كل ما خلصت الانتخابات طلعولنا جم واحد من الناخبين اللي ما عندهم شغل غير سالفة أعلى رقم وأقل رقم.. ولو فلان نازل بالصباحية رقمه ما ينجحه.. ولو فلان نازل بالشامية جان رقمه اللي ايبه بصباح السالم ينجح وياه ستة.. حجي فاضي ماله معنى.. ولأني وايهت هالنماين جم ديوانية وسمعت منهم نفس الطرح.. حاب اليوم أكتب حقيقة غابت عن وايد من الناس.. مجلس 2003 كان مجموع الاصوات اللي حصلوا عليها النواب الناجحين بنظام الخمسة وعشرين دائرة وأيامها طبعا المرأة ما كانت تصوت.. الرقم كان (89.800) تحديدا تسعة وثمانين ألف وثمانمية ناخب؟ هذوله كلهم صوتوا حق الخمسين عضو اللي وصلوا المجلس.. بالتالي اختاروا رئيس مجلس الأمة جاسم محمد الخرافي بالتزكية ومحد خاض معركة الرئاسة.. ومعنى هذا كله ان جاسم الخرافي حصل على ثقة الخمسين اللي محد اعترض منهم ابد.. وأوتوماتيكيا راحت له ارادة (89.800) ناخب؟ يعني هالرقم محد حصل عليه موليه.. لا مسلم البراك ولا سعدون حماد ولا غيرهم.. يعني بمنطق اللي قاعدين يلفون الدواوين هالايام ويروجون حق اصحاب الارقام الكبيرة نقول لهم بنفس منطقكم.. جاسم الخرافي حاز على أعلى رقم بالحياة النيابية وبالمطلق.. اي نعم بالمطلق.. فعن الربربة والجمبزة والتظهول والهيو.. فكونا من هرطقاتكم.. وخلوا النواب اللي اخترتوهم يشوفون شغلهم.. وبطلوا تطبيل وتهبيل حق فلان وفلنتان.. ترى الارقام لغة مو بس انتو تفهمونها..