لماذا لا تتم زيادة القطاع الخاص 100 دينار حالها حال الحكومي ؟

[العازمي 2012]

شباب والله ظلم وربي ظلم انا مواطن كويتي اعمل في القطاع الخاص بشركة بنزين اولى كاشير واستلم من دعم العماله 361 دينار ومن شركة البنزين 250 دينار والله يا شباب بالاسبوع دوامي 6 ايام 3 ايام منهم اداوم 16 ساعه و 3 ايام اداوام 8 ساعات راح تستغربون لان الدوام شفتات وبس يخلص داومي وماجا اللي وراي يستلم عني لازم استلم عنه 8 ساعات ثانيه وهذي حالتي اسبوعيا تصير فيني 3 مرات بالاسبوع 16 ساعه وين يمدي انام وين يمدي اشوف الاهل حتى الراتب مايبقى منه شي كله يروح على اقساط الموتر وبعض المشتريات والله حرام لازم الحكومه تشوف حل للقطاع الخاص بزيادة رواتبهم او توفير وظيفه فوريه للقطاع الخاص او راح تشوف الحكومه مظاهرات العن من اللي صارت بمصر وسوريا

 

[ولد اليرموك]

يالعازمي . . الحكومة شاطرة بتوزيع الملايين على النواب الفداوية . .

وإلا الشعب لو يموت من الجوع ما فكرت فيه الحكومة . .

 

[ابو فرحان40]

أين الدستور وأهله . . عن الظلم الذي وقع على أخواننا العالمين في القطاع الخاص . .

عندما أقرت الحكومة كادر المهندسين . . ذهبت وزادت المهندسين بالقطاع الخاص ٣٠٠ دينار . .

وعندما أقرت ١٠٠ دينار لجميع موظفين الحكومة . . كأن موظفين الآخرين بالقطاع الخاص ليسوا كويتيين . .

الحكومة اتجهت بقوة بل ساندت الجهات التي تريد ان تشتري ولاءها واستخدمت مسمى الكادر كذريعة للزيادة وساوضح ذلك بنقاط
1_ وكيل النيابة راتب خيالي اضافة لحصانة والشهادة حقوق النتيجة حجز احتياطي وتصفية حسابات ضد شخصيات مخالفة للسلطة واخرها محمد هايف والدكتور الوسمي ومحمد الجاسم وغيرهم فاصبح جهاز مسيس لايثق فيه .
2_ القضاء ما ابي اتكلم اصبحنا في زمن الحرامي يقولك اشتك على.
3_ ديوان المحاسبة حدث ولا حرج .
4 _ الفتوة والتشريع .
5_ الهيئة العامة للاستثمار
6- القطاع النفطي (المجلس الاعلى للبترول رواتب وامتيازات لملاك شركات وليس لموظفين دولة
7_ القطاع العسكري انتبهو فقط لزيادة الضباط وامتيازاتهم صارت اكثر من الوزراء
هذه هي ادرات الحكومة المدللة وباقي قطاعات الدولة تشرب من البحر حتى من زادوهم فقط حتى لا يتم الانتباه ان الحكومة تحابي ادراة ضد ادارة ثانية لاسباب سياسية
الجهات التي تم زيادتها
1- الاطباء
2- المهندسين
3- دكاترةالجامعة
4- الدبلوم الفني
الجهات المنسية
1_ التعليم
2- القطاع الخاص
3 - جميع موظفي الدولة بغير القطاعات المميزة عند الدولة (الاوقاف- الكهرباء- الشئون- الاشغال - البلدية -الخ الخ الخ
4- المتقاعدين

 

[ولد اليرموك]

زميلي الفاضل . . بو فرحان . .

كتبت . . فأصبت . .

ولكن السؤال يقول :

أين نواب الأمة من هذه التخبطات الحكومية . . !

 

[الفدعانى]

الله يهداكم ،، "ماتنقش -بالمصري " على هالزيادة لاتطير منا !! احنا ماصدقنا حاشنا شي وذكرونا بشي وحسوا فينا ،، هاذي الزيادة مخصصة للموظفين في الجهات الي مافيها كوادر لاننا احنا والمتقاعدين الفئتين المطحونتين بالكويت والي ماكلينها عدل لامعاشات سنعة ولا كوادر والغلاء الفاحش ذبحنا ،، انت تدري جم معاش الجامعي في وزارة أو جهة مافيها كادر ؟؟ معاشه أول مايتعين 632 دينار فقط !!

من كثر ماقام يجينا "نق" ومن خطاب الحكومة الأخير وتحلطمهم الأخير على الحالة الاقتصادية ،، شكلها بيسحبون منا هالزيادة ماتسوى علينا :باكي:

انتو ماشاء الله تاخذون دعم عمالة ومعاشاتكم قوية وهم موعاجبكم وحاطين العين على الزيادة الي جتنا ،، أجل احنا شنو نقول على هالمعشات؟! لا وأزيدكم من الشعر بيت ،، كل واحد يشتغل بجهة مافيها كادر وياخذ بدلات أقل من المية ولنقل مثلا شخص ياخذ بدل شاشة 30 دينار + بدل طريق 50 دينار لو كان يسكن في منطقة بعيدة،،تكون الزيادة الفعلية على معاشه هي( 100 - مجموع بدلاته) ،،
يعني 100 - (30+50) يعني يشيلون منك كل بدلاتك ويعطونك امية ،،يعني الزيادة الفعلية للمعاش للشخص المذكور في المثال السابق هي فقط 20 دينار واخصم من العشرين دينار هذه ماتأخذه التأمينات،، وهم محسودين من أصحاب المعاشات الي معدية الألف دينار اخذوا منا الكادر وعطونا فقط نصف المبلغ الي يعطونكم اياه كدعم عمالة واحنا

راضين ،، شرايكم تبدلون ؟!!

