سؤال وجواب ولدي يبي سيارة .. !

[الكاشونة]

عندي ولد ( الله يخليه ) يدرس في أمريكا من سنة تقريبا ً ..

و من مدة و هو يبيني أشتريله سيارة .. و مو أي سيارة .. يبيها سبورت و كشخة ..

الصراحة انا غير مقتنع بحاجته الضرورية الآن للسيارة لأنه ساكن داخلي و جامعته

فيها كل ما يحتاجه .. مطاعم و سوق مركزي و بنك و عيادة .. وغيرهم ..

و أيضا ً سالفة السيارة السبورت الكشخة .. ماني بالعها بالمرّة ..

و عندي والدته هنيه ( الله يهداها ) تؤيد أني أشتريله السيارة اللي يبيها ..

و حجتها علي أني كان عندي سيارة سبورت من أول سنة دراسة لي في أمريكا ..

حاولت أقنعها أن الوقت غير الوقت .. و أنه مو محتاج سيارة الحين ..

و فوق ذلك .. تكلفة مالية مالها داعي .. هو رايح يدرس و إلا رايح يكشخ ويتفرفر في

الشوارع .. خصوصا ً أنه ( ربي يحفظه ) مطيور و ما هو راكد مثلي في عمره ..

و أخاف عليه تصير له السيارة السبورت سبه لا سمح الله ..

شتشيرون علي ؟​

 

[اه منكم منقهر]

الله يخليك لولدك ولنشالله اشوفه متخرج واشوف اعياله وثاني شي اشتراه سياره وعلي فكره اي واحد يروح امريكا يحتاج لسياره والصراحه انا اعرفلي كم واحد كل ما اسأله عن سيارته يقول سبورت لانه ما يمشي غير السبورت بامريكاا واذا ما شريتله ما يركز بالدراسه يفكر بس بالسياره :وردة:

 

[ابو مناحي المطيري]

انا اقول اشترلة ددسم موديل 1992م احسن

سعرها رخيص ... ونادرا في امريكل << يعني السيارة مميزة >> ... ومنها يكد فيها هناك و يطلع فلوس ...

 

[خـالد]

قوليله سعر البترول هناك غالي وشاب نار وراح يهد ميزانيتك وبامريكا اللي مايمسك ميزانيته ويعتمد على مصادر ثانيه ماراح يعيش (يعني لا يحسبها نفس الكويت فلوسك تجيك وانت قاعد ، خليقضب فلوسه وعن الخرابيط كل شي متوفرله حمدلله وخصوصاً انه اول سنه خلوه يركد شوي.).

 

[mxm8]

الله يحفظ ولدك ان شاء الله
نصيحة لاتشتريلة شي مادام كل شي متوفر عندة ..... راح يزعل جم يوم وبعدين يرضى اهو شباب الحين وحرج ويبي كل شي فنصيحة حاول تناقشة ان هالشي مو من مصلحتة خصوصا في امريكا القانون صارم

واذا امة زعلت عليك طلقها وخلها تلحق ولدها
لايامعود اتغشمر لاتصدق

الله يحفظهم لك

 

[ابو هزاع]

وشرايك تشور عليه

موتر رزّة وهيبة

فخم ولا يتوقعها وتكون بعد عودته من الخارج..

الله يحفظه لك..



.

 

[غنيم الزعبي]

الله يخليه لك..ويصلحه..اخي الكريم السيارة الكشخة والسبورت راح تفتح عيون الناس عليه هناك وراح تجذب الناس السيئين..قول له بيض الوجه بالعلامات واذا صرت بنهاية سنة ثانية ابشر..

