هل سبق لك تجربة السفر وحدك ؟!

[الأصمعي]

ههههه وش تحسبه تسافر مع نفسك
انا اشوف ان حلات السفر وحسنت السفر الاكبر هي الاجتماع

على طاري الإجتماع و شوفة الناس و اليمعة ..​

مرات تحصل معاي إللي بالكويت مثلاً ما اواطنه كلش ..​

بس لا سافرت و شفته هناك صدفة ألاقيه خوش واحد و ضحك و لما ترد الديرة ما تبلعه ​

مادري ليش و مادري إذا يصير نفس هالموقف مع غيري بالسفر و لا بس انا إللي الاحظ هالشئ !​

تحياتي .. :وردة:​

 

[بنتلي]

انا بالسنه اسافر اكثر من اربع مرات وخصوصا شرق اسيا ... ورحت مرة بروحى لاكن صراحه عذاب

تدش مطعم بروحك تلتفت يمين ويسار العالم كلها تسولف وتكركر وانت بس تطالع فيهم تروح رحلات تطلع بحر تطالع اليخوت اللى حواليك العالم مستانسه وانت بس عيونك تلاقط

صراحه لو تمرض لا سمح الله محد درى عنك لذالك اقول السفر بروحك عذاب اقعد بيتكم احسلك

الا اللى عندة شغل بس سياحه لا تروح الا وياك رفيج شقردى ولا بلاش

 

[bujassim]

ياجماعه

1000 دينار بدون تذكرة

تودي اوروبا اسبوع ؟

اللي يعرف ينورني

باي

 

[بن ذى يزن]

اذا شغل وماتبي احد يدري عنه لحالك
اما اذا سياحه وتمشي لا اخذ احد معاك

 

[كويتي مال أول]

سافرت كذا مره بروحي وبصراحه كلها سفرات شغل وفي كل سفره لازم ألقى واحد من الربع , يعني مستحيل تروح بسفره وتكملها بروحك حتى مره رحت لمدينه مكسيكيه على حدود سان دييجو أسمها تيوانا ..... مدينه في آخر العالم .... لقيت فيها واحد كويتي ولما تكلمت وياه طلع معرفه ويدرس بأريزونا ..... أنصدمت

ودي أعرف شلون أفصل نفسي عن العرب ماني عارف

آخر سفره منهم كانت ب 2006 ولو تعطيني ألحين وزني ذهب ماسافر بروحي ...

 

[أبوتركي]

oooooooooo

الواحد ما يسافر بروحة اللي يكون مضطر - و لا شالله حاده يكون وحداني.​

صحيح إنه الواحد لما يكون من النوع إجتماعي - ممكن يكون صداقات و معارف في سفرته لكن هم الجمعه حلوه ! ​

لا أقصد إنك تسافر مع 3 أو 4 أشخاص (أعوذ بالله) ...فقط واحد معاك كفايه. في دردشه غشمره ضحك.​

لاحظ إنه الغرباء في البلد اللي تزوره، يكون عندهم قابليه في الاندماج معكم - لان تبدو على محياكم إنكم مرحين و إجتماعيين.​

أما واحد يصل الفندق بروحة، و يقعد في غرفه بروحة، و يطلع للمطاعم أيضا بروحه - وايد صعبه. ​

السفر لحالك يكون روعه في حاله واحده فقط...إما إنك تعرف ناس أو دليل هناك عشان يسلونك و تنطلق معاهم، منذ وصولك لغاية عودتك ​

أو عندك قدره على تكوين صداقات و معارف مع ناس من قدرك، وين ما تحط رجلك !! ​

oooooooooo

التعرف على اناس في الرحلة جميلة ولكن لابد من الحذر والحيطة !

