يبه ليش

[هورايزن]

للمعلمين والمعلمات

والمختصين والمختصات
والمهتمين بعلم النفس وتربية الطفل ..

عند ولد يسأل 20 سؤال بالدقيقة ..

يستهل سؤاله ب ( يبه ليش )

ذبحني من كثر الأسئلة
ويمكن ( والله أعلم ) لو يحط أسئلة الثانوية العامة .. ما راح تشوفون أحد يجيب ( نسبة ) فوق السبعين ..

طبعا الولد يبدأ بسؤال بسيط ( تسخين ) ( يبه شلون ) وبعدين يبدأ يغزر ..
كل مرة يكون فيها معاي .. أرد البيت ( وريجي ) ناشف .. من الردود والتوهق في أغلب الأحيان ..

الحل يا جماعة .. أخوكم في ورطة

صارت عندي حالة ( فوبيا )

فيا .. المعلمين والمعلمات .. هل تواجهكم الحالات نفسها
ويا .. المختصين والمختصات .. ما هي الطريقة المثلى .. للتعامل

بإنتظاركم

 

[JeNaN]

لازم تستانس

هذا دليل ذكاء بس اهم شي لما يسألك ومايكون لك خلقه لا تدقره و حاول اتأجل الاجابة لين تكون مستعد..

ماني مختصة بس بحكم العشرة وياهم

 

[وادي المسك]

مرحبا اخوي هورايزن ...عيدك مبارك :وردة:


الله يخليه لك يارب ويصلحه ويوفقه ويقر عينك به


الله يعينك ياخوي


كم عمره اخوي ؟

وهل الاسئله تتعلق باماكن تمرون بها او حدث حاضر ...ام انها من ذاكرته وخياله او نتيجة لاحداث سابقه ؟

 

[هورايزن]

نمونة أسئلة :

يقول ... هنري ( أنا نسيت أسمه الأول ) فرنسي ويلعب بأسبانيا
/ يبه شلون يروح يلعب باسبانيا وهو بفرنسا
/ يبه شيصير لو ما قدر يوصل اسبانيا بسرعة


يقول .. ايتو يسمونه أسد الكميرون
يبه ليش يسمونه جذي
( انا ما اعرف منو ايتو ) :باكي:

يقول .. لما كنتم صغار كان فيه بلاستشن ؟
قلت .. لا
قال .. (ليش يبه ) أنتم كنتم تعيشون في زمن الديناصورات

 

[JeNaN]

يختي والله هههههه نوعه اسئلة من تحت القاع..



الله يخليلكياه انت جاوب كثر ماتقدر والسؤال اللي ماتعرفه حوله على الام

 

[وطني]

نمونة أسئلة :

يقول ... هنري ( أنا نسيت أسمه الأول ) فرنسي ويلعب بأسبانيا
/ يبه شلون يروح يلعب باسبانيا وهو بفرنسا
/ يبه شيصير لو ما قدر يوصل اسبانيا بسرعة


يقول .. ايتو يسمونه أسد الكميرون
يبه ليش يسمونه جذي
( انا ما اعرف منو ايتو ) :باكي:

يقول .. لما كنتم صغار كان فيه بلاستشن ؟
قلت .. لا
قال .. (ليش يبه ) أنتم كنتم تعيشون في زمن الديناصورات

ماشاء الله عليه

الولد رياضي وطاح له بأبو ما يدري عن الرياضة شيء

جيبه لي ساعتين (( أسنعه لك ))

اذا ما أخليه يسرد لك من فاز ببطولة الدوري الانجليزي

منذ 1889

الله يخليه لك ​

 

[It's Me]

مثل ما قالت الزميلة حلطومه المفروض تستانس .. أنا أحب هالنوعية و بالي أطول من بالهم
إهم يتعبون من الأسئلة و أنا مستانسة جني قاعدة آكل باسكن روبنز

- أولا ً جم عمره عسى عمره أطول ؟

- شنو إهتماماته ؟ و شنو أكثر شي دائم يفكر فيه و يردده ؟ و شلون مستواه الدراسي ؟

- و هل تحسه أحيانا يستعبط و إلا على طول يسأل من صجه ؟

هالنوعية ممكن تكون حادة الذكاء أو العكس فيهم بلاده بزياده ..

