سؤال وجواب تكفون يا اخوان حلو مشكلتي ... القولون

[ابو مناحي المطيري]

السلام عليكم

انا مشكلتي يا اخوان يا طويلين العمامير هي مرض القولوون ... الله يبعدة عنكم

وانا متكيسل اروح لدكتور مختص اسالة

هـ المرض هدا لا جاني اعود بالله ما يخليني اعرف افكر ابد ...

هو يجيني بين فترة والثانية

لكن هاليوميين جاني وشكلة عزم يترك بطون العالم يبغى في بطني :باكي:

المهم يا دكاترة يا فطاحلة ما اطولها عليكم

وش علاج المرض هدا ؟؟
يعني وش هي الماكولات و المشروبات التي تساعد هدا المرض ويزيدة ؟؟

 

[درع الجزيرة]

وهذا رابط لمواضيع جابر القحطاني في جريدة الرياض​

http://www.alriyadh.com/file12.html​

 

[calculator]

درع الجزيرة :وردة: مشكور شكور \ الشرح الواقي \ ومشكور على العنوان
اشهد انك نشمي :وردة:

 

[درع الجزيرة]

درع الجزيرة :وردة: مشكور شكور \ الشرح الواقي \ ومشكور على العنوان
اشهد انك نشمي :وردة:

العفو اخوي

ما عليك زوود يا غالي​

 

[حبيب حبيب]

اممممممم

السلام عليكم

اولا ما تشوف شر اخوي

بس يعني نصيحتي انك تروح الطبيب وما عليك من هالحجي (يلعبون فيك) واللي يقولك اكل مادري شنو واسمع نصيحة مجرب .. الخ

مع احترامي للجميع

بس يعني على فكرة مو شرط انه العوار اللي تحس فيه سببه القولون، لانه في اكثر من عضو داخل البطن

المعدة، البنكرياس، الكبد، المرارة، الامعاء، والقولون، وكلهم مرتبطين فبعض، فما يصير تحكم على الشي من كلام الغير بدون دليل، انا معاك انه ممكن يكون كلامك صح، بس يعني لازم تتأكد.

لانه الطبيب (الشاطر) لازم يسألك عن الالم، شلون صاير؟ وين بالضبط؟، هل الالم ثابت ولا تحسه بمكان ثاني؟، متى يزيد عليك الالم؟، هل في لون بالخروج؟، هل حالتك النفسية زينة؟، هل في ضغوطات عليك وتفكر وايد؟، هل البول -وانت بكرامة- لونه متغير؟، ... الخ من الأسئلة اللي لازم يسألها اي دكتور عشان يعرف، واذا تبي نصيحتي روح حق دكتور جهاز هضمي اسمه فؤاد العلي، ما شاء الله عليه، الطبيب الخاص حق الأمير (اذا ما خاب ظني)، موجود في مستشفى مبارك.

اما بالنسبة حق انواع الأكل الصراحة ما عرف، بس اللي أعرفه انه التدخين يسرع حركة الامعاء بسبب مادة النيكوتين اللي تشتغل كمحفز عصبي للعضلات الطولية والدائرية للجهاز (القناة) الهضمي ككل.

وما تشوف شر .. : )

 

[ALQALLAF]

راح تدعيلي يالمطيري

بو مناحي اشلونك وما تشوف شر بالنسبة للقولون في مستشفى دار الشفاء بحولي دكتور كويتي عائلتة الحمر من الحساوية بس علاجة وحدة بوحدة انصحك تزورة
ومشافى يا بومناحي

 

[keek]

الله يشفيك يابو مناحي


يابو مناحي اسمع العمل وترك عنك


انا جاني مرض لاتهاب بالقولون مزمن اهو مرض ( الكرونز ) الله يبعدك عنه ان شالله



افهم كلامي عدل عندك دكتورين
(احمد الفضلي استشاري جهاز الهظمي في مستشفى المبارك الكبير)

وعنده عياده بالحولي قريب من معهد تجاري


وعندك مساعد العصفور ايضا استشاري ( عيادة بشعب البحري )



رووح سو مناظر


لازم تفحص نفسك

وحاول انك ماتزعل نفسك + ولا تاكل دسم ليلا ( يعني عزايم افتك منها)


وخاص الجلسه لوحدك لا تقعد برووحك


هذا اهم شي


والله ياخوك توني اشوف موضوعك



والله يشفيك ان شالله ويشفي مرضى المسلمين

 

[المطيريه]

القولون العصبي ( النفسي )

ما سمعت بعلاج او وصفه الا وجربتها ..ولا في اي نتيجه



النفسيه لما تصير :إستنكار:ينعفس علي ..ويظل بالايام وانا اعاني منه !!!