خلونا انكون صريحين ياجماعه انا وايد لاحظت من الزملاء والزميلات الأعزاء يقولون انه السفر الوحدانى ممتع اوكى ممتع وايجابينه ايضا حلوه وانا اتفق معاكم لكن سلبياته اكثر .. والسفر الوحدانى يخوف . خصوصا اذا ديره بعييده وغربه .. الواحد يخاف .. ماتضمن صحتك اهناك وله تضمن المخاطر الى اتواجهك .. من جرايم وحوادث وامراض معديه او امراض مؤلمه او اصابات لان انت رايح ديره مافيها امان وله احد بيهتم فيك نفس الكويت وله سفاره وله قنصليه .. ولازم ايضا لغتك الأنجليزيه قويه .. ومن واقع تجربتى لما سافرت دبى ... كنت رايح بروحى .. اتذكر تعطل فينى اصنصير الفندق ومافى احد اتصل عليه بتلفونى ينقذنى لا صديق وله شخص اعرفه . وعشت ربع ساعه من الرعب داخل الأصنصير العطلان لحد ما صارخت صرخه استغاثه لحد ماسمعونى وانقذونى وصوتى صابه البحه من قوه صراخى والحمدلله على سلامتى .. اوكى سافر ابروحك لكن بشرط انك اتحط كل احتياطات وحذرك واتكون مفتح ذهنك ومنتبه وعندك خبره فى التعامل اما الشخص المسبه راح يضيع 100 فى % ..

عاد مشكلة الاصنصير هذا .... شكله عارف انك مسافر بروحك ,,,

الله جان زين اسافر بروووووحي..​

مافي جزيره فيها حريم بس اروحها..​

الله راااااحه

توني راد من السفر بروحي قعدت 9 أيام مالها طعم وتتعرف على أشخاص بالسفره بس فرق لما تكون مع ربعك الخاصيين

بصراحه ربعك معاك أحلى بس ظروف رحت بروحي​

ممكن رحلتك من الاساس ليس للسياحة !

جربت السفر لوحدي ولمدة اسبوع ( الصراحة كانت اول تجربة واخرها باذن الله ) ياااا الله والله تكره نفسك​

والله يوفقك وين ما قبلت وجهك​

تحياتي لك​

واياك الله يبارك فيك ...

شكل بسويها الاختلاء بالنفس والحرية شيء طيب

هذا هو الهدف .... الجلوس مع النفس جميل جدا ....

السفر وحيدا ممتع فى بعض الاحيان
ولاكن تحس بالوحشه فى بعض الاحيان

الوحدة جميلة ولكن لاتطول ....

كتجربة ... سافرت بروحي لبوكيت مرتين والمره الثالثة مع شباب و كانت كأني أول مره اجي بوكيت

نعم الشوارب بو عطشة وبو سعسع ( خوياي)

شكرا لك على المشاركة .... ولكن ماذا عن التجربة ما سلبياتها او ايجابياتها

اللي يسافر لحاله معقد نفسياً

​

ليس اطلاقاً أن يكون مقعد نفسيا ... المعقد هو من لايعيش الا لوحده ولا يختلط بأحد .... او الشخص الذي لايستطيع التصالح مع نفسه والجلوس معها بعض الوقت
التوازن مطلوب في كل شي
​

 

[آل قــحطــــانـيــة]

لا ابدا ما جرب السفر لوحدي وبالاصح ماحب السفر بروحي لان مع الجماعة رحمة

 

[نجلآء]

يآآلييت أقدر أسآفر لحآآلي ، أحسه بيكون شي جميل ، وراحة بآآإل ، 

بس عآد بمآ إني ( سعوديه ) خليجيه
يعني لآزم يگون معگ ابو الشبآآب ،

 فـ/مسسستحيل اسآفر لحالي
الا بأحلآم اليقظه :/ 

عسسسئ ـآ العووض بالجنه يآ بنآآت ، 
​

 

[أبوتركي]

في تاريخ 2011-04-01
قررت الذهاب للقاهرة لوحدي وذلك للإطمئنان على صديق عزيز لي من أهل القاهرة

السفرة لوحدك انت امير نفسك

فعلاً تكون أمير نفسك

لم اسافر وحدي أبدا ولن أفعل ...​

ممكن مع التجربة تتغير الصورة !!

مافيها شي اللي يسافر بروحه

كل واحد ومزاجه

احسن من ما يسافر واحد يعكر مزاجه

على الاقل بروحه يروح وين مايبي

كما قال أحد الاخوة انت امير نفسك

انا توني جاي من سفره بروحي​

سفره نقاهيه ثقافيه استرخائية جميله جدا​

وكان صاحبي فيها الكتاب​

وانا من النوع الذي يعيش الجانب المشرق من الحياة في السفر​

خير جليس في الزمان كتاب

انا جربت السفر لوحدي سنة 1994 لدبي
ومره سوريا سنة 1996
ومره لبنان 1998
وكنت مبسوووووط علي الآخر

والناس اذواق يالربع

فعلا الناس اذواق ...

