أحب زوجي وأحب البرابري والبحر والقعدات .!!

[آصال]

..
بسم الله الرحمن الرحيم ..

( أحب زوجي وأحب البرابري والبحر ) ..

إحدى زميلات المعهد .. قالت لي هالجمله .. وهي تتكلم عن فترة الخطوبه والزواج ..

هاذي الزميله ما إحتكيت فيها ولكن مجبوره أشوفها لأنه معاي بالمحاضره .. وحصل اليوم إنه سولفت معاي وعزمتني على العرس .. والزواج.. التعيس .. إليكم الآتي ..


تقول زميلتي الظريفه ..

ز : شلونج شخبارج هاذي بطاقتي ويشرفني حضورج ..

ح : الله يسلمج .. و ولو ...بس يصادف أي يوم ..؟ !

ز : اليوم الفووولانــي ..

ح : عموما مبروك .. ومنج المال والعيال ..

.. عقب قرقه استغرقت 20 دقيقه تقريبا ..

ز : اتصدقين انا وايد إتقدمولي بس ما وافقت وهذا فيه جذي و هذاك في جذذاك وجذوك .. وهذا .. عند أهله ويحبهم وعلى قلبهم وهذا . ما يرضى جذي اسوي وأطلع .. ويغار وايد ؟؟ والثالث والرابع والخامس .. !!..

وبعدين فكرت .. أرضى بهذا ..!. ورضيت ..


ح : ليش شفيهم .. الي تقدمولج .. وهذا شنو فيه مميز وغير عن اللي رفضتيهم ( طبعا لازم هالأسأله لانه ماكو شغل ) ..

ز : لا هذا إلي اهوه زوجي الحين .. طيــــــــــب .. حنـــــــــــون .. قلبه كبيــــــــــر ,.. جيبه كبــير ..
ويحبـــني ..
وريـــــــــــال .. وأهلي حبــــــــوه وأي شي أبيه يسويه لي ..ة .. وطاخ طوخ طيخ ..



ومتـــــــين .. وغــبـــــــــــــي .. وعلى نياتـــــــــــه ... وأقدر أسوي كـــــــــل شي .. !!!!!!!!!!!!!!!!!!!!!!!!!!!!!!:إستنكار:

ح : فقلت لها ما فهمت شلون يعنـي .. أنا فاهمه .. بس بفهم لاني ماقدر أفهم ..

ز : لا لأنه .. أنا أحب البــحر .. والبــراري .. وطلعات رفيجاتي .. وأطلع معاهم .. وأنا بس أشوف بس ماسوي شي .. وزوجي هذا طيب وغبي وعلى نياته وقلت له كلشي ورضى .. وكان شرط قبولي بالزواج .. إنه يرضى بهالأشياء ويكون فري معاي ..!! ( الدنيا خربت يا قماعه ) ..

ح : بس ؟ انتي .. ليش شنو يعني شحقه ..( ودي أقول حرام عليج .. بس بشوف آخرتها ) ..
لا مو زين لج .. صفي نيتج مع الريال .. دام كل هالمواصفات فيه .. ترى حرام وشتبين هالبنات وهالخرابيط .. الدنيا شنو بقى منها .. وانتي سمعه .. وباجر تستانسين تروحين وتيين مع زوجج .. وليش مع (ربعج) .. زوجج روحي معاه البحر والبراااااااااااااااري ( أهم شي البراري ) !! ..

ز: لا طلعة البنات (غير) .. اي شفيها خل أستانس شوي أنا بعيش طول العمر وياه .. شيصير يعني .. !!

هذا كان ردها .. .. كول سكول ..

....................................................................

حصل معاي بالمعهد هالموقف .. وجد تحسفت عالوقت .. المهم انتهت مدة المحاضره .. وقمت .. وانا مذهوله ...

نزلت بركب بسيارتي بمصافط المعهد فشفت زوجها .. ومبين عليه ريال فقير طيب .. حبوب .. وكانت واقفه تسولف مع صديقتها .. واهو ناطرها عند الباب ..

فأشرت له بصبعها .. المتبتب .. وغير مكانه وجدم سيارته . ووقف عندها بسياره... وكانت تكعكع بصوت عالي .. لمن خلصت كعكعتها .. ركبت السياره ..


فقلت واوييييييييلاه ..


أمبيه أمبيه أمبيه .. لمن وصلت للسياره .. وقلبي مقموت .. ومتحسفه على هالمسكين .. اللي صج ماله حظ بالدنيا ..

سؤالي ..!!!!!!!!!
هل صج صج في جذي رياييل ؟!! فري كويت

أو إذا فعلا يحب مرته يبيها ويبي عيبها معاها .. معقوله ..؟

وشنو ذنبه ؟؟

وبس
تحياتي :وردة:

 

[دزني و اطيح]

في مدمغين وفي طيبين...

بس هم في ذيابة ...البعض يتزوج ليتماشى مع العرف الاجتماعي فقط...أي زواج شكلي!

فسالفة الفري سلاح ذو حدين...يمكن هو فري بعد.... و ماخذها على قد عقلها!

