سؤال وجواب شباب اللي يحجز تذاكر طيران بالنت يفيدني

[ChanZeen]

السلام عليكم

شخباركم شباب

شباب ولا مره حجزت علي النت تذاكر طيران كانوا الشباب يحجزون لي بس بستفسر

الحين لو بحجز من الكويت الي مطار مانشستر عن طريق القطريه

دخلت موقعهم ولقيت رحلات بس مكتوب الوقت من لكويت لقطر 19:20 وتصل للدوحه 20:40

ومن الدوحه تطير 01:40



يعني الساعه جم بتوقيتنا تعرفون بعد احنا من بعد ال١٢ تصير ١ ؟؟ مالي في هل امور

وبعرف التوقيت صباحا ولا مساءا

وشكرا
​

 

[الكويت أولا و أخيرا]

أخوي, راح تطير من الكويت الساعة سبعة وثلث بالليل من الكويت,

راح توصل الدوحة الساعة تسعة إلاّ ثلث بالليل,,

راح تقعد بالمطار ترانزيت 5 ساعات, وبعدين تطير الساعة ثنتين إلا ثلث , طبعا الدنيا ظلام بس الوقت يسمى صباحا لأنه عدى الساعة 12 بالليل,,

 

[عبدالله .]

وعليكم السلام والرحمة
سهلة إن شاء الله ومايبيلها شي
نظام التوقيت المعتمد عالمياً هو 24 ساعة مو الـ 12 ساعة
يعني تبلش من 00.00 وهاذي يعني 12 الفجر والساعة 04.00 يعني اربع الفجر ولما تصير 12.00 يعني الظهر
ولما تصير 23.59 يعني باجي دقيقة وندش عاليوم الجديد وتصير الساعة 00.00
وإذا لقيت معتمدين نظام الـ 12 ساعة
فلازم تجيك الـ am و الـ pm الاولى يعني صباحاً الثانية مساءُ يعني من 12 الظهر وانت طالع​

إذا حجزت إن شاء الله راح يدزون لي ايميل بالبداية
وعقب يدزون لك ايميل قبل 24 ساعة من السفر الافضل انك تدش من خلاله تسوي الـ chick in وهو انهاء اجراءات الحجز قبل ماتروح المطار علشان ماتصف دور انا الحين ناطر هالايمل لأني باجر راد الكويت إن شاء الله​

اي سؤال ياخوي بهالموضوع اسأل وإن شاء الله اقدر افيدك ولا قصور بالجميع​