سد بوزك قصه جريئه وفزعه لكل كويتي حر

سد بوزك
اخواني
هالقصه مالها علاقه بواقعنا (السعيد)
لنه هالقصه تتكلم عن ديره (الاقليه ) تحل الاغلبيه ؟
تتكلم عن ديره العضو اللي ايمثل الامه و يطالب اشكره بالحل الغير دستوري
تتكلم عن ديرة(ابو فاكس)
تتكلم عن ديرة (كيفه بفلوسه)
تتكلم عن ديرة (سد بوزك)
هي دوله خياليه لني ما اتوقع انه فيه دوله بهالمواصفات هي ديرة البطــــــــــــيـــــــخ

القصه الاولى (طس نبي غيرك)
تدور هالقصه في شركة (الاصلاح )
كان مدير هالشركه (حمد) فاسد وايوزع رشاوي عالكل عشان يضمن وجوده ولكن هالشركه ما كانت له الحاله ولكن له نصيب الاسد من النسبه ولكن هو حسباله انه عشانه نسبته اكبر معناها (صوته يوصل) غصب
ومساعد كان واحد من اللي لهم نسبه في هالشركه وحس انه ادارة حمد للشركه فاشله
واثبت فشله الذريع ولكن محد كلمه بحكم انه الاكبر سنا والاكثر من حيث النسبه
ولكن مساعد قال لنفسه (بس)
وفعلا سوا اجتماع بحضور كل اللي لهم نسبه في هالشركه عدا حمد بحكم انه الجلسه ضده
وبين لهم انه كلنا بمركب واحد ولي متى وحنا خايفين منه؟ ودار نقاش طويل وتوصلوا لنتيجة انه حمد لو استمر في الشركه اكثر من جذيه راح يقعدون على بساط الفقر
وفعلا كلهم راحوله المكتب وكلموه وقالوله ادارتك فاشله وعطيناك بدال الفرصه اكثر من فرصه وكان رد حمد انه انتوا فيه احد دازكم من الشركات الثانيه عشان تدمرون مستقبلي واتشوهون سمعتي وتقضون على مستقبلي التجاري والخ الخ
وانتهت الجلسه بفشل ذريع لنه عمك اصمخ
واتمر الايام
وحمد كان بمكتبه وتوه قاعد يكتب شيك عشان (يسهل) صفقة العمر ولكن عكر صفوه صوت عالي تحت دريشته قام وفتح الدريشه وطل وشاف منظر غريب
مساعد (وربعه) اللي لهم نسبه في الشركه واغلب العمال امسوين مظاهره ضد حمد وكاتبين (انقلع نبي غيرك) وغيرها من العبارات
طالعهم حمد من برجه العاجي وقال : سدوا بوزكم

القصه الثانيه (قبيح بو طياره خاصه)
قبيح..هذا اشهر اعلامي بديرة البطيخ تكلم على مدار حلقات طويله من برنامجه (الحقير) عن قضية الموسم واللي هي عباره عن حرامي باق ملاييييييين وبالادله ولكن الاعلامي قبيح حاول قد ما يقدر انه ايبرا هالحرامي من خلال برنامجه ودفاعه المستميت عن هالحرامي واستضافته للهيلق فكريا عشان يغسل مخ الناس ولكن اثناء الحلقه اللي كان قبيح يردح فيها عشان ايبرا الحرامي اغمى عليه
والحرامي كان يتابع الحلقه ولما شاف الاعلامي قبيح اغمى عليه قام وامر انه يسافر للعلاج في الخارج على احسابه وبطيارته الخاصه
وفعلا تم علاج الاعلامي قبيح على نفقة هالحرامي وكانوا ايسولفون كالعاده الحرامي وقبيح والحرامي قاله افتح بوزك