 

[الديمقراطي]

الله يخليه لج ويحفظه ويرده لج بسلامه
أما أذا شريتيله سياره سبورت وكشخه راح تلهيه عن دراسته وتشغل وقته وتفتح عيونه على أشياء أهو غافل عتها ................
أنا أصحج أنج تشتريله سياره أقتصاديه تقوم بالواجب مثل كامرى .أريون .أفلاون.ومن أنواعها

 

[الميموني7]

والله يا خوي دامه يدرس نصيحة لا تشترى له سيارة وخاصة سبورت

قسم بالله ساعتها بيقضى أكثر وقته قز بالشوارع ويهمل دروسه

انصحه أن ماله حاجة بالسيارة الحين وطلع له من المبررات الكثيرة لين يقتنع فيهن

والله يوفقه إن شاء الله

 

[بقيييط]

خله ياْجر سياره من المصروف صدقني بغير رايه مع الوقت

 

[الكاشونة]

الله يخليك لولدك ولنشالله اشوفه متخرج واشوف اعياله وثاني شي اشتراه سياره وعلي فكره اي واحد يروح امريكا يحتاج لسياره والصراحه انا اعرفلي كم واحد كل ما اسأله عن سيارته يقول سبورت لانه ما يمشي غير السبورت بامريكاا واذا ما شريتله ما يركز بالدراسه يفكر بس بالسياره :وردة:

ربي يحفظك و اللهم آمين

و الله إني فكرت وايد أشتريله السيارة .. لكني للحين ماني مقتنع

خصوصا ً السبورت .. لأنها أكيد سريعة وهو مثل ما قلت لكم " مطفوق " الله يصلحه

و الله العظيم إني خايف عليه من نفسه مو على الفلوس

:وردة:​

 

[الكاشونة]

انا اقول اشترلة ددسم موديل 1992م احسن

سعرها رخيص ... ونادرا في امريكل << يعني السيارة مميزة >> ... ومنها يكد فيها هناك و يطلع فلوس ...

يسعدك ربي ..

إيه ..هذي الشورة السنعة

و الله أني من كثر ما ضحكت دمعت عيوني و ماعدت أشوف

الكيبورد .. نسيتني همومي ..

:وردة:​

 

[عتريس]

اشترررررله يااحجي اخرررر العمرر موووووت خل الولد يستاانـس

 

[الكاشونة]

قوليله سعر البترول هناك غالي وشاب نار وراح يهد ميزانيتك وبامريكا اللي مايمسك ميزانيته ويعتمد على مصادر ثانيه ماراح يعيش (يعني لا يحسبها نفس الكويت فلوسك تجيك وانت قاعد ، خليقضب فلوسه وعن الخرابيط كل شي متوفرله حمدلله وخصوصاً انه اول سنه خلوه يركد شوي.).

بذمتي عجزت و أنا أقول له هالكلام .. السيارة يبيلها مصاريف .. سيرفس .. و دهن ..

سفايف و تواير .. حتى لو كانت جديدة .. و قطع غيارها بتكون غالية حيل إذا كانت

سبورت و كشخة .. و طبعا ً غير مبلغ التأمين اللي بيكون عالي لأنه صغير في العمر ..

و صعوبة أنه يلقاله مصفط للسيارة سواء في الجامعة و إلا في السوق ..

لكن عمك أصمخ ..

:وردة:​

 

[عزيز وغالي]

مدام كل شي متوفر عنده ليش السياره
ما عليك من كلام الحريم تلاقيه يحن علي امه تكلمك
وانت تعرف علي الاغلب الحريم حنتهم عاطفيه ولا يحسبون للامور حساب

وانصحه بلتي هي احسن
يهتم بدراسته ودينه واخلاقه
وخله يشوف الطلاب الي مثل مستواه
ومن يجي الكويت يبشر بالخير

المهم خلك حازم وقرارك وان كان صارم ولكن لمصلحته ولمحبته
وهو ان شافك حازم راح يهون
وقد تمثل الشاعر وقال :ان كنت ذا راي فكن ذا عزيمة فان فساد الرأي أن تترددا

وان شاء الله يرجع لكم سالم غانم ناجح وانتوا سالمين معافين

 

[الكاشونة]

الله يحفظ ولدك ان شاء الله
نصيحة لاتشتريلة شي مادام كل شي متوفر عندة ..... راح يزعل جم يوم وبعدين يرضى اهو شباب الحين وحرج ويبي كل شي فنصيحة حاول تناقشة ان هالشي مو من مصلحتة خصوصا في امريكا القانون صارم

واذا امة زعلت عليك طلقها وخلها تلحق ولدها
لايامعود اتغشمر لاتصدق

الله يحفظهم لك

اللهم آمين ..

