ماشاء الله بيننا خبير عطور ! إمسك لا إتّخله ينحاش ! 
أول شي مشكور جدا جدا عالمعلومات المفيدة.... أنا مدمنة بخور وأحبّه بس في الطلعة لأ....في البيت وانشب البخور في الدوام ....
غوتشي الحمر شخباري.... بس قوي جدا فعلا !
سؤالي أخي الكريم.... كيف نفرق بين دهن العود الأصلي والمغشوش ؟
ثاني شي... وين نحّصل بخور سعره زين وريحته طيبة ؟ لأن الكمبودي درجات....كنت أشتري من القرشي
اولا شكرا لكم
نعم انا لى خبره مع البخور
ما اشترى الا من مكان واحد بس وبخوره محترم
وشغلى بس الكمبودى غير ما استعمله
الكمبودى هالايام صار غال ومنقطع يعنى ذاك من ذاك اللى يحصل على كمبودى اصلى وسعره صار غالى اغلى من قبل بوايد لندرته
البخور وله كذا طريقه فى الغش
اللون مرات يصبغونه وشكله عجيب لكنه مو شى
لما تطبخ البخوره خلى عينج يحوشها البخور اذا دمعت عينج يعنى البخور مو مضبوط درجهته ضعيفه
شوفى البخوره لما تطبخ لاحظى الماده اللى يطلع منها تطول ولا بسرعه تنشف؟
مرات يلزقون البخوره مع خشب ويصبغونها يعنى نغى كل بخوره لوحدها وكسريها اللى تشكين فيها اذا مغشوشه
مرات يحطون رصاص داخل البخوره علشان الوزن غش تجارى الله لا يبارك فيهم
حاولى تاخذين البخور الى منظفينه صح من داخل وبره
القرشى يخلط بين الزين والشين
انا بالنسبة لى اشترى من امل الكويت بخوره عجيب ومن الشايع عنده هم بخور صح بس القرشى اسم على الفاضى هذا بالنسبة لى انا
بس الاسعار ارتفعت مثل ما قلت لندرة الكمبودى يعنى انا سافرت الى بانكوك اشترى ما حصلت المصبوط كلهم يغشون وذاك من ذاك احصل على النظيف بس شويه غالى واخشه فى التجورى
هذى ردى على السريع فى البخور
الغوتشى غرشته كبيره رجاليه تقولين طابوقه الحمره عليها ريحتها تظبط حق تثبيت الكمبودى يركبون على بعض
على فكره انزلت الغوتشى اليديده الزرقا مو حلوه للبخور
وفى ريحة ثانية نسائيه اسمها كلينك اروماتيك الكسير ديو
هذى عجيبه وتركب على الرياييل والحريم حق تثبيتة البخوره
حق الدوام يعتمد المكان مفتوح ولا مسكر
اذا مفتوح شغل معمول بس ها فيه معمول تقولين ياوى ولا بيزه
عند امل الكويت معمول المعاريس هذا تمام حق الدوام وهم حق البيت
واذا المكتب مسكر اخذى الشى الزين ويعتمد على فليساتج