السلام عليكم ورحمة الله وبركاته

اولا اخوي بوتركي موضوعك يعتمد على شخصية الفرد واسلوبه وبما انك طرحت الموضوع للاستفاده من خبرات اخوانك حبيت اشارك معهم لاني مريت بالتجربه الي تسأل عنها

بالنسبه لي خططت للسفر لمدة عشرة ايام من خلالها كان ينتظرني صديق هناك ليقضي معي 4 ايام ثم سوف يذهب لحاجة العمل ,, اخوي في طريقتين انك تسوي لنفسك جدول وتمشي عليه! ممكن يضيع الوقت تدش بقروب لرحلة سفاري ولا تروح رحلة غوض ولا رحلة لجزيرة عن طريق استأجار يخت صغير او قارب على حسب ميزانيتك او اي شئ ترفيهي اخر ولاكن انتبه !! لاتقضي وقتك في غرفة الفندق وحيدا لن تستمع بوقتك وحيداً!

تجربتي اختصرها لك اربع ايام كانت مع صديقي راحت مثل البرق من الوناسه والروحات والجيات كل مكان رحنا له الحمدالله واستانسه بس لما كنت بروحي ,, رحت جزيرة قريبه مني عن طريق قارب تخيل الرحله ممتعه وكل شي بس الونيس مافيها تبي احد يسامرك يسولف معك يشرب عصير جاي وياك تقوله عن شعورك بهالحظات يعني صاحب سفر تكون عارفه وعارف طبعه ويعتبر اخو دنيا

للامانه انا رحت الجزيرة ورديت تعبان كانت حلوه بس طعم حلاة الصداقه الونيس يفرق يفرق صدقني

وبعدها رحت مكتب سفريات وحجزت على اقرب طياره الي اهي كانت في 6 يوم وسافرت

قعدتك بروحك تشرب شاي عصير كوفي اي شي بروحك ممله بعيدا عن التصنع والاجتاعيه الزائده تسلم على الناس وتسولف وياهم ماكو مشكله بس هم ماراح تقولهم عن شعورك يعني ماراح تسولف مثل ماتسولف مع صديق مقرب لك

اختصرت لك كل مراحل رحلتي وخبرتي بالموضوع

مع العلم الموضوع يخصني شخصيا بعض اصدقائي يذهب وحيدا ويجلس لفترات لاكن يعرف اناس من البلد الي يذهب لها لذا الناس اجناس وكلن يعرف نفسه

وانت شوف نفسك وين والله يوفقك ويسسر امورك بحياتك كلها


سلام

اشكرك على سرد تجربتك الجميلة ...

السفر وحداني ممتع ..ولكن اللي امتع منه هو التعرف على الناس خلال السفر ولكن قبل التعرف على شخص يجب ان تكون الامور واضحة لك بخصوص هذا الشخص وماذا يلزمك من معرفتة وكلها سوف تعرفها خلال دقائق ولكن يجب ان تكون شديد الملاحظة لأن بعض المعارف يصبح مشكلة كبيرة احيانا

صحيح كما قلت اخي السفر لوحدك لايعني ان تكون منعزل عن الناس

 

[" كش ملك "]

توي جاي من سفرة 10 ايام سياحة وبروحي لبلد أجنبي وأول مرة اجيه ولا أعرف فيه أحد
حبيت أجرب:

بصراحة ما احب أقول أكثر من اللي قالوا الشباب كلامهم كل صحيح

السفرة بروحك فيها أيجابيات حلوة
مثل الخلوة لوحدة
الحرية تروح متى ما تبي وتنام وتقوم متى ما تبي
السياحة بجانب الحيطة والحذر لأنك بروحك لو طحت ما حد يمك
واجمل ما فيها انها تجربه يكمل جمالها بعد ما ترجع وتذكر ما جرى
اما سلبيتها مثل ما تفضل الاخوان
أحيانا تحدث بعض المواقف يضبط فيها التعليق والضحك ولا تجد من تتحدث معه
في المطاعم والمقاهي والرحلات أيضا تجد نفسك وحيد:باكي:
واخيرا الخوف من ان يحدث شيء لا سمح الله لك فلن تجد من يسعفك او يقف بجانك

أخيرا اعتقد أنها كانت تجربه أو مغامرة جميلة استمتعت بها كثرا ... لكن لن أعيدها بهذه الطريقة

