شكرا لكل من شارك وبنسبه للسفر شهر 3 ومدة الرحله 10 ايام والميزانيه بدون التذاكر والسكن 1200 دينار
الله يبارك في اعماركم ومشكورين يأخوان شكلي بروح ماليزيا هل ماليزيا بلد محافظ؟
كفيت وفيت وكلامك راح اكتبه في ورقه وبحفظه صمشوف حجي طموح .... اسمع وانا اخوك ..... أشور عليك انك تروح ماليزيا لعدة أسباب :
1- جوها مقبول وجيد في هذه الفترة .
2- قلة الزحمة والسياح وغثاثة القلب .
3- بلد محافظ ونظيف وأمان .
4- فيها العديد من الاماكن السياحية والانشطة الترويحية .
5- مناسبة لميزانيتك المقترحة .
أما جدولي المقترح لك هو التالي :
1- اختر طيران الامارات أو الاتحاد (بس ملاحظة جدا مهمة ... اذا الله كتب وزرت ماليزيا وتسوقت وشريت الصوايغ وحسيت انه عندك وزن زايد .... لازم تشحن أغراضك عند أي شركة شحن وهالامر جدأ سهل وتكلفته بسيطة .... لأنهم ما يرحمونك لو بكيلو واحد في المطار وساعتها راح اتوهق ) .
2- عند الوصول الى كوالالمبور (أول ليلتين فقط) أنصحك بمنتجع (سن وي لاجون) عبارة عن فندق فخم وملحق به مول بالاضافة الى مدينة العاب مائية رهيبة .... عند وصولك للاستقبال بلغهم انك في شهر عسل (Honny Mooner) وقول لهم انك تبي تغير الغرفة الى شاليه (بنغلور) راح تدفع زيادة تقريبا 20 د.ك في الليلة ... بس المكان فعلا يستاهل هالليلة الحلوة يا معرس .
3- بعدين .... جزيرة بيننغ (3 أيام) واسكن في فندق شانغريللا .... هادي وحلو وراقي ..... والجزيرة فيها أسواق حلوة وطبيعة وجبال بالاضافة الى رحلات لبعض الحدايق والمعابد والمصانع وهذي سهلة لأن أي تاكسي بتركب فيه بوريك صور هالاماكن وانت ماعليك الا تختار .
4- عقب يا المعرس .... ارجع كوالالمبور وكمل باقي رحلتك بس اسكن في فندق الميرديان لأن موقعه في بطن المعمعة والسوق والمطاعم والمولات .... وأنصحك انك تروح الاماكن التالية :
- مرتفعات جينتينج (نهار كامل) ياخذك التاكسي من الصبح ويوصلك الى محطة (التليفريك) تقص التذكرة (300 فلس) واركب انت مع المدام وتمتع بالمناظر والجو .... شوي توصل جينتنغ وهي عبارة عن سفح جبل فيه فنادق ومطاعم والعاب ونشاطات مختلفة ... بس لا تنسى تاخذ رقم راعي التاكسي لأنك راح تدق عليه قبل لا تنزل بساعة .... ولا بتوهق تالي ... (لحد يقص عليك من مكاتب السفريات ويقول لك احجز لك ليلتين في جينتنغ لأنها حدها يوم .... بس ضروري تشوفها) .
5- زيارة ليلة لمنتجع (افاموزا) فيه رحلة بالمنطاد وسفاري وشي عجيب .
6- حدايق (الطيور - الحيوانات - الفراشات - الزهور) وكلهم جنب بعض .
7- مصانع (الحرير - اللؤلؤ - الساعات - الجلود - الكاكاو :إستحسان:..... للصوايغ) .
8- المعابد الصينية والهندية وقصر الملك والمساجد ..... صراحة شي عجيب لا يطوفك .
9- منطقة شلالات (نسيت اسمها) .
10 - الاسواق (Twin Tower - Time Square-Mega Mall) .... سوق الليل الصيني بس حط بالك منهم تراهم شياطين واكسر بالسعر .... اذا قال لك 1000 قول له 200 ... بس حط بالك وتركد تراهم مجرمين .
11 - المطاعم عد وخربط حولك الطربوش اللبناني ومطعم عراقي وبلانيتهوليوود - ومكدونالد - والمولات تفيض من المطاعم .
للتذكير : احجز الفنادق مع وجبات الريوق يالمعرس .... لا تنسى الكاميـــرا ولا سفرتك بلاش .
الله يتمم عليك ويوفقك ويرزقك الذرية الصالحة انشالله .