طيب.. ممكن تهدون شوي وتسمعوني..؟
خل ناخذها وحده وحده..
طبعا آنا لم أتمكن من مشاهدة البرنامج،ولكن من خلال وصفكم عرفت الوضع شلون صاير لأنه مو شي يديد..
مذيعه دلوعه ومايعه ومن غير درايه بفن الحوار والثقافه الله بالخير.. ومتأكد إن الأسئله الموضوعه كذلك أسئله سطحيه ومامنها فايده (لبسك، شعرك، معجباتك،سيارتك،وين تروح وين إتيي..إلخ)..
لاعب شاب حليوه.. مسوي تحسونه آخر موديل مضبط السكسوكه.. اللبس خو مايحتاي نحجي بعد (مكوله)..
طيب إنيي حق المشاهدين..
طبعا الشياب والعيايز موصوبهم.. الرجال والنساء الكبار سواء مهتمين بالشأن الرياضي أم لا ما أعتعد راح يتابعون هالبرنامج.. الشباب والشابات (فوق 23 سنه) ممكن يتابعون بس ماراح يعجبهم وبقعدون ينتقدون البرنامج ويستلمون المذيعه واللاعب والمعد والمخرج ووزارة الإعلام والوزير والحكومه ومايخلون أحد..
إذا منو بقى..!؟
آها.. الشباب (تحت 23 سنه) والمراهقين والمراهقات..
آنا أجزم (على قوله سعد الفرج في درب الزلق لما يشرح مشروع "الباكه" حق عبدالحسين) إن أغلب المراهقين والمراهقات قاعدين مجابلين البرنامج وحريصين على متابعته.. بل إنه -البرنامج- راح يكون حديث الساعه بينهم لمده لاتقل عن اليومين..
طبعا النقاش حول البرنامج راح يكون من نوع (شفتي شعره.. شفتي سكسوكته.. شفتي المذيعه شلابسه وشلون تدلع على حمني.. شفت طلع موتره الفلاني.. والله لبييس..إلخ) في النهايه البرنامج نال على إستحسان ومتابعة أغلبية هذي الفئه من الشباب.. ومتأكد إنهم يترقبون من هو الضيف القادم..
وين المشكله..!؟
المشكله في طريقه تفكير وإهتمامات الجيل القادم.. اللي إحنا بس قاعدين ننتقده ونتطنز عليه من غير تقديم حلول سنعه للإرتقاء بمستواهم الثقافي وطريقه تفكيرهم.. (ورجاء لا يطلعلي واحد يقولي وازع ديني وإبتعادهم عن تعاليم الدين..) لأن تلقى معظمهم مهتم بالجانب الديني ويتكلم عن الدين ونصرة الإسلام.. بس المشكله ماكو ثقافه ولا إهتمامات مفيده.. مع العلم إن فيهم طاقات جباره..
إنزين والحل..!؟
طبعا الأسره عليها دور بس هم الله يعينها.. ولازم نحط في بالنا إن موكل الآباء والأمهات على مستوى تعليمي أو ثقافي يأهلهم لتوجيه الأبناء للإتجاه السليم (ترى وايد على باب الله).. ولا ننسى تأثير المجتمع والبيئه المحيطه على الشباب..
الدوله..
نعم الدوله عليها مسؤليه كبيره من خلال أجهزتها.. وأهم هذه الأجهزه هو وزارة التربيه.. إلي مع الأسف أصبحت "وزارة التدريس" وبس.. فلا تربيه ولا حتى تعليم..
وكذلك وزارة الأعلام.. واللي أصبحت متأكد من ضرورة تفكيكها وخصخصتها..
ولكن من وجهة نظري الدور الأهم والمسئوليه الأكبر تقع على مؤسسات المجتمع المدني..
فهذا دور جمعيات النفع العام.. فعليها العمل على جذب هذه الفئه والإهتمام فيها والإستماع لها وإعطائها الفرصه للتعبير عن نفسها من ثم إستغلال هذه الطاقات في خدمة البلد وتطويره (مو مثل إلي فبالي..)
وبس شكلي طولتها..