من صور قرقيعان بيتنا،أطفال حضروا بباصات وتاكسيات زمن تغير..
عساكم من عواده يارب..والحمدلله
صدقت يا عميدنا، الزمن تغير.
بالسابق يدتي الله يرحمها كانت تخيط لنا جياس خام حق القرقيعان، و كان يعد هذا كشخه و رزه لان وايد من عيال الفريج ايمعون القرقيعان بدشاديشهم. و كنا نطلع من بعد صلاة العشا (حتى قبل صلاة التراويح احيانا) و اندور على فرجان المنطقة بيت بيت معانا الطبل و انقرقع و انصفق بحماس حق كل اهل البيت لين ينهد حيلنا، و بعدها يعطونا خمطة او جيلة من القرقيعان الي كله يوز و سبال و حب ابيض و بيض الصعو. و كنا نستانس و انكيف.
قرقيعان اليوم و انا طالع من البيت شفت ناس بيطقون جرس بيتنا. يوم قربت منهم ول طلع 7 ول 8 يهال و معاهم 18 خدامة. بدون مبالغة الخدم أكثر من اليهال. قلت هلا حبايبي شتبون؟ جان ترد الخدامة الفلبينية الي محفظينها هالكلمة "في كركيعان؟".
قلت اي فيه. تذكرت ايام الطفولة و تحمست، قلت خل بنفسي اييب لهم القرقيعان الشغل عدل من الدولية. و يوم يبته قلت لهم يالله قرقعوا على فلان. الكل يطالعني و مبطل حلجه. قلت لهم ما تعرفون تقرقعون؟؟ الكل يطالعني. قمت انا اقرقع عشان اعلمهم. شفت الخدم يضحكون و اليهال مازالوا امبطلين حلوجهم يطالعون فيني. انصدمت قلت يبا خلاص مو لازم احد يقرقع و انا اعطيهم القرقيعان كل ياهل انعفس ويه و مو عاجبه. قلت شفيكم يبه. بعدين عرفت من الخدم ان اليهال يبون ككاو مو مثل قرقيعانه الأولي.
رجعت البيت و قلت حق الأهل راويني قرقيعانكم الي مزهبينه حق يمعت الأهل. ول طلع كله مجيس بجيس خام على شكل دراعة حق البنات و دشداشة حق الصبيان، و كل جيس فيه ككاو جواهر و ماكنتوش و حلاو مجيس و بفك و دينار. قلت شالخرابيط هاذ؟؟ قالت لي هذا قرقيعان هالجيل. و هذا الي يونسهم.
أدري السالفة ما تسوه. بس انغبنت و انغثيت حرام عاداتنا و تقاليدنا جذي يصير فيها.
اف هذرت وايد. سامحوني عالاطالة.