مفكرة أغير سيارتي ان شاء الله ... ممكن خبراتكم؟

[غرّاء]

موديلات 2008 أعتقد نزلت. ومفكرة أغير سيارتي ان شاء الله

ودي اعرف اسعار بعض السيارات ... ممكن تفيدوني ... ما لي خلق أروح المعارض .. البياعين ياكلون الواحد ويسوون له البحر طحينة مثل ما يقولون

هوندا أكورد

كامري GL محرك 4 سلندر

كامري SE محرك 4 سلندر


وبالنسبة لل lexus شنو ارخص موديل؟

وشلون هالسيارات الأربع باستهلاك البنزين؟ لان سيارتي الحين وايد صغيرة واستهلاكها بسيط وابي سيارة تكاليف البنزين فيها عالية لانه اصلا مو محتاجة سيارة كبيرة بس مليت وابي اغير واتطور شوية



وشكرا مقدما

 

[the man]

التويوتا 6 سلندر بكافه انواعها ممتازه
الهوندا اروعهم
النيسان مش بطاله

براي ان الهوندا افضلهم, لكن اشتري العوده, ما ا عرف اسمها بس هي بصراحه روعه.
الالماني حلو بس غالي

 

[وليد المجني]

غراء .. في البداية لابد أن تنظرين لعدة عوامل أولها ميزانيتك المقرره للسيارة أو قيمة القسط اللي تقدرين تدفعينه كي نتمكن من تحديد افضل نوع سيارة تتناسب مع القيمة الشرائية ... وفي نفس الوقت تطلبين التغيير والتطوير لسيارة أفضل إن شاء الله راح اتشوفينها بعد عرض واقعي يتناسب مع الاجواء العامة لانج اذا بتدفعين قسط اكيد لا يقل عن خمس سنوات فلابد ان يكون هناك بعد نظر للسيارة من حيث الصيانه وقطع الغيار مما يتناسب مع القسط ايضاً .

ومن وجهة نظري الخاصة إن اللكزس فئة الـ Es Or Is لهم نصيب الأسد من جميع النواحي سواء صيانه أو اعتدال في سعر قطع الغيار او مواكبة للشارع العام والتطوير المنشود إليه في ظل الميزانية المحدوده .

يعني تقريبا بيكون سعر القسط بدفعة بسيطة جداً مع تثمين السيارة القديمة = 130دينار لمدة 5 سنوات مع دفعة أخيرة قيمتها 1000 دينار .

وموفقه ان شا ءالله

 

[غير قابل للمساومة]

غراء انصحج تشترين من تويوتا اوريون ​

الصراحه هالسياره طلعت طلعه وشكلها حلو وسعرها معقول يعني بحدود الـ 6500 يعني يمكن مع الاقساط تطلع 7500 او 8000
انا شخصيا افكر ابيع سيارتي واخذ اوريون بس منحرج من الوالد ماصارلي سنتين ماخذ سياره جديده غير السياره الي كانت عندي قبل لا ومن الساير بعد وتعال شلون تقنعه ليش تبيع السياره الجديده وتشتري وحده ثانيه ​

اتركج مع صور السياره ​

الصراحه ياجماعه الياباني بدأ ينافس الالماني في السيارات​

ولكن يبقى الالماني شيخ الشيوخ لجميع السيارات ​

 

[السلطاني]

أنا اقول بلا سيارات جديدة...وبلا اقساط...

شرايج تروحين حراج السيارات...على طريق الجهراء..بالقرب من وصلة الدوحة....





كامري كحلية..نظيفة...والله وكيلك...ومحمد كفيلك....إستعمال خفيف....!!

أو ماكسيما...

أو ممكن لك تاخذين جولة..بالحراج...والسوق أمان..ومحد راح يضايقك....!!

إنتي تعالي بس...!!



_ هذا التعليق من شريطي سابق....والآن عضو لجنة تحكيم ل برنامج شعري..ومقدم برامج هابطة..!!

