سؤال وجواب حاولوا ينصبون علي ! أحد صارله هالشي؟؟

[تفاؤل عظيم]

السلام عليكم ورحمة الله وبركاتة


اخواني واخواتي
انا مساع كنت بوكالة هيونداي بالشويخ
ع أساس رايح أشتري أزيرا موديل السنه 2014

المهم قالولي بـ 9750 والقسط 176
راحت موظفة المبيعات للمدير مادري شنو قالت له ورجعت لي جان تقول المدير يقول لو حجزتوها اليوم راح أعمل لكم خصم مميز !! وصار سعرها 9250 دينار !
قلت اوكي بحجز ودفعت 50 دينار .
المهم شوي ولا تقول الموظفة ان السيارة 2013 وإن الـ 2014 للحين مانزلت للسوق اساسا !!

عاد انا كان رايح من بالي العرض اللي شفته بالجريدة !!



يا جماعة الخير يوم رجعت للبيت أجيك على العرض اللي بالجريدة ولا كاتبين
أزيرا 2014 والقسط الشهري 109 !!!!!!!!!!!!!!!!!!!!!!!!!!!!!!!!!!!!!!!


شلون الموظفة تقولي مانزلت للسوق اساسااا !!!!!!!!!

شسوي بهالحالة ؟؟ وين أشتكي ؟؟؟

يعني كانوا بيدبسوني بالـ 2013 وبسعر أعلى من الـ 2014 مرتين !!!
شلون وكالة تسوي جذي؟؟؟

 

[تفاؤل عظيم]

قلت للموظفة تسويلي حسبه وكانت كاتبه بالحسبه 2014 وجا المدير بدون لا يدري اني شفته شطب رقم 4 وحط 3 !!!!!!!!!!!! و رجعوا سوولي ورقه جديده فيها حسبه تقديريه

بفهم شلون جذي ينصبون برمضان !! يحق لي اشتكي ؟ ووين اشتكي !!

 

[مساعد الشويب]

وعليكم السلام يهلا ومرحبا

اخوي اذا كان قسط السياره ع خمس سنوات تعال نحسب

القسط ١٧٦ ع ٦٠ شهر = 10560
الحسبه غير صحيحه نهائيا
لن حسبتها ع 4 سنوات و5 سنوات

ثانيا

الي هذا اوله ينعاف تاليه

اسحب عربونك اذا كان يرجع

اخذ الجريده معاك ودش ع المدير
بس ماراح ينفعك بشي

بعدين تعال من صجك بتدفع 9000 ع هوندا

 

[مساعد الشويب]

اخوي تشتكي ع شنو مافي شي رسمي
مجرد حسبه تقريبيه لسياره
يعني بتروح لحمايه المستهلك شنو بتقولهم
حاولو ينصبون ع وانا جكيتهم

نصيحه اخو السيارات واجد

 

[تفاؤل عظيم]

هونداي مو هوندا ياجماعة الخير

وانا ابي هالسيارة شلون ! ماكو وكيل غير رمال الخليج ؟

 

[الكتالوني]

اوكي دفعت العربون بناءَ على اتفاق خطي؟

يعني مكتوب لك بورقة واصل 50 دينار عربون سياره كذا كذا موديل 2014 ؟

ولا كعادة الشعب الكويتي تكلمه موظفه كاشخة ,, يستحي ويدفع ال50 وهو مستحي ؟

اذا دافعها خبط لزق فالقانون اسمحلي لا يحمل ,,,,, بكل سهوله

واذا مكتوب بوصل العربون موديل السياره توجه الى حماية المستهلك وافجر وجه المدير

بس اهم شي عند حماية المستهلك فاتورة او وصل رسمي

 

[عبدالله العبدلي2]

يالطيب لاتكبرها وهي صغيره خاطرك بالسياره اخذها ٢٠١٣ واذا تبي موديل ٢٠١٤ انطر كم شهر تنزل بالوكاله وبعدين السياره صناعه كوريه اذا دافع ويالقيمه هذه زيدها ١٠٠٠ واخذ تاهو ونت لك الخيار