القصه الثالثه (دكاكين البلطجه)
كان باحد الفرجان بديرة البطيخ عشر دكاكين
واهل الفريج (اشتكوا) لنه هالشي (اوفر)
وفعلا اهل الفريج كلموا اصحاب ال عشر دكاكين وقالوليهم شوفوا لكم حل لازم تنقلون دكاكينكم فرجان ثانيه مو كلكم لكن لازم احد منكم ايتنازل
واصحاب الدكاكين ارفضوا خصوصا انه هالفريج موقعه ممتاااز ويدر عليهم ذهب
وكل صاحب دكان ايقطها براس الثاني
واهل الفريج ظاعوا ما يدرون الحق مع منو
وتجمعوا اصحاب الدكاكين ال (10)وقالوا مالنا الا انروح لبو محمد
بومحمد هذا رجال مو من اهل الفريج ولكنه تاجر عووووود وكلمته مسموعه
وكان قراره كالاتي انتوا 10 دكاكين لازم تتجمعون بدكان واحد وايكون دكان كبير وتتقاسمون الربح
ولكن هالراي اقبلوه 6 من اصحاب الدكاكين و4 ارفضوا رفض قاطع وقالوا احنا ما نبي انشارك احد واحنا لنا وضعنا بالفريج
وحاولوا اهل الفريج انهم يصلحون بين اصحاب ال 10 دكاكين ولكن عمك اصمخ
واجتمعوا اصحاب ال 4 دكاكين اللي ارفضوا مبدا الشراكه واتفقوا ........
وطلع الصبح وقاموا اصحاب ال 6 دكاكين وانصدموا من المنظر اللي شافوه
لقوا دكاكينهم امكسره بللي فيها
جوا اصحاب ال 4 دكاكين وقالوا احنا نبي نشتري منكم دكاكينكم ال 6 بسعر التراب
بحكم انه ثمن بناء الدكان من جديد غاااالي
وفعلا تم بيع ال 6 دكاكين (الاغلبيه)بالبلطجه
والاربع دكاكين استولوا على الفريج
واصحاب ال 6 دكاكين سدوا بوزهم
واهل الفريج اللي كانوا ايفكرون انهم يملكون دكان سدوا بوزهم

القصه الرابعه (جب جب جب )
يوسف موظف في شركة معروفه عند القاصي والداني ويوسف لاحظ انه الامور مو مظبوطه والارقام المكتوبه بالاوراق مالها علاقه بللي موجود بالمخزن حتى الاسعار غير وحس انه السالفه فيها ان
لا والله ان واخواتها وبنات جيرانهم بعد
وقعد ينبش بالاوراق العتيجه والجديده وايقارنها باللي موجود بالمخزن وتاكد انه راعي الشركه حرامي وانه بايق من الدوله اكثر من (5) ملايين في هالصفقه هذي بس قال يوسف لنفسه: حسافج عليج يا ديرتنا صفقه وحده باق منها((( 5 )))ملايين عيل باجي الصفقات جم لهف حسافه والله حسافه بس انا ماني ساكت وبوصلها للمسؤولين
وفعلا (صوته وصل) للمسئولين
والمسؤولين سوو لجنه تقصي الحقائق لنه هال(5) ملايين هي فلوس الاجيال القادمه
وطول مدة عمل اللجنه كان يوسف يزودهم بالاوراق والمستندات
بيوم تسليم التقرير اللي يدين الشركه
رن تليفون يوسف
يوسف: الو.... فلااااااان (قالها بخوف)
؟: سد بوزك
بعدها يوسف قطع التقرير بايدينه
وعاش حياته كلها وهو (ساد بوزه)

