رائـــع ابــو هادي وتسلم
شيلة ولا اروع .. تحياتــى
.,.,.,.,
عهدي بها قدام تلبس عبايه
وانا بعد قبل البس شماغ وعقال
طفلين نتهجى حروف الكتابه
الله يامجمل سواليف الاطفال
كانت لنا في كل شارع حكايه
وكنا نقول علوم ماهيب تنقال
وكنت اتقاسم مامعاها معايه
من عسكريم التوت للعلك ابو ريال
وكانت بعكسي شاطره بالقرايه
تقرأجزء عم وتبارك والانفال
وانا لك الله من مواري غبايه
مدري ابو نقطه هو الذال أو الدال
وكانت لابويه تشتكي من شقايه
وتعلمه كيف اربط الباب بحبال
ياما على ظهري كسر من عصايه
يقول لي خلك وانا بوك رجال
وامي تقول ادع لولدك بالهدايه
خوفي يصيبه كثرة الضرب بهبال
لاشفتها مع أول الدرب جايه
مدري انا اللي ملت ولا الوطا مال
احس قلبي يرتجف في حشايه
ماكنه الا الضيف لاهز فنجال
ياما عن السعلي تخبت ورايه
لاخوفوها ثم شافت لها ظلال
تقول خلك يا (........) معايه
واستانس ألعب عندها دور الابطال
اغار عليها من عيون اصدقايه
لاتطالعوها قلت تكفون ياعيال