 

[ام الخير100]

قبل لايصير جهال كنت اسافر شغل وبعد ماصار عندي كتاكيت اروح الصبح وارد بالليل ..تعب بس ماينامون عيالي بعيد عني
وصرت اروح البلدان القريبه والبعيده اخلي احد ثاني بروح

 

[واثق الخطوة]

اتمنى ان اسافر وحدي .. للاسف عدم وجود المال .. ووجود الجواز السلفر : )

.. لكن السفر وحدك ممل جداً تحديداً بالسعودية سافرت للرياض من الكويت بسيارة بالخط تمللت شلون لو اقعد بديرة لحالي ! الحمدالله لي ربع بالرياض واستانست

تجربة شخص عزيز علي .. لبريطانيا لحالة .. السفر لحالك لبريطانيا حلو اذا كانت المدة اسبوع واذا كثرت اسبوعين .. وتسوي لك جدول 5 ايام تروح لاماكن محدده واليومين تضيع فيهم .. يقول يقعد من اليوم اذا كان رايق وهو كان دوم رايق ^^ .. يصعد المترو ويمشي معا الناس وهو مايدري وين رايح ! يقول اضيع وارد لمكان الاقامة .. تحصل له مواقف جميلة من حسن حظة ..
تعرف على باكستاني كان يشتغل بالخليج .. ببريطانيا عنده بقالة وعندهم سوبر ماركت
الباكستاني يقول الشغل بالخليج مربح لكن لايحترموني
ببريطانيا مربح اقل من الخليج لكن يحترموني .. فاخترت الربح الاقل معا الاحترام ..


بسافر 24-6 للسعودية كعادتي :وردة:لحالي من الكويت بسيارتي والمناطق الي بجيها كلها اعرف فيها اصدقاء لي ..

وبالخليج ماتحس بالغربة او انك مسافر لحالك مهما كان .. السفر لوحدك اذا ليست بااوربا او شرق اسيا .. واسبوعين لااكثر .. مٌمل .. شكرأً لكم

 

[أبوتركي]

قبل لايصير جهال كنت اسافر شغل وبعد ماصار عندي كتاكيت اروح الصبح وارد بالليل ..تعب بس ماينامون عيالي بعيد عني
وصرت اروح البلدان القريبه والبعيده اخلي احد ثاني بروح

مع وجود الاطفال نظام الشخص لابد يتغير حتى في السفر ... شكرا لكِ

اتمنى ان اسافر وحدي .. للاسف عدم وجود المال .. ووجود الجواز السلفر : )

.. لكن السفر وحدك ممل جداً تحديداً بالسعودية سافرت للرياض من الكويت بسيارة بالخط تمللت شلون لو اقعد بديرة لحالي ! الحمدالله لي ربع بالرياض واستانست

تجربة شخص عزيز علي .. لبريطانيا لحالة .. السفر لحالك لبريطانيا حلو اذا كانت المدة اسبوع واذا كثرت اسبوعين .. وتسوي لك جدول 5 ايام تروح لاماكن محدده واليومين تضيع فيهم .. يقول يقعد من اليوم اذا كان رايق وهو كان دوم رايق ^^ .. يصعد المترو ويمشي معا الناس وهو مايدري وين رايح ! يقول اضيع وارد لمكان الاقامة .. تحصل له مواقف جميلة من حسن حظة ..
تعرف على باكستاني كان يشتغل بالخليج .. ببريطانيا عنده بقالة وعندهم سوبر ماركت
الباكستاني يقول الشغل بالخليج مربح لكن لايحترموني
ببريطانيا مربح اقل من الخليج لكن يحترموني .. فاخترت الربح الاقل معا الاحترام ..


بسافر 24-6 للسعودية كعادتي :وردة:لحالي من الكويت بسيارتي والمناطق الي بجيها كلها اعرف فيها اصدقاء لي ..

وبالخليج ماتحس بالغربة او انك مسافر لحالك مهما كان .. السفر لوحدك اذا ليست بااوربا او شرق اسيا .. واسبوعين لااكثر .. مٌمل .. شكرأً لكم

أشكر لك جهدك ومشاركتك الجميلة والمفيدة :وردة:

 

[سالم أحمد80]

أنا أستمتع بالسفر وحدي، خصوصاً إذا كنت أريد أن أستكشف تاريخ وثقافة البلد التي أنوي زيارتها.