القصه الخامسه (سد بوزك اكتب)
علي ...شاب تغذى من طفولته حب (ديرة البطيخ) ولما تفجرت عنده موهبة الكتابه قام وسخرها ضد اعداء ديرة البطيخ
وفعلا علي بدا ينشهر اسمه خصوصا لجراته العاليه في كشف الاعيب الحيتان
وكتب علي هالمقال
(ساقط ولاقط)
عظم الله اجر الوطنيه دامها صارت علج بحلج الساقط واللاقط. اذا الحرامي السكير صار يتكلم عن عيال بطنها على الديره السلام
ولكن السؤال منو وراه؟ والسؤال الاكبر ليش؟
واشلون بفتره قصيره تحول من انسان حافي الى رجل اعمال؟ وانا احذر احذر احذر من مغبة التسامح مع هالاشكال واقول لحكومتنا المو رشيده ابوجهل خطر يهدد امننا القومي
وانا اطالب كل بطيخي (نسبة الى ديرة البطيخ) انه ياخذ موقف حازم من هالاشكال وخلونا نضرب هالاشكال بيد من حديد لكن
قال انفخ يا شريم قال ما من برطم
بقلم علي
وهالمقال انتشر انتشار رهيب كالعاده و(عمر الدنيا) لنه الكاتب علي ما تنطبق عليه مقولة هالمقال كسر الدنيا
وصار جدل كبير في ديرة البطيخ بسبب هالمقاله العظيمه
وبنفس الجريده فيه كاتب (سخيف) اسمه الطبل كتب هالمقاله
وا بطيخاه
يا حكومة البطيخ طبخن طبختيه يا حكومتنا اكليه
عيل كويتيين بعد السبعينات تمادوا على اسيادهم
قلنالكم هالاشكال مو كفو جناسي واتهمتونا بالعنصريه وانا اقولها واعلنها انا عنصري لاهل ديرة البطيخ (العتيجين)
واطالب من حكومتنا العظيمه انها فورا فورا فورا تسحب الجناسي من هالهيلق لنهم اصحاب التازيم في ديرتنا
لاحظوا معاي فيه واحد بطيخي عتيج ايايد اهل التازيم؟ طبعا لا
معناها انه هالهيلق هم سبب التازيم يا حكومتنا تعودنا منج الانجاز وتكفين سحبي جناسيهم
بقلم
الطبل
وللاسف للاسف هالمقاله انتشرت بالديره

والكاتب علي كان طالع من مبنى الجريده والكاتب الطبل داش المبنى وعلي تنرفز يوم شافه وتذكر مقالته وحتى الطبل تنرفز لما شاف علي وتواجهوا عند باب المبنى
علي: اهنيك يا الطبل لك جمهور كبير يقرا مقالاتك
الطبل: تتطنز هذيله انتوا تبون تاكلون الاخضر واليابس
علي: يا استاذ ليش هالنظره الدونيه ترا احنا كلنا بطيخيين والدستور نص عالمساواه
الطبل: عاد توني قاعد ويا واحد عووود وقاللي لو ندري انه هالهيلق بييون الديره جان ما سوينا الدستور
علي: لا تزعل مني بس ما اصدق كلامك لنه احنا بديرة البطيخ ديرة الخير
الطبل: تبيني اثبتلك
علي: ايه
الطبل: انته تكلمت عن الساقط واللاقط في مقالتك صح لا لا
علي: ايه
الطبل: اوك انا بدق عليه وبحط سبيكر
وفعلا الطبل دق على وانتوا بكرامه(الساقط واللاقط ) وطلع الصوت بره
الطبل:حي الله فارس ديرة البطيخ
الساقط واللاقط: هع هع الله يحييك اشلونك يا استاذنا
وبعد السلام والكلام اللي ماله داعي
الطبل: وينك يا فارسنا
الساقط واللاقط: والله معزوم عالغدا عند صاحبنا
الطبل:اوك انا اكلمك شوي باي
وبعدها
الطبل: علي سد بوزك
قام علي وكتب مقاله جديده
تازيم تازيم تازيم تازيم
4 نواب خاطفين الديره وسلاحهم الاستجواب الله يلعن الساعه اللي صار فيها التجنيس العشوائي
وحنا كلنا نفدي حكومتنا بالغالي والرخيض وراح نوقف ضد هالمؤزمين ودام عزج يا حكومة ديرة البطيخ
بقلم
علي
وتغيرت كتابات علي وقناعاته وحياته كلها بعد مكالمة الطبل والساقط واللاقط
وعلي سد بوزه

