حماية المستهلك

[نيزك]

السلام عليكم ورحمة الله وبركاته​

صار معي موقف وحبيت انقله لكم​

حتى يستفيد الكل​

لما رجعت البيت من الدوام​

بلغوني الاهل ان فيه قطعه كهربائيه لا تعمل (مكنسه كهربائيه)​

اخذت القطعه ورحت حق الكهربائي في الجمعيه​

وقلت له صلحها​

اتصل فيني الساعه 8 باليل وقال تعال استلم القطعه​

لما وصلت له قال سعر التصليح 8 دينار​

استغربت​

لان القطعه لو ابيعها ابكبرها يادوب اتجيب 8 دنانير​

صار بيني وبينه شد​

طبعا صاحب المحل هندي​

قلت له ترى بدق على الشرطه​

قال وبكل شموخ (سوي تلفون حق شرطه)​

ولما اخذت تلفون المحل وضربت على رقم الشرطه وهو يشوف​

ودرى ان السالفه صج​

راح واتصل على معزبه​

المهم ردو علي العمليات​

قلت للموظف ابي رقم حماية المستهلك​

وعطاني الرقم​

ولما سديت الخط​

الا الهندي شاهر تلفونه النقال بوجهي​

والخوف تارس عيونه​

اخذت التلفون الا هذا صوت واحد كويتي​

يسئلني عن الموضوع​

وقلت له اللي صار وبلغته اني راح اتصل على حماية المستهلك​

قال يامعود والله انا تأذيت منهم وادفع اللي تبي تدفعه​

قلت لا يالغالي مابي اظلمك ولا ابيك تظلمني راح اتصل على حماية المستهلك​

وهم يقصون الحق فيما بينا​

وبعد حلفان منه وطلبات ​

قلت خلاص بعطيه نص القيمه وماراح اتصل على حماية المستهلك​

المهم اخذت القطعه​

وانا راجع البيت الا الهندي يتصل علي​

بابا هذا مكنسه مافي تصليح رجع​

طبعا عصبت عليه وقلت شلون تاخذ الفلوس وانت ماصلحت شي​

وسديت الخط​

الا هذا رقم نقال يتصل علي​

طلع اخونا صاحب المحل الكويتي​

وحلف علي اني اخذ فلوسي وتصليح المكنسه مجاني من المحل وعليه كفاله​

هذا هو رقم حماية المستهلك 22480000​

لكن السؤال​

هل حماية المستهلك تجدي نفعا لنا كمواطينين​

بيني وبينكم انا قبل اخذ النقال من الهندي واكلم صاحب المحل​

اتصلت عليهم ولا احد رد!!!؟​

الموضوع يهم ارباب الاسر اللي يعانون من جشع العماله في البلاد​

وكم من صاحب مهنه يرفع اسعار التصليح دون حسيب ولا رقيب​

ودائما ما اسمع قصص عجيبه وغريبه​

يعني مثلا شنو قصة الكمبريسن في المكيفات​

كل ماتروح محل مكيفات تصلح مكيف​

اول شي يقولك ​

بابا الكمبريسن فيه خراب​

ياناس ماصارت​

والله هالعماله طايحه فينا​

ولازم اتلف على المحلات وتشوف الاسعار لحد ماتلاقي ابن حلال يعطيك السعر الصجي​

اللحين يا حماية المستهلك​

عرفنا رقم التلفون​

وبس​

مانعرف عنكم اي شي ثاني​

وماندري شنو اتسوون لو نتصل فيكم​

واذا احد من الاخوان عنده تجربه واتصل على حماية المستهلك يبلغنا​

ترى ملينا من مواضيع المنتدى المعتاده ( تطرف . وزاره دايحه . العضو قال . الوزير قال)​

نبي مواضيع تنفعنا في اقتصادنا وفي الشئون الداخليه​

ولا تستحقرون بعض المواضيع​

ترى فيها بناء للوطن​

وحمايه للمواطن​

 

[سالم العبدلي]

حماية المستهلك نمر على ورق .

 

[مبرووك]

اخذ عندك من واقع تجربه حماية المستهلك يبون اوراق واذا عندك اوراك تثبت كلامك يطلبون راعى المؤسسه او المحل ويطلبون منه حل الموضوع ودي واذا رفض رفعو تقرير للمحكمه طبعا مع الاوراق والمحكمه هى الى ترد لك حقك وسلامتك .

 

[مالك عذر]

ترى العماله الي بالمحلات هم النصابين وراعي الحلال لكويتي
نايم بالعسل مايدري عن شي
انا مره وديت لاب توب اسويه بحولي شارع بن خلدون محلات الكمبيوترات النصابين الي هناك الى من رحم ربي
تصدق باقو الجنطه لا وعينه قويه يقولي انت ماجبتها بهتني الهندي
والله رفع ظغطي وشوف رخصه المحل موجوده وفيها رقم صاحب المحل وادق عليك هو سمع صوت معزبه قالي خلاص خلاص بابا انا يدور مره ثانيه
شوي ولا مطلعها الحيوان
شتسوي فيه بالحاله هذي

 

[واحد من هالناس]

أي حماية مستهلك وأي يحزنون
يا حبيبي البلد طايحين فيه نهب ثروات من الشق للشق وانت تقول حماية مستهلك
التجار نهبوا البلد بكبرها تبي أكبر دليل على ما أقول ؟ تخيل أنه اغراضك لو تشتريها من برى يسوون علينا جمارك التجار وسعر الجمركة + سعر البضاعة اللي تشتريها تكون ارخص بالكويت فعلشان جذيه مطلعين قانون الجمركة على البضائع مو كافيهم سرق بخلق الله حتى يبون الناس يشترون من عندهم مو من برى
^^
هذي أتفه مشكلة فما بالك بالاشياء الثانية
خلها على ربك لو الديرة فيها خير كان حطوا وزير صارم يخنق التجار خنق ويمشيهم على الصراط المستقيم بدون ما يرفعون السعر على كيفهم ويجمركون على كيفهم ويمنعون على كيفهم لكن حكومتنا متخاذلة قدام التجار

 

[مزدحم]

أنا طال عمرك شريت مره موتور من الكاظمي

شغلته على مشروع عندي وما نفع لأن السرعة الخارجة منه ما تشغل الحمل اللي عندي

كان قيمته بـ 75دينار تقريبا

المهم رديته له رفض يرجعه ورفض يوصلني للمسئول ورفض حتى يرد علي

رفع ضغطي ورحت لحماية المستهلك بجبرة الخضرة بالشويخ

طبعا مالهم خلق يشتغلون ويحققون وياك ويطولونها وهي قصيرة وانا بس ابيهم يكلمون الشركة بس

ادري ان اتصال منهم ينهي الموضوع

أقولهم الموتور عليه ان السرعة الخارجة 100 (مثلا) وهي بالواقع 80 حسب جهاز قياس وياي

يقولون لا وشلون تثبتها ويمكن جهازك مو دقيق طبعا هالنقاش وهم يصبون لي شاي ( يبون يقزرون الدوام)

آخر شي طاعوني ودقوا على الشركة

رحت لهم فتحوا الدرب على طول للدور الثاني ومكتب المدير وشاي وقهوة وحياك الله وحنا آسفين وهذي فلوسك !!!

تخيل لو كل مواطن ما يسكت عن حقه

ولو كل موظف بحماية المستهلك يخلص بعمله

كان حتى الطفل الصغير تطرشه يشتري لك مكاين مستعملة محد يغشه

آسف للإطالة بس حبيت انقل لكم تجربتي

؛