ما عليك زود يالشمري
...
# الفيس بوك
يا صوت من لا له قبل حضرتك صوت
يابو الحيارا والفقارا والاغراب
عريت قبل اللي تستر به التوت
وعلمت بعض اشناب وش فرق الاشناب
صدرك حنون لمدن / وقلوب / وبيوت
وأشرس من اظلاف الأظافر والأنياب
يآمن من بطون الجواعا على القوت
وافضح من العاهر إذا تزوجت كاب
مافيه سرٍ ماخشا منك بسكوت
وبسكوت ترميبه على كل الابواب
على كثر حبك / بنا خوف منحوت
بارواحنا / واشده اللي من اقراب
ياسيدي : جيل انفتح فيك مبخوت
أعرب بك اجماعة / وجمعت الأعراب
انت المميت .. لمن قرى سيرة الموت
وانت الحياة .. ليا بقا للحيا ثياب
ياحوت ، لا يابحر ، يابحر يا حوت
لا والله اكبر من خيالات الاسباب
المنتمي لك لو يحييك مكبوت
ياسيد الساسة الاباطر والاحزاب
يالفيس بوك احسنت بقلوبنا فوت
قبلك شموس اليا بدى ظل ترتاب
سليمان المانع / الرياض / 13 - 5 - 2011