القصه السادسه (عيب )
عبداللطيف شاب خريج من احدى الجامعات الاوروبيه العريقه كان في اجتماع مع المدير العام للشركه وكانوا يتناقشون حول الطرق المثلى لزيادة الارباح وقال عبداللطيف: انا اشوف انه الفساد استشرا في الشركه وبين موظفينها و
قاطعه المدير العام: سد بوزك
وتم فصل عبداللطيف من الشركه
وصار من المسرحين ولما (تجرا) وطالب بحقوقه خصوصا عقب حملة هده خله يولي وعبداللطيف يعتبر نفسه ضحيه من الحكومه
ولكن كان الجواب سد بوزك
واظطر غصبن عن خشمه انه تتراكم عليه الديون وايصير من اهل القروض مع انه انسان مثقف ويرفض مبدا القروض الا لوقت الحاجه ولكن هذا ما جناه الحوت علي يقول لنفسه
وتحولت حياته قبل كان انسان مثقف راتبه قووووووي يمشي بكل ثقه كونه من الطبقه المثقفه ولكن الحين عليه ربط واضرار عفوا ظبط واحضار وهم مثلما ذكرت غصبن عنه بسبب سوء تقدير من حملة هده خله يولي وعبداللطيف سد بوزه


القصه السابعه (سد بووووزك)
ام سعد كانت رايحه تاخذ ولدها من المدرسه
وشافت يهال اثنين
الاول:انت يا....
الثاني : كل...
الاول: سد بوزك ...........وتصافقوا
ام سعد اوقفت عند الباب تنطر ولدها وخذته وراحوا الجمعيه
واختارت ام سعد الاغراض اللي تبيها وراحت عند الكاشير وكان قبلها واحد قاعد يحاسب ودار بينه وبين الكاشير هالنقاش
الاول: كم حسابي
الكاشير : 35
الاول: يا حرامي عبالك انا حمار الله يلعن من جمعكم حاسب مره ثانيه
الكاشير: لو سمحت يا باشا بلاش غلط
الاول: واترادد بعد؟ سد بوزك
وتهاوشوا
ام سعد قطت اغراضها عالارض واطلعت واهي امعصبه حدددددها
ردت ام سعد البيت
وكان ابوسعد يقرا الجريده
ابو سعد: تو الناس من وين راده
ام سعد: صبرا جميل وبلله المستعان
ابو سعد: علامج القطوه كلت السانج
ام سعد: يعني من وين راده وياي ولدك؟ رحت الجمعيه
ابو سعد:ما شا الله راده من الجمعيه ووين الاجياس بلله ؟
ام سعد: فوق شينك قواة عينك انا اللي رايحه اجيب ولدك بعز هالقوايل وانت مترز اهنيه بدال ما تقول قواج الله بس انت ما يبين بعينك انا بشيل ايدي من كل شي وخلني اشوف اشبتسوي بدوني
بوسعد: اقول طالت وشمخت يا ام سعد والله وقمتي اتراددين
ام سعد: ارادد وارادد بعد اشبتسوي يعني لي متى وانا ساكته
بو سعد: تكفين تكفين خفت اقول بس اكلي تبن ولا عاد اشوف وجهج مو كافي انه ربي بلاج بعد احمد انج ما تحملين انتي ناقصه
ام سعد: سد بوزك وهفته بالقلاص اللي كان يمها ..........


كلمة الكاتب
انا بعدما كتبت هالقصه رديت مره ثانيه وقريتها
وحمدت ربي اني كويتي وانه احنا ديرة الاحرار واحمدوا ربكم انه هالامور مجرد خيال كاتب لا اكثر ولا اقل
ولكن الشيء بالشيء يذكر
اهل الكويت اثناء الغزو العراقي الحقير وبغياب الشرعيه محد قدر انه يسد بوزهم ولا احد يقدر يسد بوزهم لنهم كويتيين والحريه تسري بدمهم
انا دايما دايما دايما يطري فبالي عنوان حملة سيف الكويت خالد الطاحوس (للدستور جيل يحميه) ودايما 24 ساعه ارددها
واقول للطاحوس : كفيت ووفيت وعسى ربي ينصرك على من يعاديك وقلوبنا معاك وانت تستاهل لنك وعدت وصدقت وثبت على موقفك
ويا سعد فال من لابته العجمان.