​

 

[بدرية]

وابي سيارة تكاليف البنزين فيها عالية

عشتوا ... الظاهر فلوسج زايدة يا وخيتي

لو يسمحون لنا نسوق في السعودية جان أشتري بي إم دبليووو

 

[يا وطن]

نصيحة أبوية أو أخوية ...تويوتا ..كامري أواوريون ..أو لكزس كما نصحك الأخوة و4 سلندر تكفيك 6 سلندر لا تصلح لك والله الحافظ لانها طيارة.
شخصيا اشتريت قبل عامين لابنتي كامري 4 سلندر جديدة وهذا العام لابني سي ال كي 200 "مستعملة"
باختصار اشتري تويوتا او لكزس على قد الفلوس واذا شوي عندك كم بيزة اخذي ألماني بي ام او مرسيدس "4" سلندر.
ولا تسمعين كلام بو نورة وتاخذين ماكسيما ترى ما تسوى .
والله أعلم .

 

[غرّاء]

أول شي تصحيح لخطأ شنيع
أبي شي ما يستهلك بنزين وايد يعني 4 سلندر ولو في 2 سلندر جان أخذت
أنا سواقتي على قدي وبصراحة خوافة وما احب اسرع ... ف 4 سلندر ووايد علي



في الغالب راح اجرب حظي واستخدم سلاح الحنّة المنزلي واخذ قرض أسري حسن واشتريها كاش مو اقساط فياريت لو تزودني بالاسعار "الكاشية"
أما إذا فشلت الخطة فالله يعين
فما اعتقد راح اقدر على شي اكثر من 7.500 أو 8 دك ... يعني ياباني وانقز





the man
مشكور اخوي.
الالماني عجيب لكن خارج نطاق التغطية ... قصدي الميزانية
شنو سعر الكامري 4 سلندر من فضلك؟





وليد المجني
ما قصرت اخوي على التحليل المنطقي
شنو سعر ارخص موديل (كاش) في اللكزس ويكون 4 سلندر؟





غير قابل للمساومة
حرام عليك، شيشتني
دشت مزاحي الأوريون ...معقولة ب 6.500؟
فيها منها 4 سلندر ولا كله 6؟
اذا في منها 4 سلندر قول لي بسرعة عشان ابدي أحن وأطحن بالويك أند





محمد العنزي (بو نورة الله يحفظها)
ههههه ... هذي صورة "مزاين" السيارات الله يهداك
شكلي بشتري منهم بشرط تكون تويوتا كريسيدا موديل 2008!





بدرية بدر البدور
يا طويلة العمر، غلطة مطبعية
ان شاء الله يسمحون لكم تسوقون، ويصير عندج بي ام دبليو، وتقحصين فيها على كيفج





يا وطن
والله شكلها يا كامري يا اوريون إن شاء الله
بس الكامري مشكلتها ان الكل عنده منها. يعني ويت ما تتلفت في الشارع يا كورولا يا كامري.
زين جم السعر النقدي لأرخص موديل كامري؟
لأني ما احتاج مواصفات قوية وفخامة، يمكن بعيد اضيف لها CD Player وما اعتقد يكلف أكثر من 150 دينار.



مشكورين وما قصرتوا

 

[ليبراليه وبس]

أحسن شي حق مبتدئه

الالتيما والماكسيما أحسن سيارتين حتى اللحين انتشروا بامريكا انتشار رهيب وآخر موديل التيما ومكسيما متغيرين بشكل رهيب والتيما 2008 متغيره شكلها رياضيه وفخمه شكلها جنها اودي A6 بنفس الوقت واسعارهم رخيصه بمقارنة مع الكامري والهوندا ..

