ناصر بن تركي
عضو مخضرم
يظهر إني " كادود " فئة " مغازلجي "
بس خواف !!
كان معي " عبري " باكستاني .. وأثناء الحديث معه عرفني بأنه معلم أدوات صحيه .. ويخدم الطيبين .. " كلو بحسابو طبعا" "
وأثناء السوالف .. واخوك الكادود " جريمبه " أي غتره بدون عقال ..
وعند المرور على إحدى الشوارع بين المناطق ..
لمحت سياره واقفه .. يمين الخط .. وتبين بأن قائد السياره " إمرأه " سفور ..
وكما تعلم قارئي العزيز .. بأني أضع مساعدة الناس في المقام الأول .. " ولازم نعين ونعاون "
توقفت أمام السياره الواقفه .. على يمين الخط ..
وكعادتي بتقمص دور الشهامه والنخوه .. ( لو كان قائد السياره رجل .. لما حتى وقفت له لو أشر )
الباكستاني في الوانيت .. و حضرتنا نزلت لإعانة المسكينه التي توقفت سيارتها ..
الله .. الله .. الله أكبر ..
شهالجمال .. وشهالحلاوه ..
" أشقر على أشقر " .. أنا أشهد والله ..
" كالعاده " إرتبكت أمام فتنتها .. و روعة جمالها ..
قلت .. خطاج السوء .. أبشري بالعون .. عسى ماشر يالغاليه .. ( بالطبع أنا أكذب .. أصلا" حصلت لي نظرات مجانيه .. من هذه الصدفه المجانيه .. )
قالت .. مشكور .. ما أبي شئ .. توكل على الله ..
قلت .. ترى الدنيا فيها خير يالغاليه .. وأنا و وانيتي والعبري تحت امرج .. شنو تبين حاضر .. أجيب ميكانيكي .. وإلا أوصلج .. ترى حاضرين .. ( كنت أتحدث بنخوه وشهامه .. وكما قلت لك كنت كذاب .. فقط كنت أريد النظر .. والتمتع بالنظر )
قالت .. رجاءا" ياراعي الوانيت .. روح .. فضحتنا بالطريج .. انت شتبي مني ..
قلت .. أفا والله .. آنا شبي منج . هذا جزاء الإحسان وآنا واقف لج في الطريج .. وابي أساعد لله في الله !!!!!!
أثناء حديثنا .. وقفت سياره نقل حديثه " ونش سيارات من شركة BMW .. لنقل سيارتها .. ومعها سياره حديثه .. لغستبدال سيارة " الشقراء المزيونه " ..
قالت .. هاه شوف ياراعي الوانيت .. هذه الشركه جايبه لي سياره .. وبتاخذ سيارتي .. يعني خلاص .. مع السلامه .. ترى ازعجتني !!!!!!!
قلت .. ماشاء الله .. أثاريج بنت شيرج ..( يعني بنت غنيه ) .. وأنا جاي أساعد لله في الله ( قلتها بطريقه أضحكتها كثيرا" )
قالت .. لله في الله ..هاه ياراعي الوانيت .. والله انك مو هين .. بس روح روح .. الله يستر عليك .. ( كانت تحدثني وهي ضاحكه )
قلت .. زين .. بس سؤال ممكن .. ( أحدثها وأنا لاعب فيني غرامها )
قالت .. ممكن .. خلصني ..
قلت .. انتي متزوجه ؟
قالت .. " وهي ميته من الضحك " .. وعندي بنتين و ولد ..
قلت .. آآآآآآه .. ماتحطيني الولد الثاني . لله في الله
قالت .. يبه روح فضحتنا والله .. شنو هذا ..اول مره اشوف كادود مغازلجي " كانت من كثر ضحكها تكاد دموعها تنزل )
قلت .. خلاص .. ما أبي شئ .. بس ترى لي عليج حق !!
قالت .. لك علي حق !!!!!!! شتبي يالكادود .. عشتوا !!!
قلت .. أول شئ اخذتي من وقتي الثمين .. ولولا شهامتي معاج .. وإلا الحين الوانيت متروس عبريه
قالت .. " وضحكها يزداد " يبه بعطيك عشرة دنانير .. عن عشرة عبريه .. بعد شتبي ياكادود ..
قلت .. لا لا هذي إهانه للكادودين كلهم .. شنو انا جاي اشحذ منج ؟
قالت .. " وضحكها مستمر " عيل شتبي ياراعي الوانيت ؟
قلت .. بس شئ واحد .. سلمي على زوجج .. وقولي له .. يهنئك راعي الوانيت على هالشقراء اللي عندك ( لا تسألني كيف قلتها .. أهي طلعت الكلمه جذي )
قالت .. ويدها على فهما الرائع .. أووووه شقاعد تقول .. استح على وجهك .. شهالحجي ؟؟ ( وهي تضحك )
قلت .. اسف مو قصدي .. بس صراحه .. حلوه .. انيقه .. ماشاء الله . مال وجمال ..
قالت .. خلاص روح زين .. راعي وانيت ويغازل .. " قالتها بغرور .. و دلال "
قلت .. " كنت أنا ميت من الضحك " وأنا راجع للوانيت .. شرايج أعطيج الرقم ..
وكأني أطلقت نكته مدويه ..
قالت ... " وهي ميته من الضحك " .. روح زين .. والله انك عيار يالكادود .. روح روح ..
راحت .. راحت .. وعيوني تتبعها .. راحت .. مجبور اودعها ..
يرضيك ياشوق .. !!
و .... أشقر على أشقر " ...
مساك الله بالخير كدادنا (حسب لهجتنا) ..... والله تحسفت اني توني اقرأ هذا الجمال
يارجل روعة قلمك جعلتني اعيش معك واتخيل نفسي مكانك ...بل انتبه لا احسدك
انا من هناك اقدم لك عرض أحترافي لزيارتنا بالمملكة ...فوالله سترى العجب العجاب
سجلني من متابعيك ومعجبيك
اخوك / ناصر