وباذن الله ان الله كتبلي عمر راح استمر في هالنوعيه من القصص وانا ماني (ساد بوزي)
بقلم
اهل الكويت

واهداء خاااص لمجموعة ال 26 !
وهم
خوات الزلم
مواطنه وبس .قمر الكويت. بنت الصقور
المبدعه امون .لطوف
كويتيه من مطير
الزلم
كويتي منتف.
شعبي الازرق. سمو ذاتي دمقراطي بحت. طلال الديحاني .محمد1 فهد الميموني لا تحزن الخيل الحر
عبدالله المطيري كويتي زمان عبدالله العبدلي
خالي الهم ابدوي الزيادي
ولنا راي جوجه العثماني


واهداء للي على راسه بطحه
اقولها ما اهاب وارفع صوتي
شي بقلبي جايد كتمانه
واللي بيزعل يا عسى مايرضى
ما اعبر الحمقان والحمقانه
ولا همني من يرسل ويتوعد
تحظر شياطينيان حظر شيطانه
واش بيحصل ازود من اللي حاصل
ازود من التهديد بالزنزانة
العز للرجال رفعة راسه
ومن ذل ذل وزوده بنقصانه
لا مستحي والله ولانيخايف
كل على حقه طويل لسانه
ما هو بلا ليا حجا يلتفت
يخاف حتى فرصة الذبانه
من قال ديرتناتشكا منا
بيت الشعر ما يشتكي عمدانه
ابيات للشاعر طلال السعيد
وعسى ربي يحفظ كويتنا من الحيتان
والحين ابيكم بردودكم تثبتون انه الكويتي ما يسد بوزه

تمت بحمد الله بتاريخ
21\11\2009
 

كويتي منتف

عضو مخضرم
من يخشى صعود الجبال يعش أبد الدهر بين الحفر

برافو أحمد..ها أنت تواصل إشعال الشموع في جنبات طرقنا حالكة السواد
لنرى مايدور حولنا من خلال كلماتك الرشيقة المبسطة.

دربك خضر ياصاحب القلم الذهبي فواصل ولاتلتفت للوراء
:وردة:
 

Alazraq

عضو بلاتيني
يعطيك العافيه أخوي أحمد و أشكرك على الإهداء ..

إسقاطاتك واضحه في الشأن السياسي و الرياضي و الإعلامي حتى لو غيرت الأسامي ..

لكن عندي ملاحظه على القصه الأولى إنك خففت من جرم (حمد) لما إعتبرته مدير شركه ..

أعتقد إن قصة (حمد) يجب أن تكتب كما هي و بمنصبه الحقيقي لأن منصبه هو مربط الفرس و مقارنته بأي منصب آخر ستخفف من فداحة الجرم الواقع ..

و تمنيت لو إنك أنهيت موضوعك بعد كلمة (العثماني) لأن ما ورد بعدها لن يضيف لموضوعك شيء بل ستعطي أهميه لمن لا أهميه له كما حدث في موضوعك الأول ..

و بالأخير أتمنى يا أحمد إن ما يكون مصيرك مثل مصير (على) لأني متأكد إنك ما راح ترضى هالنهايه لنفسك ..

واصل عطائك و بإنتظار جديدك .
 