بس طبعا في كل الأحوال هذا أمر محزن:إستنكار:

 

[آصال]

.. شلون زواج شكلي .. راح يعيش معاها عمر .. وتيب له اعيال .. عيال .. ؟!

لكن أإذا اهو صج فري .. ..لحول شنقول بعد ..

 

[دزني و اطيح]

زواج شكلي:

جدام العالم متزوج...لكن متفقين أن كل واحد فري...زواج عشان الأهل يطخون و المجتمع لا ينظر لهم بنظرة دونية خصوصا بالكويت...إذا مو متزوج قالوا عن إما عنده خرابيط أو معيوب أو...

للأسف صار الزواج لزوم البرستيج و ما هو بنص الدين..

 

[آصال]

.. أعوذ بالله من جذي زواجات ... والله لا يبلانا ..
خيبه ..
زين وانته شدراك يا الوحش بهالسواليف ؟.. اتصدق انصدمت .. يعني اثنينهم فري .. وعادي عندهم .. ؟!

 

[الصامت]

هلا باخيتنا حور الكويت موضوع رائع


هذا اما قوطي او خروف

ولا يغرك اشكال البعض سواء رجال او حريم ...

فأنا يحدثني احدهم (جمبازي وزقمبي)

تعرف على وحده متزوجه وزوجها (مطوع حكر) سألها قالها انتي مره مبين عليك الستر قالت له (واي شبعت كل يوم تفاح تفاح ابجرب البرتقال) وصارت وراها اغنية بالبرتقاله ... شوفي شلون عاد ... هذي الدنيا الله يكفينا شرها ...

المهم الكراتين واجد بهالديره ... ...​

 

[آصال]

هـلا وغـلا بالصامت .. يالله حيه ..

..زمن يخوف ..
زين .. الشااب اللطيف الفري .. ؟او الشابه اللطيفه .. ما تقول مثلا .. هالشي حرام ..وهذي الأشياء مثلا حتى لو كانت فيها لذه ووناسه مؤقته راح تزول وراح يصير في اعيال .. وما يخافون من الحوبه .. وغضب ربهم . ولا عبالهم عايشين في عالم بروحه .. خاص فيهم .. زين هذا مرض .!

 

[الصامت]

هـلا وغـلا بالصامت .. يالله حيه ..

..زمن يخوف ..
زين .. الشااب اللطيف الفري .. ؟او الشابه اللطيفه .. ما تقول مثلا .. هالشي حرام ..وهذي الأشياء مثلا حتى لو كانت فيها لذه ووناسه مؤقته راح تزول وراح يصير في اعيال .. وما يخافون من الحوبه .. وغضب ربهم . ولا عبالهم عايشين في عالم بروحه .. خاص فيهم .. زين هذا مرض .!

الشاب والشابه الفري ما يقولون حرام يقولون عيب والعيب هو اللي يصدهم وليس الحلال والحرام بارك الله فيك

احنا محد خرب اخلاقنا الا الحرام والحلال وعلى كيفهم ... بينما لو قلتي عيب فالكل يستحي ,,,

 

[آصال]

.. تسلم إيدك .. كلامك عين العقل .. وشكرا على مرورك .. أقول بس ديربالك من الجمبازي والزقمبي

 

[الصامت]

.. تسلم إيدك .. كلامك عين العقل .. وشكرا على مرورك .. أقول بس ديربالك من الجمبازي والزقمبي

قصدك هم يديرون بالهم مني ....

 

[المجهر]

انا اقول لا تكن لينا فتعصر ولا تكن صلبا فتكسر

 

[Clock]

النوعيه هذي موجوده .. و انا لي تجربه مع واحد منهم .. حاولت اعدله بس لاحظت اني قاعد افرض شخصيتي عليه و لاني مابي اجابله طول العمر و شايفه قاعد يسألني عن شغلات خصوصيه فقلت اخلي الريال بطريجه و الله يعينه ..

اما موضوع الفري .. فوايد ناس فري و عايشين احلى عيشه .. و بنفس الوقت في ناس متزمتين و طلعتهم بالحسره و حياتهم بارده و كئيبه .. و الواحد ما لازم يصير اوفر .. يحترم نفسه و مرته و يعتدل ..

بس انا شايف ان للزوجه حق انها تطلع البحر و تقعد مع رفيجاتها او اقاربها مافيها شي

 

[Normal]

هذا دلخ وفي منه كثير كثير كثييييير

الي ما يدرون حريمهم وين يروحون بالليل

الزوج طلع منيه لدوام عليه استلام او دوامه شفتات وهي تطلع مناك للقعده والوناسه

ومخيمات العبدلي كيلو 8

 

[آصال]

Clock .. اول شي الله يصلح رفيجك .. ثاني شي انا مو قصدي انها ما تطلع مع صديقاتها واقاربها بالعكس .. بس هذا اكبر من تصورك عزيزي مطلبها فريييييي .. .. عبايه .. .. لالا رحت بعيد .. انا اقصد شلون الزوج يرضى على زوجته انها تطلع مخيمات وبحر مع صديقاتها .. واماكن نفس هاذي .. واهو توهه متزوج .. ويعني مادري شقول

انصدم لمن يكون شرط الزوجه جذي .. وحتى لو كانت عايشه بين أسره ملتزمه حيل .. يعني يا ابيض يا اسود .. يا أكون ملتزمه .. او فري ومخرباها عالآخر ..