 

[المهذب]

المسألة تعتمد على شخصية المسافر
أنا أفضل أن أسافر وحدي ولفترات طويلة
ودايما اصور في بالي اني اعتبر اهل هالديرة الجديدة
مثل اهلي وناسي ولا اعتبر نفسي غريب
لكن تجنب الاماكن والاوقات الخطرة في التنزه
وصدقني سهالات ولا في اي خطر عليك
وفي زمن التكنولوجيا والوات ساب والتويتر أصبحت
كأني بالكويت ولا أحس حتى بالغربة ..واذا حسيت بالملل من مدينة
معينة اخذ قراري ولا احد يناشبني ..مجرد خذ جنطتك وحرك بالقطار لمدينة اخرى
وتغير جو وما احلى ان تنام متى ما تبي وذهنك صافي
صعب انك تلاقي رفيج ينشد فيه الظهر ويناسبك
اما ان يكون كسول او منغلق او عنده عادات سيئة
او يحمل طبائع او افكار وسوالف تكدر عليك سفرتك..!


وماشي على حكمه تقول ونس نفسك بنفسك
حلو انك تعيش مثل الطير الحر لا احد يقيدك

وارجع واقول المسألة ترجع لشخصية الفرد
وكل واحد يختار الطريقة اللي تناسبه


​

 

[ايوه]

حلو بكل المقاييس بس اصعب شي يوم تروح مقهى ولا مطعم
والموظف مصري وانت جاي بروحك تبي تصفي ذهنك وعاد يشتغل قرقة
عليك ولا لي شافك بروحك كل شوي يخز فيك يكرهك بعيشتك هههههه

 

[سهيل الجنوب]

السفر لوحدي جميل. جداً بالسيارة كان او بالطائرة وهذه المتعة الجميلة و الإحساس بالسرور لا يتجاوز خط الرحلة لكن حين اصل الى الفندق. يتلاشى كل شي
ينتابني. القلق واشعر بفراغ كبير يجعلني اندم على أنانيتي المفرطة !

 

[أمين أفندي]

السفر لوحدي جميل. جداً بالسيارة كان او بالطائرة وهذه المتعة الجميلة و الإحساس بالسرور لا يتجاوز خط الرحلة لكن حين اصل الى الفندق. يتلاشى كل شي
ينتابني. القلق واشعر بفراغ كبير يجعلني اندم على أنانيتي المفرطة !

عيدك مبارك حابس باشا

والله ياأخي الكريم نفس شعوري رايح المطار والمزاج على كيفك وبالمطار ماخذ جو وحالتي حالة وبالطيارة ماأعطي وجه ورافع الجام وأول ماأدخل الغرفة بالفندق صكت فيني الدنيا

وحشة غريبة

 

[ابعتذر]

السفر لوحدي جميل. جداً بالسيارة كان او بالطائرة وهذه المتعة الجميلة و الإحساس بالسرور لا يتجاوز خط الرحلة لكن حين اصل الى الفندق. يتلاشى كل شي
ينتابني. القلق واشعر بفراغ كبير يجعلني اندم على أنانيتي المفرطة !

:إستحسان::وردة::إستحسان:

اذكر مره رحت لحالي بسيارتي لدبي وسوريا

تخيلوا كم جلست هناك

ما تجاوزت ال 24 ساعه

وعقبها رديت الكويت ورحت لصفاة الظهر ابي اشتري هرفي للثلاجه ويدقون علي الشباب فلان وينك قلت انا بالصفاه قالوا جايينك المهم خذينا الهرفي ووديته البيت وبالطريق قال واحد حلالاه يالمطار الجو ما يساعد قلت والي ما يصمل قالوا الي ما يصمل مثل ........

حدوني على اقصاي قلت توكلنا ع الله بس عندي شرط قالوا وش شرطك قلت ندرعم للمطار واي رحله نركبها قالوا قدااااام

رحنا للمطار ونحجز ونركب وأحلى 5 أيام من العمر

ضحك وفله حجاج أفلام أكشن وخوه ما مثلها خوه

يمكن تمرض ويمكن تصير لك مشكله لازم معك خوي

 

[عناق وشيك!]

مستحيل اسافر بروحي

اسولف مع منو

اتونس مع منو

غلقه

فالجواب لا ماعمري سافرت بروحي