عشت لنا حُراً ابياً شامخاً يا احمد العصيمي قصصك صالت وجالت داخل قلوبنا ولمسته بإحاسيسها وشاركتنا ما شرعنا به شكرا لك ولقلم النزيه واخيرا اقولها لك












































ولايوقف ولا يوقف ولايوقف ولايوقف ولايوقف ولايوقف ولايوقف ولايوقف ولايوقف
 

لا تحزن

عضو بلاتيني
قلم رائع وقصة أروع:وردة:
هنا ستخفف علينا الضغط من الأسماء الحقيقية إلى المستعارة حيث نستطيع التحدث عنها بأريحية
......................................................................................................................
مع الأسف يا أخ أحمد هذا هو واقعنا التعيس
بالنسبة للقصة الأولى::
واتمنى من حمد أن يواجه لو مره واحده إنتقادات أصحاب الحصة الأكبر من الشركه وأن لا يطنشهم كالعاده
يجب أن يعلم حمد أنه ليس هو المقصود بذاته إنما سياسته في إدارة الشركة التي قاعد تتدهور يوم ورا يوم وسلملي على شركة الإصلاح الوهمية

للحديث بقية عن باقي الشخصيات والقصص
 

لا تحزن

عضو بلاتيني
القصة الثانية:::
قبيح هذا ما عنده شغل غير الدفاع المستميت والأعمى عن الشحص ألي يعطيه مصالحه ماهمه شىء
أهم شي مصلحته الشخصية ..قبيح إختصاصه الدفاع عن الحرامية
عشان كل ما يمرض يودونه العلاج بالخارج وعنده فاكس ما يسكت ولا يمل ويتمتع باللسان سليط وبذئ لمن يخالفه الرأي​
 

SomeOne

عضو مميز
ابدعت وامتعت ;)

مشكور وكلام على الجرح، واتمنى التوفيق لك اخي الكريم، والى الامام انشاء الله :وردة:
 

Org

عضو مخضرم
كفوو كفوو
ولد عمي
قصة رائعه وربي أبدعت يا بعد راسي
سر بقصصك الجميله وخاصه بو طيارة خاصه :)
الي يطالب بتعليق الدستور وبعد الحل أول واحد يركض يسجل
تكفى ولد عمي أشخطه :D
أنت كذا :إستحسان:
تحيـــاتي
:وردة:​
 

سمو ذاتي

عضو مخضرم
احمد العصيمي مشالله عليك قصه وقصه وقصه لاتتوقف اخي العزيز
شكرا لك ولقلمك المبارك استمر ونحن معك
مشالله تبارك الرحمن
 
سالفتك سالفه


السؤال اللي يطرح نفسه منو اللي تسبب انه تصير سالفتي انا وناس واااااااااجد سالفه ؟

لازم نفكر وانشوف منو مالسؤول ولي متى وانا وغيري سالفتنا سالفه
الشق عوووووووووووووووووووووووووووووووووووووووووود ولكن عمك اصمخ
 

Org

عضو مخضرم
السؤال اللي يطرح نفسه منو اللي تسبب انه تصير سالفتي انا وناس واااااااااجد سالفه ؟

لازم نفكر وانشوف منو مالسؤول ولي متى وانا وغيري سالفتنا سالفه
الشق عوووووووووووووووووووووووووووووووووووووووووود ولكن عمك اصمخ
أحمد أستمر ما عليك من أحد
لا ترد على شخص بينه وبين نفسه عداوه
تحياتي
:إستحسان:​
 
عاجل
الاستاذ محمد عبدالقادر الجاسم من النيابه الى المباحث الجنائيه !

وانا من خلال هالموضوع الطيب
اعلن تضامني وتاييدي لبوعمر واظن حتى مجموعة ال 26 اللي ذكرتهم بقصتي واياي
واقول مثلما قال استاذنا نزار قباني :وكيف نكتب والاقفال في فمنا وكل ثانية ياتيك سفاح

حرية الراي والبحث العلمي مكفوله لكل انسان هذا حسب دستورنا العظيم ولكن........عم كوهينك اصمخ

وانا حزين جدا جدا جدا من هالخبر السيء ولكن حنا نقول الديره فيها اكثر من محمد عبدالقادر الجاسم يكتبون ويوجعون ويتلمسون اهات الشعب هل راح اتحولونهم كلهم للتحقيق بتهمة الكتابه !!!!!