وشلي يمنع انها تطلع .. مع زوجها البحر وغيره .. واللي اقصده ليش .. صار الزواج جذي .. كل واحد يحقق رغباته الفاسده والمتدنيه .. باسم الزواج ..
المجهر .. اقول ماكو على الصلب مالك شغل .. شكرا عالمرور

 

[آصال]

بو النيف .. الله يعدلهم ويصلحهم .. ويهديهم ..

ولا هالطريج ما وراه .. غير المصائب .. والتفكك .. والتعب النفسي .. والعبره بالنهايه عموما .. عمر الحريه ماكانت بهالطريقه .. والزواج مو شي سهل .. بس محد ماخذه بعين الاعتبار ..

وسلامتكم جك دم دم جك

 

[clashman82]

يا حور



كثير من الرجال بهذه الطريقة

و كثير من النساء بهذه الطريقة

لكن على قولتهم..لو خليت خربت


...


غياب الوازع الاخلاقي الديني هو الاساس..

 

[نورالكويت]

السلام عليكم

مشكورة حور الكويت على هالموضوع الحيوي

طبعا الرجال مو رجال اللي يتصرف بهالاسلوب

واهي اختارت رجل بالاسم فقط لتمارس ماترغب وتحب

واهو راضي باللي تسويه زوجته كونه الحلقه الاضعف

في النهاية تكون العبره ..

هي قريبه من زميله لي كانت تعايرني بزوجي العصبي واللي كنت اشوفه ريال وان كان عصبي فهو رجل شرقي بمعنى الكلمه ..

طبعا كنت استغرب تصرفاتها مع زوجها اللي تاركها تفعل ماتريد

طبعا انا ابتعدت عنها لسوء تصرفاتها واللي ماتناسبني كوني عندي الحرام حرام وانا يمكن اقوى منج لاني قلت لها كلمة حرام 50 مره

مثال : كانت تقول لي ليش ماتعطرين وتحطين مكياج وتدلعين .. انا : اقول لها حرام وغيره من هالامور وابتعد منها ولا ارد على تلفونها

بعد مده شفتها وماتشرفت بشوفتها وعرفت منها انها انفصلت وعايشه بروحها مع بنتها اللي عمرها سنتين

وخذت حريتها الكامله وصارت تطلع مع هذا وتقابل هذاك وبعد كل التفسيرات عرفت انها مو سعيده بحياتها ,,

طولت عليج ..

بس الله يهدي الجميع وهالنوعية عندي اهون من النوعيه اللي في بالي

والف شكر

 

[الصهيبي]

دعي عنك هذه الحثالة ...وابتعدي عن الاهتمام بسلوكياتهم المنحطة ..التي ظاهرها سعادة وداخلها عذاب نفسي ..
وهالنوعيات موجودة منذ الازل
المهم ان تجتهدي بحسن اختيارك ...

تأثري بالخير لا بالشر


.

 

[whahd1]

في صلب الموضوع ثغره بالقانون تحقق رغبات ها النوعيه من الزيجات

انه اي الزوجين يستطيع اخراج الطرف الاخر من قضيه الزنا باي مرحله من مراحل الدعوى وتنفيذ العقوبه اذا تعهد باستمرار الحياه الزوجية

مصيبه قانونيه تستغل من ضغاف النفوس وهذا القانون يجب ان يلغى نهائيا

ولو انه وضعه كان بنيه سليمه واهي المحافظه على الاسره وبيت الزوجيه

وفي اكثر من قضيه سمعت عنها باستغلال سيئ لهال القانون من قبل ضعاف النفوس مابي اقولهم لانهم ما يصلحون للنشر

 

[المحتجب]

في صلب الموضوع ثغره بالقانون تحقق رغبات ها النوعيه من الزيجات

انه اي الزوجين يستطيع اخراج الطرف الاخر من قضيه الزنا باي مرحله من مراحل الدعوى وتنفيذ العقوبه اذا تعهد باستمرار الحياه الزوجية

مصيبه قانونيه تستغل من ضغاف النفوس وهذا القانون يجب ان يلغى نهائيا

ولو انه وضعه كان بنيه سليمه واهي المحافظه على الاسره وبيت الزوجيه

وفي اكثر من قضيه سمعت عنها باستغلال سيئ لهال القانون من قبل ضعاف النفوس مابي اقولهم لانهم ما يصلحون للنشر

اعتقد ان مثل هذه الزيجات تبحث عن صداقه كون الازواج ممن على هذه الشاكله

ليست لديهم بعضاً من الحنان والحب والكلمات الشفافه فحبذا ان تسئليها

فزميلكِ لديه حنان يوسع بلد