتسد كل بيبان الشر ويا ربي يا حبيبي تحفظها وتعطيها على قد نيتها .
وشمه لسواد عيون امها فاتها قطار الزواج وفضلت انها تكون تحت رجل امها ولا انها اتقطها واتعقها
والصبح اول ايام العيد
قامت شمه والبست اكشخ ما عندها وطالعت نفسها بالمنظره وعدلت نفسها وانزلت الصاله واشربت شاي حليب وحست بضيجه وفكرت
وقالت انا من لي يعيد علي لا زوج يحن علي ولا ولد يحب راسي ولا اخو ولا اخت؟ ........حست وقتها انها فعلا وحيده في هالحياه بكل معنى الكلمه
وشمه ما تنسى العيد اللي فات لما راحت لاخوانها اتعيد عليهم اول ما دشت كل وحده اتلوي بوزها وقاموا وخلوها الحالها ولا احد منهم فز وسلم عليها ولما قالت لهم عيدكم مبارك محد رد..واحلفت انها ما راح تجيهم واتعيد عليهم مره ثانيه لو شنو لنها وقتها حست انها ولا شي بالنسبه لهم.............
ولكن شمه قلبها مثل السحاب ما تعرف تحقد
قامت ودقت على وحده من خواتها (من رقمها الجديد اللي ولا وحده فيهم تعرفه)
وكان قلبها يرقع مع رنة التلفون طوط طوط طوط وقلبها يرقع اكثر واكثر واكثر ..الو
اول ما سمعت صوت اختها تقول الو قلبها رقع حيل مثل طبول الحرب وكانت ناويه تقوللها عيدج مبارك يا اختي يا بنت امي وابوي يا عزي وذلي وكانت حابه تقوللها اشكثر مشتاقه لهم ولكنها سدت التليفون
وخافت حيل انها تكلمها وما تدري ليش؟
يمكن لنه ردة فعلهم العيد اللي طاف كانت بمنتهى القسوه؟
قامت شمه وكتبت مسج ودزته لكل اخوانها وخواتها
والمسج هو
يا ناس العيد ماله لون ولاله طعم ولاله فرح
واذا قلتوا وش الاسباب قلت الله يعافينا
.......................................................
 
العيديه السابعه
اقروا قصة اماني اللي اتقطع القلب
19 سنه وانا اسمع كلمة عيدج مبارك وانا اقول ايامج سعيده وانا ارددها بدون ما احس بطعم هالكلمه...اشلون احس بفرحة العيد وانا حبيبي صارله 19 سنه ما ادري عنه من تحررت كويتنا
وانا اجهل مصيره..حبيبي صار شهيد ولا للحين اسير وبيرد..كل يوم امني نفسي انه يرد ويخلص اليوم وانا للحين اجهل مصيره...حسبي الله ونعم الوكيل فيك يا صدام كثر حزني على فراق احمد
وحسبي الله عليك كثر طيبة احمد معاي جعل مثواك جهنم وبئس المصير...احمد 19 سنه وحبك بقلبي يزيد ويزيد..كل مكان بالكويت يناديك
احمد 26\2 عيد تحرير كويتنا الغاليه ولكن انا متى عيد تحريري؟ متى اكحل عيني بشوفك
احمد كلنا ننطرك كلنا اجلنا 19 سنه من عمرنا ومهمتنا هي نطرتك...حتى امك شيبت قبل وقتها وما غير قاضبه صورتك وتبجي ...احمد ودي اخذك من ايدك وافر فيك الكويت كلها واوريك اشلون ردت الكويت حلوه ويمكن احلى من اول اوريك مجمعاتنا الجديده...احمد خبرك عتيج بالبحر الحين صار مو لنا..احمد اقسم بلله ما فرحت ب 19 عيد مروا علي بغيابك كل سنه اشتري هدوم جديده واقول الحين بيجي يعيد علي وبوريه هدومي الجديده وايخلص العيد ولا تجي...و19 بدله يااحمد ما لبستهم ولا احد شافهم علي..احمد ما ادري ليش لما اعدموا صداموه ضحكت من اقصى اقصى قلبي حسيت انك بنفس هالحزه قاعد تتابع التلفزيون وتضحك عليه كثر ما بجانا 7 شهور حسبي الله عليه..احمد تدري انه بابا جابر مات! وحسيت وقتها انك مع اهل الكويت بالمقبره تصلي عليه ولكن ما ادري وينك...احمد 19 سنه من عمري راحوا من عمري وانا بنطرك عمري كله ولكن ابي اعرف مصيرك
راح اشوفك بالدنيا والا بالجنه؟
يا ناس العيد ماله لون ولاله طعم ولاله فرح
واذا قلتوا وش الاسباب قلت الله يعافينا
........................................................
بقلمي
احمد خالد الصياح العصيمي
..................................................
في الختام
انا اقول عيدكم مبارك لاهلي اهل الكويت
واقول عيدكم مبارك لعزوتي وربعي العصمه
واقول للي فبالي
(لين ضاعت فرصتي دمعي انهمل
كيف تخذلني وانا اللي محتريك؟
كنت ابي قربك ولكن ما حصل
وانتظر لعيدي الثاني واجيك)