استاذي بوعمر عسى ربي يفرج كربتك وحنا يا مجموعة ال 26 معاك قلبا وقالبا واشتقنا لمقالاتك ونوعدك نمشي على خطاك

وما ادري شقول اكثر من جذيه الغصه اللي بقلبي ما اقدر اوصفها بحكم اني انا اكتب يعني هاخير لمسني انا شخصيا ولكن حسبي الله ونعم الوكيل حسبي الله ونعم الوكيل في كوهين الكويت
 
القصه الخامسه (سد بوزك اكتب)
علي ...شاب تغذى من طفولته حب (ديرة البطيخ) ولما تفجرت عنده موهبة الكتابه قام وسخرها ضد اعداء ديرة البطيخ
وفعلا علي بدا ينشهر اسمه خصوصا لجراته العاليه في كشف الاعيب الحيتان
وكتب علي هالمقال
(ساقط ولاقط)
عظم الله اجر الوطنيه دامها صارت علج بحلج الساقط واللاقط. اذا الحرامي السكير صار يتكلم عن عيال بطنها على الديره السلام
ولكن السؤال منو وراه؟ والسؤال الاكبر ليش؟
واشلون بفتره قصيره تحول من انسان حافي الى رجل اعمال؟ وانا احذر احذر احذر من مغبة التسامح مع هالاشكال واقول لحكومتنا المو رشيده ابوجهل خطر يهدد امننا القومي
وانا اطالب كل بطيخي (نسبة الى ديرة البطيخ) انه ياخذ موقف حازم من هالاشكال وخلونا نضرب هالاشكال بيد من حديد لكن
قال انفخ يا شريم قال ما من برطم
بقلم علي
وهالمقال انتشر انتشار رهيب كالعاده و(عمر الدنيا) لنه الكاتب علي ما تنطبق عليه مقولة هالمقال كسر الدنيا
وصار جدل كبير في ديرة البطيخ بسبب هالمقاله العظيمه
وبنفس الجريده فيه كاتب (سخيف) اسمه الطبل كتب هالمقاله
وا بطيخاه
يا حكومة البطيخ طبخن طبختيه يا حكومتنا اكليه
عيل كويتيين بعد السبعينات تمادوا على اسيادهم
قلنالكم هالاشكال مو كفو جناسي واتهمتونا بالعنصريه وانا اقولها واعلنها انا عنصري لاهل ديرة البطيخ (العتيجين)
واطالب من حكومتنا العظيمه انها فورا فورا فورا تسحب الجناسي من هالهيلق لنهم اصحاب التازيم في ديرتنا
لاحظوا معاي فيه واحد بطيخي عتيج ايايد اهل التازيم؟ طبعا لا
معناها انه هالهيلق هم سبب التازيم يا حكومتنا تعودنا منج الانجاز وتكفين سحبي جناسيهم
بقلم
الطبل
وللاسف للاسف هالمقاله انتشرت بالديره

والكاتب علي كان طالع من مبنى الجريده والكاتب الطبل داش المبنى وعلي تنرفز يوم شافه وتذكر مقالته وحتى الطبل تنرفز لما شاف علي وتواجهوا عند باب المبنى
علي: اهنيك يا الطبل لك جمهور كبير يقرا مقالاتك
الطبل: تتطنز هذيله انتوا تبون تاكلون الاخضر واليابس
علي: يا استاذ ليش هالنظره الدونيه ترا احنا كلنا بطيخيين والدستور نص عالمساواه
الطبل: عاد توني قاعد ويا واحد عووود وقاللي لو ندري انه هالهيلق بييون الديره جان ما سوينا الدستور
علي: لا تزعل مني بس ما اصدق كلامك لنه احنا بديرة البطيخ ديرة الخير
الطبل: تبيني اثبتلك
علي: ايه
الطبل: انته تكلمت عن الساقط واللاقط في مقالتك صح لا لا
علي: ايه
الطبل: اوك انا بدق عليه وبحط سبيكر
وفعلا الطبل دق على وانتوا بكرامه(الساقط واللاقط ) وطلع الصوت بره
الطبل:حي الله فارس ديرة البطيخ
الساقط واللاقط: هع هع الله يحييك اشلونك يا استاذنا
وبعد السلام والكلام اللي ماله داعي
الطبل: وينك يا فارسنا
الساقط واللاقط: والله معزوم عالغدا عند صاحبنا
الطبل:اوك انا اكلمك شوي باي
وبعدها
الطبل: علي سد بوزك
قام علي وكتب مقاله جديده
تازيم تازيم تازيم تازيم
4 نواب خاطفين الديره وسلاحهم الاستجواب الله يلعن الساعه اللي صار فيها التجنيس العشوائي
وحنا كلنا نفدي حكومتنا بالغالي والرخيض وراح نوقف ضد هالمؤزمين ودام عزج يا حكومة ديرة البطيخ
بقلم
علي
وتغيرت كتابات علي وقناعاته وحياته كلها بعد مكالمة الطبل والساقط واللاقط
وعلي سد بوزه
...............................................................................................................................................