و ان شاء الله أقدر أفيدك .. ناطره اجابتك ..

<< تدرس أدب الطفل و علم النفس التربوي ..

 

[بو عصام]

هالنوعية ممكن تكون حادة الذكاء أو العكس فيهم بلاده بزياده ..

..

فعلا ..وان استمر بالمستقبل فلابد من أخصائي

حاول ان تجاوب ببطأ ( امقط بالاجابة)..حتى تجعله يتريث ويسمع كل كلامك ويفكر قبل ان

لايطمر للسؤال الآخر.. وأعمل هالشئ على طول معاه..يعني لازم يستمع للاجابة قبل

السؤالل التالي.

بس لا تسكته او تحسسه بأن أسئلته غبية..

 

[k7elan]

نفس الحالة كانت مع ولد اخوي يمكن لما كان عمره ثلاث سنين او اقل <<الحين بالروضة

اخوي ساكن بشقة داخل البيت و ولده طول الوقت معنا فيحيرك بالاسئلة خاصة بالاسئلة عن الله سبحانه

و تعالى

وين الله..؟ وين النار..؟

اكثر الاهل يطنشونه اغلب الاوقات ما عداي<<مشكلة اذا صرت تربوي مثلك مثل الشمعة


الآن الولد توقف عن الاسئلة

 

[هورايزن]

ماشاء الله عليه ​

الولد رياضي وطاح له بأبو ما يدري عن الرياضة شيء ​

جيبه لي ساعتين (( أسنعه لك )) ​

اذا ما أخليه يسرد لك من فاز ببطولة الدوري الانجليزي ​

منذ 1889 ​

الله يخليه لك ​

وأنت الصاج .. إتفقت مع نفسي أني أتابع المباريات وأقرأ الصفحة الرياضية وأسأل عن الأندية عشان إذا رجعت البيت أكون مستعد
بس شيلحق مع كثرة الأندية والتنقلات
مرة كنت أتابع الدوري الأسباني لأنه يحب فريق برشلونه ، قلت ليش مو منزلين روبرتو كارلوس ( يعني الأخ متابع ) وإلا يخزني ويقول أصلا كارلوس ( كان ) يلعب بريال مدريد والحين بتركيا ( ما أدري شنو إسم الفريق ) .

ما تسوى علي صح :باكي:

اليوم يقول لي :
( رولاندينهو .. ما أدري الأسم صح وإلا لا ) يقول صح لاعب برازيلي ( طبعا أنا قلت أكيد لأن إسمه يقول جذي ) قال يلعب مع فريق أسباني ( ما أدري قال برشلونه وإلا ريال مدريد .. نسيت )

قال شلون لو لعب الفريق الأسباني في نفس وقت لعبة لمنتخب البرازيل .. هاللاعب رولاندينهو وين يلعب ..

طبعا أخذت بنصيحتكم وطولت بالإجابة .. وقمت أخربط ( عرفت من تعابير وجهه ) بعدين قلت بكره أقول لك الجواب

يالله الحين فجج .. أنقذوني .. ترا بعدين أطيح من عينه ( رياضيا )

 

[هورايزن]

مثل ما قالت الزميلة حلطومه المفروض تستانس .. أنا أحب هالنوعية و بالي أطول من بالهم
إهم يتعبون من الأسئلة و أنا مستانسة جني قاعدة آكل باسكن روبنز

- أولا ً جم عمره عسى عمره أطول ؟

- شنو إهتماماته ؟ و شنو أكثر شي دائم يفكر فيه و يردده ؟ و شلون مستواه الدراسي ؟

- و هل تحسه أحيانا يستعبط و إلا على طول يسأل من صجه ؟

هالنوعية ممكن تكون حادة الذكاء أو العكس فيهم بلاده بزياده ..