توقيعك تعيس حواجبه مايشيلهم الا الكيماوي

احترم رايك ولا احترم توقيعك
وجهه نظر

 

[GUNNER 4EVER]

عندهم دعم عماله​

لولا دعم العمالة لما رأيت كويتي واحد يعمل بالقطاع الخاص

وعلى فكرة دعم العمالة وجد ليكون ميزة لموظفي القطاع عن القطاع الحكومي

وهذا الكلام قبل ثلاث سنوات ولكن الان اصبح راتب الموظف بالقطاع الخاص يوزازي القطاع الحكومي​

 

[ولد اليرموك]

نواب الأمة . . لاهين بعد الملايين وتجميعها . .

مو صوب مشاكل الأمة ومتطلباتها . .

 

[ويكيلكس]

والله اني اتمنى ان تكون زيادتكم اكثر من 100 .. لانكم فعلا تعملون ..


ولكن انا اقولها لكم ... لكم الله يا اخوان .. لان ماعندكم نقابة عشان تسوون اضراب ..

وانتم عارفين الحكومة ما تمشي شي الا بعد مشاكل وتصعيد ...

واعضاء مجلس الامة .. والله للاسف متعشمين بالاعضاء انتم ...

يا جماعه مخادعين ما يتمنون الخير للشعب اغلبهم ...

لان اذا تنفس الشعب خلاص دواوينهم تصير فاضية

والله كم اتمنى ان تكون لكم الزيادة ... لانه فعلآ المال العام هو حلالكم

والله المستعان

 

[الشكوي-لله]

ليش حارق نفسك خلي يجرب العمل في القطاع الخاص وساعتها يقول اي والله كلامك صح يبه الي ايده بالماي غير الي في النار وانشالله جميع الوزارات والدوائر الحكومية ماعدا الجيش والشرطة والحرس يصيرون قطاع خاص ساعتها يحسون شوي

شلون ما احرق نفسي واشوف بعص هالردود انا ماني قايلك التعب الي نتعبه ووووو احنا ربعكم موظفين الارباق واظن تعرف شنو شغل الارياق لا وسوبر ريق بعد

اقسم بالله العظيم يمشيلنا معاش كل شهرين شهر يعني شهر ينزل وشهر لا ومو من حق الشركة لكن الحكومه عمك اصمخ نتكلم وماكو فايده تخيل ممنوع الصلاة عندنا وقت الشغل تخيل هذا وانت في بلد اسلامي تخيل مافي مره من اول ماتوظفت قبل 5 سنين نزل المعاش في وقته اقل شي يتاخر شهر وساعات 4 تشهر من غير معاش وماله وقت تخيل يعني عندنا التزامات وغيره والله لو بقعد اشتكي واتكلم ماراح اخلص والله في بلاوي ومشاكل كثيره والحكومه نايمه ومالها خلق واحنا توهقنا

بالعربي القطاع الخاص فاااااشل والحكومة فشلت في تشجيع الشباب علي القطاع الخاص وماحمتهم ولا ضمنت حقوقهم

وشكرااا

 

[نائب المدير]

موظفين القطاع الخاص يستاهلون زيادة ال 100 دينار حالهم حال موظفين الحكومة

لكن الشكوى لله ياخوي كله تخبطات حكومية ومن غير دراسة

 

[Bader1974]

لولا دعم العمالة لما رأيت كويتي واحد يعمل بالقطاع الخاص

وعلى فكرة دعم العمالة وجد ليكون ميزة لموظفي القطاع عن القطاع الحكومي

وهذا الكلام قبل ثلاث سنوات ولكن الان اصبح راتب الموظف بالقطاع الخاص يوزازي القطاع الحكومي​

معلومة يجب ان يعرفها الجميع ان دعم العمالة هو علاوة الاولاد والعلاوة الزوجية فقط لاغير يعني مافي اي زيادة بس الخمسين مالت الاطفال والزوجية يعني ماهي ميزة يتميز فيها موظف القطاع الخاص كانت للاسف في السابق ماتنزل
لموظفين القطاع الخاص الحين الحكومة عرفو الخطأ وعدلوه بس متأخر

 

[العازمي 2012]

معلومة يجب ان يعرفها الجميع ان دعم العمالة هو علاوة الاولاد والعلاوة الزوجية فقط لاغير يعني مافي اي زيادة بس الخمسين مالت الاطفال والزوجية يعني ماهي ميزة يتميز فيها موظف القطاع الخاص كانت للاسف في السابق ماتنزل
لموظفين القطاع الخاص الحين الحكومة عرفو الخطأ وعدلوه بس متأخر

100% :إستحسان:

لازم يا شباب نسوي اضراب موظفين القطاع الخاص عشان الحكومه تحس فينا شوي

 

[GUNNER 4EVER]

100% :إستحسان:

لازم يا شباب نسوي اضراب موظفين القطاع الخاص عشان الحكومه تحس فينا شوي

انت من صجك ؟؟؟؟؟؟؟؟؟؟؟

الشركات والبنوك يبونها من الله تسوي اضراب علشان يطيحون فينا خصم وفصل

واييبون الجنسيات الثانية ويحطونهم مكاننا بنص الراتب

انا والله لو ما ناي متزوج وعندي عيال وعلي قسط وادفع ايجار كان استقلت ورحت لماما حكومة

بس مستحيل انطر الديوان فوق الثلاث اشهر

وخاصة ان ماعندي فيتامين واو علشام اتوظف بمكان تخصصي​