سؤال يجب أن يسأله كل كويتي ..
منو المسؤول عن الحال اللي احنا فيها ؟
منو المسؤول عن وصولنا لما نحن فيه ؟
منو المسؤول عن احتلالنا للمرقع الاخير بين دول الخليج .. اللي يتشابهون معنا في كل شيء ؟
الموقع الاخير في كل شيء ..
في التنميه .. في الاقتصاد .. اللي لولا النفط لانكشفت سوءتنا ..
في الرياضه .. اللي وصلنا فيها آخر المنحدر ..
في الفنون ..
في اثقافه .. اللي عقب ما كنا نصدر للعالم العربي مجلة العربي .. صارو عيالنا يجيبون الثانويه من مدارس مسائيه من بعض الدول الشقيقه ..
في القوانين اللي تمشي على ناس وناس .. وصرنا نشوف الحرامي يمشي بينا عيني عينك بريء ..
في التعليم .. اللي انحدرنا فيه لدرجة ان اكثر من 45 % من الكويتيين يدرسون عيالهم في المدارس الخاصه هروباً من مناهج الدوله ..
في الخدمات الصحيه .. اللي صرنا نصدر مرضانا للعلاج في دول مثل الاردن لبنان .. مع كامل احترامي لهم ..
في التطور العمراني .. اللي اكبر مشروع سويناه خلال 30 سنه الماضيه هو استاد جابر ..
في حق المواطن في السكن .. اللي ما يطلع له البيت الا عقب التقاعد ..
نحن افضل منهم فقط في اخذ موقع متقدم بين اكثر الدول فساداً .. حسب تقرير منظمة الشفافيه الأخير ..
نحن نعلم ذلك .. اننا الأسوأ .. لكن صج .. منو المسؤول ؟
الشعب ؟
الحكومه ؟
البيئه اللي نعيش فيها ؟
شخصياً .. انا أميل لرأي الشيخ سعود الناصر الصباح .. عندما قال .. ان الكويت مخطوفه .. واللي خاطفنا هو المسؤول ..