يخليك ربي و يحفظك لكل من يعزك ..

هذا اللي قاعد أسويه معاه .. لكن مشكلتي أمه .. موافجته على طلبه و توعده إنها

بتقنعني أشتريله السيارة ..

و اشدعوه ما فكرت أسوي بنصيحتك .. لكن كل تذكرت عشرة العمر معاها .. أهون ..

تحياتي :وردة:​

 

[SOPMOD]

المشكله مو في السياره ...المشكله ان يبي سياره سبورت ..

1-اول شيىء انت تقول ان الولد مطيور ... يعني لازم تخلي بالك عليه من قوانينهم ..يعني مثل ماانت عارف لو طاف الاشاره يتحول محاكمه على طول ...وبكل بساطه ينحكم عليه بالسجن (الله لا يقوله ويحفظه ان شاء الله)

2-السياره السبورت بتفتح العيون عليه ..لان اغلب الطلبه الامريكان يضطرون ان يشتغلون في وظايف ثانيه عشان يسددون رسوم دراستهم ...وتبيهم يشوفون واحد بنفس عمرهم يتفخشر بسياره سبورت !!!

3- شوف مستوى الامان في الولايه ...لأن السيارات تبنباق (بالدقيقه) في امريكا ...

4-وهذا الاهم ...السياره السبورت والكشخه ..ممكن ان تفتح عيون البنات عليه ....وهذا اخطر شيىء بالموضوع لأن بيضيع دراسته ويمكن ان يصيبه امراض بعد !!! ( الله لا يقوله ) !!!! ماتقولي ابالغ , لأن هذا الحاصل حاليا ..

5- البانزين غالي بأمريكا .

حاول تقنعه ان يشتري سياره صالون عاديه ...و اوعده لمن يرد الكويت ان شاء الله ان تشتريله السياره اللي يبيها ....
وما عليك من حجي الحريم ولو ماقدرت خلهم يقرون الردود ...


الله يحفظه لك و ايرده لك سالم ان شاء الله مع شهاده ماتدخل الباب من كبرها
​

 

[الكاشونة]

وشرايك تشور عليه

موتر رزّة وهيبة

فخم ولا يتوقعها وتكون بعد عودته من الخارج..

الله يحفظه لك..

.

و الله يا خوي قلت له بدال المرة ألف هالحجي .. أشتريلك اللي تبي .. و أحسن لك لما


ترجع و انت متخرج و بعدك شباب .. ومهندس .. وتكشخ جدام أهلك و معارفك و ربعك ..

لكنه يطخ شوي و بعدين يرد على سالفته القديمة ..

ربي يسلمك و يحفظك إن شاء الله ..

:وردة:
​

 

[الكاشونة]

وشرايك تشور عليه

موتر رزّة وهيبة

فخم ولا يتوقعها وتكون بعد عودته من الخارج..

الله يحفظه لك..

.

قلت له ابشر باللي تبيه .. بس اصبر شوي للسنة الثانية بعد ما تشوف أنك ماشي بالدراسة

زين .. و تعودت على الحياة هناك و عرفت الديرة .. و ممكن أشتريلك سيارة عادية تقضي

حوايجك فيها .. و السيارة الكشخة خلها ليما ترجع و أنت متخرج ..

يقتنع بكلامي شوي بعدين يرد يحن على امه .. و هي طبعا تحن على راسي ..

هذي البلشة و الله ..

ربي يخليك و يسعدك

:وردة:​

 

[الكاشونة]

الله يخليه لك..ويصلحه..اخي الكريم السيارة الكشخة والسبورت راح تفتح عيون الناس عليه هناك وراح تجذب الناس السيئين..قول له بيض الوجه بالعلامات واذا صرت بنهاية سنة ثانية ابشر..

ربي يسلمك و اللهم آمين

هذا اللي آنا قاعد أقوله لأمه و أعيده .. أهو طالب و صغير في السن .. الكشخة

أكثر من اللازم مالها داعي .. تضره ما تفيده ..

لكن منو اللي يسمع ..

:وردة:​