 

[تفاؤل عظيم]

شنو وكالة هونداي غير شركة شمال الخليج ؟

 

[AlBadel]

نصيحة تفاؤل
أخذ العربون والهونداي ماتنفع بعد شهرين وأنت ماشي كل شوية طايح شي من السيارة لين توصل للدعامية
مثل ماقال العبدلي زيد 1000 وخذ تاهو أو سيارة ياباني صالون شلك بدوخة الراس بسيارة ماتتحمل علي الشارع 6 أشهر
وأكو مثل حلو يقول ( يا شاري اليوم بكره بايع ) والهونداي بعد الأستعمال ولا بيزة بسوق الحراج

 

[ملك القراصنة]

هونداي تدفع فيها 9 حرام عليك ​

 

[السلطان العثماني]

اسحب عربونك واخذ تويوتا او نيسان

اخذ الياباني افضل من الامريكي​

 

[عبدالله الرشيدي]

اخذ لاند وادعيلي

 

[مساعد الشويب]

جابلي جلطه

 

[Librax]

اخذ الاعلان من الجريدة او من موقع موقعهم عالانترنت اتصل على 135 وقدم شكوى باعلان غير حقيقي وكاذب للمستهلك بموديل السيارة


توجة الي وكالة تويوتا قدم على افالون 2013

 

[ســـــاحـــــر]

السياره لا يعلى عليها من افضل واجود السيارات وجميله جدا ولكن العقليه المحليه مشكله انا استعملتها تأجير سنه فل اوبشن كرف ومشيت عليها 70,000كم ما اشتكيت منها في شي ابدا

والآن المشكله ان الوكيل جايب 2014 مواصفات اقل بالمكينه والداخليه واقل سعر
2013 فل 10,100 سعرها.

ونصيحه اخذها تأجير او اخذ كيا كادينزا نفس المصنع وارخص​

 

[تفاؤل عظيم]

والله انتو بتجيبون لي الجلطة
ياجماعة الخير ماطلبت رايكم بالسيارة لأني أعرف السيارة شنو , وأدري إنها أحسن من مليون غيرها
لين متى يعني الكويتي متكبر مايركب الكوري !!! ترى الكوري يسوى واللي ماجرب السيارة لا يتكلم عنها يا اخوان
الازيرا معروفة حق كد ومد وحق خطوط ولو تشوفون غالبية سيارات السعوديين ازيرا
مشكلة الكويتي مايتنقع سيارة كشخه وفخمه ومكينتها حلوه بس رخيصه شلون !! لالالا أكيد خرابها سريع .

مشكلتي مع الوكالة مو مع السيارة
ومثل ماقال الاخ ساحر الوكيل جايب ال 2014 مواصفات اقل بالمكينة والداخليه واقل من سعر ال 2013 فل اوبشن

 

[الأموي]

اخوي ماخذ وحده قبل اقل من شهر 2014 ازيرا بصراحه فخمه

وشكلها حلو ومواصفاتها حلوه ،، واعتقد عليها كفاله مدى الحياة للمالك الاول .

 

[مساعد الشويب]

لا انت مسحور هههههههههههههههههه عسي الله يعطيك خيرها ويكفيك شرها
والله يوفقك انشاءالله

 

[بدوي ذرب]

لو اتفقت الاذواق لبارت السلع

كلن وذوقه وكلن ومركبه !!!

 

[KUWAIT_VOICE]

اخذ لاند وادعيلي

اسحب عربونك واخذ تويوتا او نيسان

اخذ الياباني افضل من الامريكي​

اخذ كيا كادينزا نفس المصنع وارخص​

هونداي تدفع فيها 9 حرام عليك ​

اخذ تاهو ونت لك الخيار

بعدين تعال من صجك بتدفع 9000 ع هوندا

انتو دشتو بالموضوع عرض

يعني الريال ما قال لكم شنو أخذ!!

تكلم عن محاوله نصب

لى متى نخلط الماي بالدهن ؟