و ان شاء الله أقدر أفيدك .. ناطره اجابتك ..

<< تدرس أدب الطفل و علم النفس التربوي ..

أختاه
شرايج تأخذينه عندك .. ومصروفه علي

وبالمناسبة يحب البلايستيشن ومتابعة الرسوم المتحركة ( هذا اللي ظاهر لي ) وإلا كل مرة أشوف الريموت كنترول بيده وبس أدخل أشوفه ( يفغص ) بالأزرار .. يعني تقدرين تعرفين شنو إهتماماته

ويحب يشرب حليب فراوله وبطاط باربيكيو
وعلى الغدا سمك ويفضل الدجاج ( الفخذ ) .. ويحب الشوربة على الغدا ( ماجي أو فطر )
العشاء .. تشيكين فيليه أو وجبة هارديز !!!

يالله متى تمرين وتأخذينه :d

 

[whahd1]

انا اشوف انه دليل على الذكاء انه يسال لانه السؤال طريق العلم
اخوي لا تتظايق منه او وسع صدرك وحاول تجاوب على الاساله بمساعده ام الولد وانشالله خير

 

[وطني]

وأنت الصاج .. إتفقت مع نفسي أني أتابع المباريات وأقرأ الصفحة الرياضية وأسأل عن الأندية عشان إذا رجعت البيت أكون مستعد
بس شيلحق مع كثرة الأندية والتنقلات
مرة كنت أتابع الدوري الأسباني لأنه يحب فريق برشلونه ، قلت ليش مو منزلين روبرتو كارلوس ( يعني الأخ متابع ) وإلا يخزني ويقول أصلا كارلوس ( كان ) يلعب بريال مدريد والحين بتركيا ( ما أدري شنو إسم الفريق ) .

ما تسوى علي صح :باكي:

اليوم يقول لي :
( رولاندينهو .. ما أدري الأسم صح وإلا لا ) يقول صح لاعب برازيلي ( طبعا أنا قلت أكيد لأن إسمه يقول جذي ) قال يلعب مع فريق أسباني ( ما أدري قال برشلونه وإلا ريال مدريد .. نسيت )

قال شلون لو لعب الفريق الأسباني في نفس وقت لعبة لمنتخب البرازيل .. هاللاعب رولاندينهو وين يلعب ..

طبعا أخذت بنصيحتكم وطولت بالإجابة .. وقمت أخربط ( عرفت من تعابير وجهه ) بعدين قلت بكره أقول لك الجواب

يالله الحين فجج .. أنقذوني .. ترا بعدين أطيح من عينه ( رياضيا )

بالنسبة لـــ رونالدينو ....

يلعب الآن لـــ اسي ميلان الايطالي .... واذا حصل ان المنتخب والنادي يلعبان في نفس الوقت
فالأفضلية تكون للمنتخب .... بقوة القانون .​

 

[هورايزن]

..... وحاول تجاوب على الاساله بمساعده ام الولد وانشالله خير

خلني أخلص من أسئلة الأم بالأول وإلا تبيهم يجتمعون علي

 

[It's Me]

حتى أنا أحب البلايستيشن و الرسوم ..

ما قلت لي جم عمره ؟ و أبشر بالنتايج إللي تسرك ..

و هل أحيانا يستعبط أو لا ؟

و هل تبدأ أسئلته غالبا ً : بـ شنو أو ليش أو شلون ؟ يعني أي وحده فيهم ؟

 

[whahd1]

خلني أخلص من أسئلة الأم بالأول وإلا تبيهم يجتمعون علي

هههههههههههه
قول من الاول انه السالفه يايه بالوراثه :d
عادي لا تلومه

 

[هورايزن]

بالنسبة لـــ رونالدينو .... ​

يلعب الآن لـــ اسي ميلان الايطالي .... واذا حصل ان المنتخب والنادي يلعبان في نفس الوقت

فالأفضلية تكون للمنتخب .... بقوة القانون .​

يعني طلع رونالدينو ما يلعب مع فريق أسباني والتعبان يبي يمشيها علي

بس يا وطني أكيد معلوماتك مية مية .. ترى أبي أضغطه بكره عشان يتوب وما يسألني عن الرياضة بنوب بنوب

 

[هورايزن]

حتى أنا أحب البلايستيشن و الرسوم ..