وانا عيدت عليكم ب(7) عيادي
وما ابي منكم شي الا انكم تقولون امين

اللهم انك قلت وقولك الحق ادعوني واستجب لكم
ها نحن يا ربنا ندعوك الان فاستجب دعائنا
ياذا الجلال والاكرام
اللهم يا رحمن يا رحيم يا ودود يا كريم
اللهم انك قد انعمت على بلادنا الكويت بنعم كثيره
فاحفظها اللهم من الزوال بكرمك وقدرتك واجعلنا لهذه النعم من الشاكرين
اللهم ادم علينا نعمة الامن والامان والطمئنينة والاستقرار انك على ذلك قدير
اللهم احفظ الكويت واميرها وولي عهدها وشعبها من كل مكروه
اللهم واجمع شعبنا على كلمة واحده
اللهم واجعل شعب الكويت مجتمعين معتصمين غير متفرقين
لما فيه خير للكويت وازدهارها وصلاحها يا ذا الجلال والاكرام
يا رب تحفظ الكويت

ان قلوبنا لتحزن وان عيوننا لتدمع وانا على فراق حبيبنا وجابرنا لمحزونون
اللهم اغفرله وارحمه
اللهم اغفر لجابر اللهم اغفر لجابر اللهم اغفرله وارحمه وعافه واعفو عنه واكرم نزله ووسع مدخله واغسله بالماء والثلج والبرد ونقه من الذنوب والخطايا كما ينقى الثوب الابيض من الدنس
اللهم ابدله دارا خيرا من داره
واهلا خيرا من اهله وزوجا خيرا من زوجه
اللهم ادخله الجنه
اللهم انس وحشته في القبور وامنه يوم العرض والنشور يا عزيز يا غفور اللهم ان جابر في ذمتك وحبل جوارك فقه من عذاب النار فقه من عذاب النار فقه من عذاب النار يا ذا الجلال والاكرام
اللهم امين
..........................................................
ويا ناس العيد ماله لون ولاله طعم ولا له فرح
واذا قلتوا وش الاسباب؟ قلت الله يعافينا
نلوم الوقت والقصه ما تبغي جمع والا طرح
لان العيب من ربي خلقنا ساكن فينا
....................................................
بقلمي
احمد خالد الصياح العصيمي
 

غاليه كمال

عضو فعال
اخي الفاضل احمد العصيمي مواقف مؤثره وواقع مؤلم وحقائق تعتصر الفؤاد صيغت بأسلوب راقي

وكلمات شفافه تتغلغل في اعماق العقل وسؤدد الفؤاد فلترفع القبعات احتراما وشكرا لما خطته اناملك

الذهبيه الثمينه

لك مني كل الاحترام وخالص التقدير اخي الكريم
 

ريميــة

عضو مخضرم
عياديك تذكرني بدراما رمضان تضيق الخلق بس لامســـــــــت قلوبنا ياأحمد وكأنك تترجم ماأشعر فيه ....

