أنا رفيقي ماسمـع اللـي حكابـه
لو جاتنا منه السوالـف مضاريـع
اقرا مفاهيمـه واحسـب حسابـه
واشوف مدخال القـدم والمطاليـع
ماني عجول ٍ بالزعل فـي غيابـه
مادام ماسمع منه مااعطي ولا ابيع
رفيقـك الغالـي تحمـل عتـابـه
واحلم عليه ليـا دفعتـه دوافيـع
شيـم ثنـاه ولاتبـيـن عيـابـه
عاره يعـورك يابعيـد المراميـع
وان كان دون مرافقك صك بابـه
لقه قفاك وخل مشيك مـع الريـع
خله على بعـدك يسـرح ركابـه
يقضي سنه ولا شهور ٍ واسابيـع
وليـا طلبـك الصلـح يامرحبابـه
سهل طريقـه لا يجيلـه موانيـع
واحفظ لسانك عنه واستر جنابـه
لاتجرحه بين الذيـاب المجاويـع
ترى اللسان ملكـع ٍ يندعـا بـه
مثل الحصان اللي يبي له مصاريع
واجعل على هرج ٍ تقولـه رقابـه
عقل ٍ يصرف طايشات المواضيـع
والصمت في بعض المجالس مهابه
يكفيك شر اهل الفلـي اللواسيـع
عن كلمة يقضب خطاهـا قضابـه
يركض عليه مصنع الهرج تصنيع
خله يروح ومنـك خـال ٍ جرابـه
يرجع كما المفلس بسوق المطاميع
واحفظ صداقـة طيبيـن القرابـه
ربعك ليا قلـت عليـك المشاريـع
سيف ٍ نهار الضيق تقضب نصابه
يقاك من حدب السيوف البواتيـع
وليا جفـاك الـدار مالـك ومابـه
رزقك على اللي طوع الكون تطويع
ممشاك في حزم ٍ تطـارد سرابـه
اخير من شوف الوجيه المدانيـع
خطو الرخوم مصاحبيـن الخيابـه
تجار هـرج وفاللـوازم كراسيـع
الرجل مثل الذيـب رزقـه نهابـه
ياخذ مع الدو الخـلاوي قراطيـع
والطيب ضلع زاميـات ٍ هضابـه
للريح في شامخ ركونـه ذعاذيـع
عسر المراقي يتعب اللـي رقابـه
ماياكره كـود الحـرار القواطيـع
والا الردى جرف ٍ هيـال ٍ ترابـه
حوله لزهـران المقافـي مرابيـع
يرقد به الحصني ويلقى الذرى به
والبوم بين غصون قشعه مواقيـع
رجل على الناموس بيض ٍ ثيابـه
ورجل ٍ يرقعها على المتن ترقيـع
ورجل يزايم علتـه مـن عذابـه
عيـدان نـاره للقريـب مواليـع
على الجماعة كـل يـوم ٍ طلابـه
خمـاش وجـه ولالقيبـه منافيـع
ورجل ٍ مـع الايـام ماينصخابـه
عون الرفيق ليا صفعته صوافيـع
غيث ٍ على من جاه يمطر سحابـه
عشبه عل روس النوازي مفاقيـع
ورجل ٍ كما ليث ٍ عطيب ٍ صوابـه
من دون حقه سنع الخصم تسنيـع
طيب وعصمان الشـوارب تهابـه
يرجى وتخشاه الرجال الصعاصيـع
ومن لادرى بالناس ماحد ٍ درى به
ماله على سجل النشامـا تواقيـع
ومن لايحوش النعم فـاول شبابـه
في شيبته يحسب حساب المراضيع
وختامها ذكـر النبـي والصحابـه
واستغفر اللي مايضيع ولا يضيـع
للشـاعر / مفرح الضمني المطيري
رحمه الله