ما قلت لي جم عمره ؟ و أبشر بالنتايج إللي تسرك ..

و هل أحيانا يستعبط أو لا ؟

و هل تبدأ أسئلته غالبا ً : بـ شنو أو ليش أو شلون ؟ يعني أي وحده فيهم ؟

الولد الله يحفظه ما يستعبط صدوق لدرجة السذاجة
وعمره 7
وأكثر ما يسأل ليش وشلون

اليوم سألني ليش فندق الشيراتون حاطين أعلام فرنسا وبريطانيا وأمريكا
طبعا فتيت عليه وقلت اللي ساكنين الحين بالفندق من أمريكا وبريطانيا وفرنسا ( وكأنها مشت عليه :d )

 

[It's Me]

الولد الله يحفظه ما يستعبط صدوق لدرجة السذاجة
وعمره 7
وأكثر ما يسأل ليش وشلون

اليوم سألني ليش فندق الشيراتون حاطين أعلام فرنسا وبريطانيا وأمريكا
طبعا فتيت عليه وقلت اللي ساكنين الحين بالفندق من أمريكا وبريطانيا وفرنسا ( وكأنها مشت عليه :d )

الزميل العزيز هورايزن .. آسفة جدا ًعلى التأخر بالرد ..

شوف أنا بكتب لك إللي أظن إنه بيساعدك .. لا تظن إن جم هالمعلومة إللي عطيتني إياها كافية للحكم على الولد .. لكن الشي إللي أنا متأكدة منه إنه مو عبيط

لو عبيط أو يتصنع التساؤل لكانت أغلب أسئلته على شاكلة " شنو " و أخواتها و خصوصا في هذا العمر فالسؤال بشنو غير وارد لأنه مرتبط بالادراك فحتى لو شاف كائن فضائي من المريخ(بهذا السن) ما راح يسأل شنو هذا راح يقول مثلا هذا شلون أذونه عيونه حلجة ؟ ليش جذي ؟ منين جا ؟ شيبي ؟ لكنه لن يسأل بـ شنو إلا في مواقعها ( أكله غريبة مثلا ً ) ..

.

نصائح عامة :
ــــــــــــــــــــ

- ولدك يسأل واجد لأنه ما يبي يتعب عقله بالتفكير فأذكى حركة تسويها إنك تسأل قبله << عكسية ..

يبه ليش جدام الشيراتون أعلام ؟ ترد عليه تتوقع ليش يا ذكي ؟ << إنفخه كثر ما تقدر عشان يحسب ألف حساب للسؤال بدون لا يتعقد من كثرة أسئلته ..

- حاول تسأله أسئلة إهو سألها لك قبل و إنت جاوبته .. و إذا جاوبك إنبهر و سو نفسك جنك فعلا ً ما تعرف الاجابة و إهو علمك إياها .. ( هذا يقوي حس المسؤولية عنده ) .. و بعدها طبعا ً اثني عليه و يفضل أنك تذكر هذه الحادثة أمام والدته أو عمه أو خاله :

تصدقون يا جماعة ذاك اليوم سألت حمودي ليش جدام الشيراتون أعلام واجد جان يجاوبني جواب يبين إنه مخه شغال عدل ... و هكذا

- دائما و أبدا ً جاوب على أسئلته بعد فترة تشويق و فرصة لكي يكتشف هو الاجابة في مدة أقصاها 3 أيام ..


أتمنى إني أفدتك .. و حاضرة لأي استفسار ..

:وردة:

 

[Bello]

اهم شي انك ما تزفه ولا تخليه يتعقد منك

يعني خله يتكلم على راحته وانت سايره ولا تستهين بفكره

لأنك اذا دقرته و زفيته راح يتعقد اذا كبر و ما راح يسولف معاك في الوقت اللي تبيه يكون مثل رفيجك