اعتقد هالمرض ..ماله حل







​

 

[Librax]

يا جماعة الى يبي علاج للقولون مافي ... لانه نفسي أكثر ماهو عضوي

ولكن من خبرتي وتجربتي الشخصية مع قولوني الموقر في شغلات معينة تتبعها وان شاء الله تنسى او تخفف الألم بشكل كبير جداً

1- ممارسة الرياضة يومياً
2- عدم شرب غازيات نهائياً
3- عدم اكل الفلفل بأنواعه
4-الأكل بهدوء وراحة
5- الأكثار من الماء

وأخيراً اكتشف الاطعمة الى يتحسس منها قولونك لانه تختلف من شخص لأخر وحط عليها بلاك لست او قلل منها بشكل كبير انا الحليب يجيب العيد فيني اما الروب ميه ميه

واسئل الله لي ولكم الشفاء من " داء العصر " لانه تفوق على السكر والأطباء يسمونه هكذا

 

[افتخر فانت مطيري]

ابومناحي طيع شوري ووخر عن الفلفل وكل شي حامض

 

[0utsider]

ماالك الا هيفا ،،،،،،،،،،،،،،،،،،،،،،المرض معاناة لامفر منها غالبا تنتهي بالموت ، وليس شيئا سوي الموت ، والحياة نفسها مرض مزمن ، والدليل انها داااااااااااااااائما ، تنتهي بالموت ، فالمرض مرض ، والحياة مرض ، وكلاهما الي الموت .


ومالك الاهيفا ،،،،،،،،،،،،،،،،،،،،،،،،،،،،،،،

 

[وطني الكويت لاعدمناك]

ماتشوف شر يابو مناحي

القولون طال عمرك انك تدير بالك من الدهن والحار

ونصيحه كثر ماي ماي ماي عليك بالماي وعلى الريج وحاول ان بطنك مايمسك يكون ماشي على طوول

وكل علج بعد الوجبات او سفن اب ترتاح

والقولون اقسم بالله جاب لي وسواس انا مثلك تعبت

 

[اعرابى]

السلام عليكم
ماتشوفون شر يااخوان انشاء الله
كل انسان معرض لى اعراض القولون :باكي:
اذا عطها شوى او الوجبه دسمه مع نفسيه و مع ومع
الحل.1) فنجال كمون وحبه حلوه وكراويه ويسون وخلطهم
الطريقه.حط ملعقه من الخلطه فوق الماء اذا طبخ خلها تغلى 6 مرات وحطها بكلاس وقط الكلاس وبعد 8 دقائق اشرب عليك بالعافيه
2)عشبه معجزه الشفاء بالجمعيات موجوده(550فلس)
3)الشاى الاخضر الاصلى مو شغل الجمعيات,فى منتج لى شركه شواهى عجيب
وماتشوف شر انت واللى يقرأون:وردة:
ودعواتكم لنا

 

[q8_500]

يعني شنو قولون ؟؟

وشنو اعراضه ؟؟

اخاف هو فيني وانا مادري ،، ؟؟​

 

[عامر بن صعصعة]

شوف هذا الايميل يالي

يمكن يفيدك والشفا من الله

السلام عليكم ورحمه الله وبركاته
​

وصفه الدكتور القحطانى للقلون

​

كنت اعاني من مرض القولون لعدة سنوات والله العظيم انه كان يغمى عليه من شد الالم ولا اصحى الا في المستشفى واستمريت على هذا الحال فترة طويلة والحمد لله ولاخليت مستشفى ولاطب شعبي ماجربته حتى فقدت الامل الا من رحمة الله في يوم كنت اتابع قناة الاخبارية وشفت الدكتور جابر القحطاني وسمعته يتكلم عن امراض القولون قلت اتصل ماني خسران شي والحمد لله المهم قلت له عن حالتي فقال لي عن وصفة بسيطة جدا استعملها 15يوم متواصلة قبل الاكل وبصراحة ماني حريص على المواعيد كثير المهم استعملتها تقريبا زي ماقال الله يجزاه عني الجنة ومن بعدها نسيت الم القولون ولله الحمد والمنة ولي الان اكثر من ست سنين وانا بخير الحمد لله ونادرا مايجيني مع الزعل اكثر شي المهم اعطيتها ناس كثير وكلهم دعوا لي ونفعت معهم وبعضهم نسي الالم نهائياوانا منهم والحمد لله الطريقة بالضبط زي مااخذتها من الدكتور هي كالتالي
ملعقة صغيرة بابونج
ملعقة صغيرةحلبة حب
ملعقة صغيرة يانسون حب
تغسل وتوضع في كوب ثم يضاف نص ملعقة صغيرة مستكة مطحونة ونص ملعقة زنجبيل مطحون ثم نعبي الكوب ماء مغلي ونغطيه ربع ساعة ونشربه قبل الاكل برضه بربع ساعة اول اسبوعين ثلاث مرات في اليوم وبعدين حسب الحاجة يعني اذا حسيت بالم خذ منها واذا ماحسيت بالم بلاش
والله العظيم اني ماكتبتها الا ابغي الاجر والدعاء منكم ورغبة مني في التخفيف عن من ابتلاهم الله بهذا المرض والحمدلله من قبل ومن بعد ولا تنسون تدعوني لي وتدعون لاولادي بالتوفيق وحفظكم ورعاكم ​

والله اعلم ​

 

[ولد الـشراطين]

ابو مناحي لاهنت عطني ؤقمك بالخاص علشان اطرشك على دكتور في السعوديه

وحده بوحده بفضل الله ودية العجوز ( الوالده له ) قبل شهر ولله الحمد الحين مئه مئه بفضل الله

ويعطيك ضمأن يقولك اذا رجعلك تعال اعالجك مجانا

 

[ألب آرسلان]

الله يشفيك يا ابومناحي وتخفيف ذنوب إن شاء الله

بس عليك بالعكه و الشعثه << يقول لا تصدق وأستاثم فيك