سبحان الله الدنيا عيد والناس موحاسة بإحساس العيد يمكن أثقلنا كواهلنا بالمعاصي فزادت ظلمة نفوسنا ؟ يمكن في داخلنا هم مدفون فأحياه العيد وضاقت صدرونا ؟

أسأل الله ذو الجلال والإكرام أن يفرج هم المهمومين وينفس كرب المكروبين ويرحمنا برحمته ..... اللهم آمين
 
بما إنكم أخي الكريم ترد على ناس وتطوّف ناس فأعلن عدم متابعتي للقصّة :D

محشوم يا الغالي
وقدرك عالعين والراس بعد
ولكني اشلون ارد عليك وانت اصلا ما شاركت بالردود
صدقني صار عندك لبس في الموضوع وان شا الله انك تتداركه

ومن ناحية عدم متابعتك للقصه
للاسف انه هالقصه هذي انتهت وماني عارف اشلون اعلنت عدم متابعتك لشي اصلا منتهي

عموما
انت اخو وعزيز وغالي واشكرك
 

@Noura@

عضو مخضرم
محشوم يا الغالي
وقدرك عالعين والراس بعد
ولكني اشلون ارد عليك وانت اصلا ما شاركت بالردود
صدقني صار عندك لبس في الموضوع وان شا الله انك تتداركه

ومن ناحية عدم متابعتك للقصه
للاسف انه هالقصه هذي انتهت وماني عارف اشلون اعلنت عدم متابعتك لشي اصلا منتهي

عموما
انت اخو وعزيز وغالي واشكرك

أعتذر وآنا أختك مزنة <<<<<مزنة صار رجّال كل شي يصير :confused:

التبس علي موضوع ثاني لك ربّما ..!!


http://www.nationalkuwait.com/vb/showpost.php?p=878374&postcount=4
 
اختي مزنه
انا اسف ما دريت انج بنت

وعموما
صوتج وصل.............وانا ما اقدر افرض عليج متابعة القصه او عدم متابعتها هذا القرار راجعلج
ولكني استحااااااااااااله ارد على احد واطوف احد
واكبر دليل اني انا رديت عليج في الموضوع اللي ذكرتيه
عموما
اذا قررتي عدم المتابعه تبقين اخت وعزيزه وغاليه
واذا قررتي المتابعه تبقين اخت وعزيزه وغاليه
وبكل الحالتين
صوتج وصل
 
اخي الفاضل احمد العصيمي مواقف مؤثره وواقع مؤلم وحقائق تعتصر الفؤاد صيغت بأسلوب راقي

وكلمات شفافه تتغلغل في اعماق العقل وسؤدد الفؤاد فلترفع القبعات احتراما وشكرا لما خطته اناملك

الذهبيه الثمينه

لك مني كل الاحترام وخالص التقدير اخي الكريم

بيض الله وجهج
ورايج شهاده اعتز فيها عمري كللللللللله

وان شا الله دايما اكون عند حسن ظنكم

ويا ناس العيد ماله لون ولا له طعم ولا له فرح
واذا قلتوا وش الاسباب قلت الله يعافينا
نلوم الوقت والقصه ما تبغي جمع والا طرح
لان العيب من ربي خلقنا ساكن فينا
 
عياديك تذكرني بدراما رمضان تضيق الخلق بس لامســـــــــت قلوبنا ياأحمد وكأنك تترجم ماأشعر فيه ....

سبحان الله الدنيا عيد والناس موحاسة بإحساس العيد يمكن أثقلنا كواهلنا بالمعاصي فزادت ظلمة نفوسنا ؟ يمكن في داخلنا هم مدفون فأحياه العيد وضاقت صدرونا ؟

أسأل الله ذو الجلال والإكرام أن يفرج هم المهمومين وينفس كرب المكروبين ويرحمنا برحمته ..... اللهم آمين

اللهم امين
وانا اشكرج وشهادتج في قصصي اعتز فيها وبيض الله وجهج
 
يعطيك العافيه أخي : أحمد على الموضوع الطيب:وردة:

الف الف الف شكر

يا ناس العيد ماله لون ولا له طعم ولاله فرح
واذا قلتوا وش الاسباب قلت الله يعافينا
نلوم الوقت والقصه ما تبغي جمع والا طرح
لان العيب من ربي خلقنا ساكن فينا
 
بمناسبة عيد الاضحى المبارك اقول لكل من قرا قصتي واعجبته
عيدك مبارك وكل عام وانت بخير وعسى ربي يحفظ الكويت وتفرج كربة بوعمر امين
 
أعلى