المرسيدس حلوه وقويه بس صارت منتشره بطريقه بايخه كل ماتدشين شارع تلاقيين 50 مرسيدس ماره عليج فالوكيل بدال مايصير عنده 4000 الاف عميل صاير عنده 70000 الف عميل وكيل واحد شلون بيقدر يهتم بكل هالعملاء؟؟ كل مازادوا العملاء خصوصا السيارات قل الاهتمام بالعميل وهذي مشكلة كبيره بالكويت ان كل ماركة سياره لها وكيل واحد بعكس امريكا مثلا تلاقين بالولايه الوحده عشرين وكيل حق النيسان وبجذي الأمريكان يقارنون بين الوكلاء ويروحون حق احسن وكيل تاخذين منه السياره فانصحج اذا فلوسج شويه روحي نيسان واذا قدرتي تيبيين اغلى من النيسان روحي لكزس فضيعه اللكزس مريحه وسواقتها حلوه وفخمه ورياضيه جربت انا كل السيارات تقريبا الجاكور ما ارتحت لها مع اني احب شكلها والمرسيدس ثقيله على الايد خصوصا البنات يعضلون مع الوقت احسن شي نيسان واللكزس حدها حلوه لكزس وانتي تسوقينها جنج ملكة بس المرسيدس احسها سيارة مصاروه مادري ما احبها بالمره ....

 

[غير قابل للمساومة]

غراء

اليوم كنت بوكالة تويوتا والاوريون سعرها بـ 6800 وماادري اذا في 4 سلندر او مافيه

والكامري اقل مواصفات سعرها يطلع بـ 5850


المهم في سياره جديده طلعت على الساحه وشكلها متغير واخوي اليوم اخذها

( التيما ) الصراحه صاير مو طبيعي كأنها لكزس ولا فيه منها 4 سلندر وفيه 6 سلندر

ولا فيها نظام جديد المفتاح الذكي مع زر لتشغيل المحرك يعني بدون سويج


وسعرها معقول في 5550 وفي 5800 وفي اكثر من جذي وعلى حسب درجات السياره ومواصفاتها


انصحج تروحين البابطين تشوفين السياره

 

[غير قابل للمساومة]

التيما 2008

الظاهر الياباني راح ياخذ الشيخه من الالماني

شكلي ببدل اخوي وازيده ​

 

[teacher5]

اذا انتي عليمية...حرام تاخذين سيارة جديدة وكل يوم حاكة الرصيف ولا داعمة مظلة بيتكم....):

وبعدين تطيح بجبدج...سيارة مطلوبة 7000 وشكلها مش ولابد.......اخذي لج كامري تاجير احسن مافيها بيمة شاملة...مالج شغل بشي...قسطهاتقريبا مايتعدى 120....ولمدة سنة وبعد السنة...رديها لهم.....واخذي الاودي الجديد4 سلندر روعة...

 

[المتبحر]

نصيحة لوجه الله :

اخذي :

جيتي 76 !!

سعر رخيص ومواصفات عالمية !!

 

[غرّاء]

مشكوررررين


أخي غير قابل للمساومة
كيف خدمة ورشة البابطين مقارنة بالساير؟
أنا يعجبني بالساير سرعة خدمتهم وانه عندهم اكثر من ورشة واستراحات مخصصة للنساء ووو

فشلون البابطين؟

شكرا

 

[الديفي]

امس انا كنت عند وكيل سيارات لكزس

"المدام" معزمة تشتري لكزس سعرها 11,000 دينار !

ومن الوكيل بعد ..

حاولت انصحها ان شوارع الكويت اصبحت زحمة ونسبه الحوادث ازدادت بشكل كبير ما بـقـا هندي او مصري ما ساق سكرابه حرام تفتحين سيارة من الوكالة في مثل هذا الوضع المروري اللي ما يشجع

مع العلم زوجتي اصـطـدمـت بسيتي باص جاسم بودي الشهر الماضي عند اشارة سوق الميره وطلبو تعويض وسببت تلفيات كبيره بالباص وبسيارتها
وقبلها بشهر صدمت جـمـس مركب رمانه يسوقه هندي بـنـفـق برج التحرير قبل الاشارة