نقلت هالقصه مره ثانيه عشان اللي ما فهم يفهم واللي ما استوعب يستوعب واللي ما وصله صوتنا يوصل
حنا بنكتب وبنكتب وبنكتب ومحد يقدر يسد بوزنا

ومحمد عبدالقادر الجاسم فيه بداله اكثر من محمد عبدالقادر لنه القضيه قضية مبدا
وانا شخصيا اقول اني انا ماني ساد بوزي وراح اكتب واكتب واكتب
ونيابة عن مجموعتي ال 26 اقول محنا سادين بوزنا

الى مجموعتي ال 26 زلم
اقول
كفيتوا ووفيتوا وبيض الله وجيهكم على هالردود الطيبه وعلى الرسايل بالخاص وعلى الدعم المعنوي بكل اشكاله والوانه
وانتوا احلى واصدق مجموعه شفتها بحياتي طلبت فزعتكم ولبيتوني وما خذلتوني وكنتوا قدها وقدود
وانا دايما اتابعكم واراقبكم واستمتع بطرحكم ودايما اقول الكويت بخير دام مجموعة ال 26 فيها
وعساني دايما اكون عند حسن ظنكم وعسى ربي ما يحرمني منكم يا احلى مجموعه
فرق كبير بين هالمجموعه ال 26 وبين المجموعه اللي فبالي فرق كبيييييييييييييير
 

canavaro_wbs

عضو ذهبي
الشركات كثيره بالقصه

ولكن المصيبه

ان اهل الفساد سيطرو علي الشركات

ويمارسون كل الاساليب القذره للمحافظه علي الكرسي

لان البقاء بالمنصب اهم عندهم من مصير الشركات

شكرا لك احمد العصيمي قلم مميز دائما
 
من يخشى صعود الجبال يعش أبد الدهر بين الحفر


برافو أحمد..ها أنت تواصل إشعال الشموع في جنبات طرقنا حالكة السواد
لنرى مايدور حولنا من خلال كلماتك الرشيقة المبسطة.

دربك خضر ياصاحب القلم الذهبي فواصل ولاتلتفت للوراء:وردة:​
الله يبيض وجهك دايما وابدا ما تخذلني وصدقني موضوعي يكبر بوجود ردك

بخصوص الجراه وعدم الخشيه تاكد اني استمدها منك

واشكرك على ثنائك على اسلوبي بالكتابه صدقني من حر ما فيني

بخصوص دربي خضر....ما اظن عقب حادثة الجاسم شكله دربي حمر الله يستر
ولا تحرمنا من ردودك الذهبيه يا امبراطور الشبكه
 

كويتي طموح

عضو جديد
بوشهاااااااب والله انك مبدع :إستحسان:

قريت موضوعك حرف حرف على طوله لكن حسيت انه سطر
مع انها قصص درامه حزينه بس ضحكتني حيل

ننتظر اجزاء مسلسلك الخيالي القادمه :وردة:
 
أعلى