وتعال بالزوج صلح السياره

اشفيهم البنات يــنــو يبون لكزس مع ان اللكزس تشبه التويوتا بالضبط ؟

خبال حريم

 

[العبدلي]

عندي نصيحه من حكم تجربه
الي يشترون بلاقساد السيارت بلوكاله
انا شريت سيارة فورد فكتوريا وكاله طلعت علي 7000 الاف دينار على خمس سنوات
قعدت ست شهور بلكثير ورحت افتر على المكاتب ولقيت سياره طبق الاصل من سيارتي
بس انصدمت من فارق السعر حتى لو احولها على البنك تطلع 5000الاف دينار
ومامشت شي والسيرفس مالها مانتهى يعني وكاله بس الفرق الفين دينار
ويمكن اكثر وتقبل نصيحتي لاني اخذت عهد بيني وبين نفسي
لو تعجبني سياره انطرها عند مكاتب السيارت
ابرك من ان اشتريها من الوكاله​

 

[غرّاء]

الديفي

اللكزس أخت غير شقيقة للتويوتا
بصراحة بعد ما شفت الأوريون شلت اللكزس من قائمتي
لكن اللكزس مشكلتها أنها لها وجاهة وهذا اللي ذابحنا بالكويت
الكامري مثلا أداء وكد ومد وشكل جميل، لكنها مبتذلة وكثير من الناس بمختلف طبقاتهم عندهم كامري
الظاهر اني راح اعاني من صراع نفسي بيني وبين قوى المجتمع وبالأخير ما لي إلا التويوتا

سلم على المدام وقول لها غراء تقول لج خلج من اللكزس


العبدلي1980
واااااو
يعني السيارة بعدها على كفالة الوكالة؟

في أماكن معينة تنصحني بزيارتها وعندها سيارات كامري وأوريون بس تكون حديثة وعلى كفالة الوكيل.


_________________________________________

شيشتوني، عندي أسئلة بعد

1)
لو بشتري سيارة مستعملة مثل ما قال الأخ العبدلي
كيف اجراءات نقل الملكية؟
فيها روح وتعال وسجل السيارة وتنازل ولا المكتب يسوي لي كل شي؟

2)
لو ببيع سيارتي القديمة
الساير يشترونها ولا ما عندهم هالخدمة؟
وأيهو أحسن أبيعها على الوكالة ولا على مكتب؟

3)
لو أحد بيشتري سيارتي، شنو يعني شرط الفحص
يعني وين أودي السيارة يفحصونها؟


ومشكورين

 

[دون كيشوت]

كما اسلف الاخوان

لاانصحك الشراء من الوكاله .. عموما

ادخلي هذا الموقع .. وشوفي السياره اللى تناسبك موديلا وسعرا.. واتصلي عليهم وكاسريهم بالسعر بعد..

http://www.q8car.com


طريقه الموقع :
اولا : ضعي نوع السياره ( تويوتا .. او نيسان .. او بي ام دبليو .. الخ الخ)
ثانيا : ضعي الموديل الذي تريدينه ..
ثالثا : اضغطى على ايقونة ( ابحث في السيارات )

بيعجبك .. متأكد ..

وادعيلي ..

 

[غرّاء]

دون كيشوت
الموقع كان خربان واليوم اشتغل معاي أخيرا
رووووعة وااااايد افادني
مشكور والله يوفقك ويبارك فيك

 

[the man]

بصراحه السيارات اصبح سعرها نار في هذا الوقت.

اتذكر ان اسرتي كانت تمتلك بيجو بكس في عام 1988 وكان سعره اقل من الف. وكان عندنا سياره شتويه (لان ليس بها تكييف) وهي لادا بوكس عنابي كانت قويه وسعرها حدود 500 دينار.

في عام 2000 زرت وكاله لادا لااسترجع ذكرياتي ايام زمان فوجدت ان سعرها تضاعف واصبح 2000 دينار

بصراحه انا حاليا امتلك مرسيدس موديل 1980 وغير مفكر اغيرها, لان الاسعار صارت نار